«قازاقمىس» توبىندا وندىرىستىك ارنايى كيىمنىڭ ءبىرىڭعاي ستاندارتىنا كەزەڭ-كەزەڭمەن كوشۋ جالعاسۋدا. جاڭارتىلعان ارنايى كيىم ۇلگىلەرى ناقتى ەڭبەك جاعدايىن ەسكەرە وتىرىپ، جەر ءۇستى جانە جەر استى جۇمىستارىنداعى ەرەكشەلىككە ساي دايىندالدى، دەپ حابارلايدى Dalanews.kz.

باستى مىندەت – ارنايى كيىمدى بارىنشا ىڭعايلى، سەنىمدى ءارى فۋنكسيونالدى ەتۋ. ءوندىرىس الاڭىندا انىق كورىنۋ ءۇشىن جاڭا ۇلگىدەگى كيىمنىڭ ءتۇسى وزگەرتىلدى. ىڭعايلى بولعاندىقتان جانە جىلدام تاعىلىپ-شەشىلەتىندىكتەن تۇيمەنىڭ ورنىنا سىدىرما مەن باتىرما قولدانىلدى. شاڭ مەن سۋىقتان جاقسىراق قورعاۋ ءۇشىن قايىرما جاعا تىك جاعاعا اۋىستىرىلدى. شالباردىڭ بەل تۇسىنىڭ ارتقى بولىگى بيىكتەتىلىپ، جىلى بولۋ ءۇشىن قوسىمشا قابات قوسىلدى. بۇل جەراستى جۇمىسىن ورىنداۋدا اسا ماڭىزدى. سونىمەن قاتار قۇرالدارعا ارنالعان قوسىمشا قالتالار مەن اۋا الماسۋدى قامتاماسىز ەتەتىن ۆەنتيلياسيالىق ەلەمەنتتەر قاراستىرىلعان.

ارنايى كيىم ۇلگىسىنىڭ جاڭا ستاندارتىنا كوشۋ ءبىرقاتار ءوندىرىس الاڭدارىندا 2025 جىلى  جۇزەگە اسىرىلدى. 2026 جىلعى 1 ناۋرىزدان باستاپ جاڭارتىلعان ارنايى كيىم جەزقازعان تاۋ-كەن ءوندىرىسىنىڭ كاسىپورىندارىنا ەنگىزىلەدى.

ارنايى كيىمنىڭ ءبىرىڭعاي ستاندارتىن ەنگىزۋدىڭ ماقساتى – كۇندەلىكتى جۇمىستا جايلىلىق پەن قاۋىپسىزدىكتى قامتاماسىز ەتۋ. جاڭا ستاندارت جۇمىس ۇدەرىسىن ىڭعايلى ءارى ءقاۋىپسىز ەتۋى ءتيىس.