قازاقستان جەر سىلكىنىسى سانى بويىنشا الەمدە 6-ورىندا تۇر، - دەپ حابارلايدى Dalanews.kz ranking.kz دەرەكتەرىنە سىلتەپ.
earthquakelist.org مالىمەتى بويىنشا 2 اقپانداعى جاعداي بويىنشا ەڭ كوپ جەر سىلكىنىسى جاپونيادا بولدى: 204 وقيعا، ەڭ جوعارى ماگنيتۋداسى - 7،5. ودان كەيىن مەكسيكا (180 وقيعا، ەڭ جوعارى ماگنيتۋداسى - 6،1)، يندونەزيا (169 وقيعا، ەڭ جوعارى ماگنيتۋداسى - 5،6) تۇر. سونداي-اق، جۇڭگو، قىرعىزستان، قازاقستان، فيليپپين، چيلي، گۆاتەمالا جانە پەرۋدا جەر سىلكىنىسى ءجيى بولدى.
قازاقستاندا بيىلدىڭ وزىندە 123 جەر سىلكىنىسى تىركەلگەن. بۇگىندە قازاقستان الەمدەگى 100 ەلدىڭ ىشىندە 6-ورىندا تۇر.
قازاقستاندا ەڭ كۇشتى جەر سىلكىنىسى 1911 جىلى 3 قاڭتاردا بولدى. ماگنيتۋداسى - 7،8 بالل (بارلىق ەل اراسىندا 23-ورىن). جەر سىلكىنىسى شامامەن ءتورت ميلليون شارشى مەتر اۋماقتا سەزىلگەن. گەولوگ كارل بوگدانوۆيچتىڭ ايتۋىنشا، جەر سىلكىنىسىنەن 452 ادام قازا تاۋىپ، 740 ادام جارالانعان، 1094 ءۇي مەن 4545 كيىز ءۇي قيراعان، سونىمەن قاتار، 13 مىڭعا جۋىق مال قىرىلعان.
