بيىل 1 قىركۇيەكتەن باستاپ ەلىمىزدەگى بارلىق ءبىلىم بەرۋ ۇيىمدارىندا بالالارعا ارنالعان جەكە قاۋىپسىزدىك ساباقتارى قايتا قولعا الىنادى، دەپ حابارلايدى Dalanews.kz.
بۇل ساباقتاردىڭ ماقساتى – بالالاردى ءتۇرلى ومىرلىك جاعدايلاردا دۇرىس ارەكەت ەتۋگە ۇيرەتۋ، ءوز قاۋىپسىزدىگىنە جاۋاپكەرشىلىكپەن قاراۋدى قالىپتاستىرۋ.
جەكە قاۋىپسىزدىك ساباقتارى بارلىق دەڭگەيدەگى ءبىلىم بەرۋ مەكەمەلەرىندە وتەدى – بالاباقشادان باستاپ كوللەدجگە دەيىن. ءار جاس توبىنا ارنالعان بولەك باعدارلاما قاراستىرىلعان:
- بالاباقشا تاربيەلەنۋشىلەرى – شۇعىل قىزمەتتەردىڭ تەلەفون نومىرلەرى، ويىن الاڭدارى مەن ويىن ورتالىقتارىنداعى قاۋىپسىزدىك ەرەجەلەرى؛
- باستاۋىش سىنىپتار – سۋداعى جانە مۇزداعى قاۋىپسىزدىك، بەيتانىس ادامدارمەن قارىم-قاتىناس، قاڭعىباس جانۋارلاردان قورعانۋ؛
- ورتا بۋىن وقۋشىلارى – بۋللينگ پەن كيبەربۋللينگتەن ساقتانۋ، ءقاۋىپتى ينتەرنەت-اۋەستەنۋلەردەن باس تارتۋ، بوگدە ادامداردىڭ شاقىرۋىنا ەرمەۋ، ءوز ارەكەتىنە جاۋاپكەرشىلىك سەزىمىن قالىپتاستىرۋ؛
- جوعارى سىنىپتار مەن كوللەدج ستۋدەنتتەرى – قارجىلىق ساۋاتتىلىق، الاياقتىقتان قورعانۋ، ونلاين-ويىنداردىڭ قاۋىپ-قاتەرى، ەڭبەك قاۋىپسىزدىگى، ءوز قۇقىقتارى مەن مىندەتتەرىن ءبىلۋ، جەكە جاۋاپكەرشىلىك.
ساباقتار اپتاسىنا ءبىر رەت، سىنىپ ساعاتىندا 10 مينۋتتان وتكىزىلەدى. ءار تاقىرىپ وقۋ جىلى ىشىندە ءۇش مارتە قايتالانادى.
باعدارلاما اياسىندا ءۇش كەزەڭنەن تۇراتىن مونيتورينگ جۇرگىزىلگەن. مۇعالىمدەر مەن پسيحولوگتارعا ارنالعان كونسۋلتاسيالار مەن ۆەبينارلار ۇيىمداستىرىلدى. وعان پوليسيا، تجم جانە دەنساۋلىق ساقتاۋ سالاسىنىڭ وكىلدەرى دە قاتىسقان. ساباقتاردا ساۋالناما، جوبا جۇمىستارى، بەينەروليكتەر مەن ءتۇرلى ينتەراكتيۆتى ادىستەر قولدانىلدى.
"پراكتيكا كورسەتكەندەي، مۇنداي ساباقتار بالالاردىڭ ۋايىم-تولقۋىن ازايتادى، قاۋىپسىزدىك داعدىلارىن قالىپتاستىرادى ءارى شىنايى ومىردە دە، ونلاين كەڭىستىكتە دە كۇردەلى جاعدايلاردا دۇرىس شەشىم قابىلداۋعا ۇيرەتەدى"، — دەدى ق ر بالا قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا.
ەسكە سالا كەتسەك، جەكە قاۋىپسىزدىك ساباقتارى 2023–2025 جىلدارعا ارنالعان بالالاردى زورلىق-زومبىلىقتان قورعاۋ، ءسۋيسيدتىڭ الدىن الۋ جانە ولاردىڭ قۇقىقتارى مەن ءال-اۋقاتىن قامتاماسىز ەتۋ جونىندەگى كەشەندى جوسپار شەڭبەرىندە ەنگىزىلگەن.
بۇعان دەيىن 138 مىڭ قازاقستاندىق وقۋشى جاڭا وقۋ جىلىن جاڭارتىلعان مەكتەپتەردە باستايتىنىن حابارلاعان ەدىك.
