كەزدەسۋگە وتاندىق ب ا ق سالاسىنىڭ باس رەداكتورلارى مەن مەديا ساراپشىلار قاتىستى. اتاپ ايتقاندا، ساياساتتانۋشى جانە ەلىمىزدىڭ قوعام قايراتكەرى ايدوس سارىم، «قازاق ءۇنى» گازەتى جانە پورتالىنىڭ جەتەكشىسى قازبەك يسا، «Massaget.kz» پورتالىنىڭ باس رەداكتورى ومىربەك سانسىزبايەۆ، «Baq.kz» سايتىنىڭ باس رەداكتورى ءمولدىر اسقار، «BariBar.kz» پورتالىنىڭ باس رەداكتورى ديماش زيادين، «اتىراۋ-اقپارات» حولدينگىنىڭ وكىلى ەرلان ماجىك جانە «مەديا دامىتۋ قورى» كورپوراتيۆتىك قورى باس ديرەكتورىنىڭ كەڭەسشىسى قاينار احەتوۆ قاتىستى.
ساراپتامالىق كەزدەسۋدىڭ باستى ماقساتى - قازاق ءتىلدى ينتەرنەت رەسۋرستاردىڭ دامۋى، سونىڭ ىشىندە پورتالدار مەن سايتتار كونتەنتىنىڭ دامۋى.
2009 جىلدىڭ كورسەتكىشى بويىنشا قازاقستاننىڭ ينتەرنەت كەڭىستىگىندە بار بولعانى 6 سايت قازاق تىلىندە بولعان ەكەن (abai.kz، egemen.kz، jasqazaq.kz، qazaquni.kz، turkystan.kz، zamandas.kz.). سول ۋاقىتتان بۇگىنگى كۇنگە دەيىن قازاق ءتىلدى سايتتاردىڭ، پورتالداردىڭ سانى ءوستى، ال ساپاسى شە؟
كەزدەسۋ بارىسىندا ساراپشىلاردىڭ باستى نازارى قازاق ءتىلدى باق-تىڭ كونتەنتى جانە ونىڭ دامۋ ماسەلەلەرىندە، پايدالى كونتەنتىندە، سايت رەداكسيالارىنىڭ ءوز اۋديتورياسىن زەرتتەۋ جولدارىندا بولدى.
ونلاين فورماتتا بولعان كەزدەسۋدىڭ باس ساراپشىلارى قازبەك يسا جانە ايدوس سارىمنىڭ پىكىرىنشە، وتاندىق سايتتاردىڭ كورسەتكىشتەرىن انىق ءارى دۇرىس كورسەتە بىلەتىن «ۇلتتىق ولشەگىش» قۇرالىن قۇرۋ كەرەك. سونىمەن قاتار، قوعامدىق پىكىردىڭ سوڭىنان ەرىپ ءجۇرۋ ەمەس، قوعامدىق پىكىردى وزگەرتۋ باستى باعىت. سول سەبەپتى قازاق ءتىلدى ينتەرنەت رەسۋرسترادىڭ رەداكسيالارى اۋديتورياعا «ءوتىمدى» جاڭالىقتاردى ۇسىنىپ، اۋديتورياعا بەيىمدەلۋ پروسەسىنەن كەتۋى كەرەك.
ايدوس سارىمنىڭ سوزىنە سۇيەنەتىن بولساق: «نەگە بيلىك قازاق اۋديتورياسىمەن سويلەسكەن كەزدە نەگىزىندە رۋحاني، قوعامدىق ۇلكەن دۇنيەلەردى ايتادى دا، ال قوعامعا قاتىسى بار ۇلكەن دۇنيەلەردى ورىس تىلىندە ايتادى؟ مىسالى، زەينەتاقى قانشا پايىزعا ءوستى، ەكونوميكانىڭ قانداي ۇلكەن باعىتتارىندا وزگەرىستەر بولادى، ينۆەستيسيالىق ساياسات قانداي بولادى. وسىنداي تاقىرىپتاردى نەگە ورىس تىلىندە بەرەدى؟ ال ءوز اۋديتوريامىزعا وسى تاقىرىپتاردى قانشالىقتى قىزىق ەتىپ جەتكىزۋگە تىرىسۋدامىز؟..
ءوزىم قازاق باسىلىمدارىن ءجيى وقيتىن وقىرمان رەتىندە ايتارىم، ەكونوميكالىق تاقىرىپتا جازىلىپ جاتقان اقپاراتتار، ساراپتامالار دا پايدا بولىپ جاتقان سياقتى.
جاقسى-جاقسى قازاق ءتىلدى ەكونوميست، زاڭگەر، ەكولوگ باسقا دا ازاماتتار پايدا بولىپ، زاماناۋي تىلدە، بارىنشا قازاقىلاندىرىپ اقپاراتتى بەرىپ جاتقان دا سياقتى. ءبىراق جاعدايىمىز جاڭاعىداي...»
ال، ەلىمىزدىڭ جاستارى اراسىندا تانىمال «Massaget.kz» پورتالىنىڭ باس رەداكتورى ومىربەك سانسىزبايەۆتىڭ سوزىنە سۇيەنەتىن بولساق، كەز-كەلگەن رەداكسيا ءوز وقىرماندارىنا زەرتتەۋ جاساۋى شارت. سايتقا ساراپتاما جاساۋدىڭ 3 ولشەمى بار.
- ماركەتينگتىك؛
- رەداكسيالىق؛
- الەۋمەتتىك جەلى ارقىلى.
«Baq.kz» اقپاراتتىق پورتالىنىڭ باس رەداكتورى ءمولدىر اسقاردىڭ ايتۋىنشا، بۇگىنگى كۇنى تەك قازاق تىلىندە اقپارات تاراتاتىن سايتتاردىڭ، سونىڭ ىشىندە جاڭالىقتار رەداكسيالارىنىڭ تىلشىلەرى «اۋدارماشى» قىزمەتىن قاتار الىپ جۇرەدى. سەبەبى رەسمي جيىنداردا، باسپا ءسوز كونفەرەنسيالارىندا بايانداماشىلار باياندامانى ورىس تىلىندە وقيدى. بۇل تىلشىلەردىڭ پورتالعا جاڭالىقتاردى شۇعىل سالۋ پروسەسىن باياۋلاتادى.
سوندىقتان، كەزدەسۋدىڭ ەڭ باستى قورىتىندىلارىنىڭ ءبىرى رەتىندە باق-تىڭ وسى ۋاقىتتا ينتەرنەت-پلاتفورمالاردا بەلسەندى بولۋىنىڭ ماڭىزدىلىعىن ءبولىپ ايتا الامىز. قازاق رەداكسيالارى اۋديتوريانى ءوزىنىڭ ارتىنان ەرتە بىلەتىن اقپاراتتىق مايداندى جانە دە وتاندىق سايتتاردىڭ كورسەتكىشتەرىن انىق ءارى دۇرىس كورسەتە بىلەتىن «ۇلتتىق ولشەگىش» قۇرالىن قۇرۋ كەرەك. سەبەبى وقىرماننىڭ تالعامىن قۇراستىرۋشى ورگانداردىڭ ءبىرى – مەديا سالاسى. مەملەكەتتىك ورگاننان شىعاتىن اقپارات ەكى تىلدە قاتار، ءارى ساپالى شىعۋى كەرەك.
ساراپتامالىق كەزدەسۋ الەۋمەتتىك جەلىلەردە تىكەلەي ەفيردە وتكىزىلدى.
كەزدەسۋدىڭ تولىق نۇسقاسىن “مەديا دامىتۋ قورى” كورپوراتيۆتىك قورىنىڭ Facebook جەلىسىندەگى mediafoundationkz پاراقشاسىنان https://www.facebook.com/mediafoundationkz/videos/907056206489196 سىلتەمەسى ارقىلى كورە الاسىزدار.
