ەگەر الدەقانداي قۇدىرەتپەن ابىلايحاننىڭ زامانىنا توپ ەتە قالىپ، «قازاق قوناقجاي ما؟» دەپ سۇراساڭ اتا-بابالارىمىز كەڭكىلدەپ كۇلۋى مۇمكىن.
جىل ون ەكى اي مالدىڭ سوڭىندا كوشىپ-قونىپ جۇرگەن جۇرتتىڭ قوناقتاپ جۇرەتىن مۇمكىندىگى بولماعان عوي.
قوناقجاي بولعانىمىز بەرتىندە عانا. بۇگىندە بالالاردىڭ ساباعى بىتكەن سوڭ، اتاسى مەن اپاسىنا، ناعاشى جۇرتىنا اتتاندىرامىز.
ال باياعى زاماندا بابالارىمىز الىستاعى ناعاشىلارىن ءوزىنىڭ ومىرىندە ەكى-ۇش رەت قانا كورگەن عوي. كەيبىرەۋى ءتىپتى ناعاشىلارىنىڭ ءتۇرىن دە كورمەي، دۇنيەدەن ءوتىپ كەتكەن بولۋى مۇمكىن.
ەگەر قازاق قوناقجاي بولساق، سول كەزدە جيەندەر جىل سايىن جىلتىڭداپ ناعاشىلارىنا بارۋشى ەدى. بارماعان عوي.
سوندىقتان بولسا كەرەك، ناعاشى جۇرتى جيەنى كەلگەندە قۇدايى قوناق كەلگەندەي كۇتىپ، بارلىق ەركەلىگىن كوتەرگەن. ەگەر جيەن جىل سايىن ناعاشىلارىنا قوناققا بارسا، قازاقتا جيەندەرگە قاتىستى مۇنداي قۇرمەت قالىپتاسپاعان بولار ەدى.
سولاي اعايىن. قازاق قوناقجاي حالىق دەپ ورىستاردى باۋىرعا باسىپ جاتقاندار كەڭەستىڭ جۇيەنىڭ يدەولوگياسىمەن مي ۋلانعاندار. ەستەرىڭىزدەن شىعارماڭىزدار، قازاق ەشقاشان قوناقجاي، داراقى بولماعان.
نۇرلان جۇماحان
