"اسەل ك.روبەرتس 2021 جىلدىڭ 20 قاڭتارىنان اقش پروتوكولى باسشىسىنىڭ مىندەتىن اتقارۋشى لاۋازىمىنا كىرىستى. پروتوكول باسشىسى كەڭسەسىندە 15 جىلدان استام جۇمىس تاجىريبەسى بار ول سوڭعى ۋاقىتتا اعا كەڭەسشى قىزمەتىن اتقارعان ەدى"، - دەلىنگەن حابارلامادا.
قازاق قىزى دجوردجتاۋن ۋنيۆەرسيتەتىنىڭ ەممۋند ۋولش اتىنداعى ديپلوماتيالىق قىزمەت مەكتەبىن ءتامامداعان. قازاق، ورىس جانە جاپون تىلدەرىندە سويلەيدى.
ايتا كەتسەك، پروتوكول باسشىسى – اقش مەملەكەتتىك دەپارتامەنتىنىڭ لاۋازىمدى تۇلعاسى. ونىڭ مىندەتى – اقش پرەزيدەنتى، ۆيسە-پرەزيدەنتى جانە مەملەكەتتىك حاتشىسىنا مەملەكەتتىك جانە حالىقارالىق ديپلوماتيالىق پروتوكول ماسەلەلەرى بويىنشا كەڭەس بەرۋ.
بۇعان دەيىن Sputnik قازاقستان پورتالى اسەل تولەنوۆانىڭ اقش پرەزيدەنتى اكىمشىلىگىندە باسشىلىق قىزمەت اتقارىپ جۇرگەنىن جازعان ەدى. الەۋمەتتىك جەلىلەردە ونىڭ ەكس-پرەزيدەنت باراك وبامامەن جانە جاڭادان سايلانعان پرەزيدەنت دجو بايدەنمەن تۇسكەن سۋرەتتەرى تارادى.
"اعايىندار" جيناعىنا اسەل تولەنوۆانىڭ ءومىربايانى ەنگىزىلگەن. سوندا كورسەتىلگەندەي، اسەل 1976 جىلى الماتىدا دۇنيەگە كەلگەن. ال 1993 جىلى اقش-تىڭ دجوردجتاۋن ۋنيۆەرسيتەتىنە وقۋعا ءتۇسىپ، حالىقارالىق ديپلوماتيا ماماندىعىن مەڭگەرىپ شىقتى. 1998 جىلدان باستاپ اقش مەملەكەتتىك دەپارتامەنتى پروتوكول باسقارۋشىسىنىڭ سىرتقى قاتىناستار جونىندەگى ورىنباسارى بولىپ جۇمىس ىستەگەن. 2014 جىلى اقش پرەزيدەنتى پروتوكولى باسشىسىنىڭ ورىنباسارى قىزمەتىنە دەيىن كوتەرىلدى.
Factcheck.kz حابارلاعانىنداي باراك وبامامەن بىرگە تۇسكەن فوتونىڭ وڭ جاعىندا تۇرعان ادامنىڭ ءاتى-جونى – شون روبەرتس. اشىق اقپارات كوزدەرىنە سۇيەنسەك، ول – اسەلدىڭ كۇيەۋى.
شون روبەرتس قازاقستان تۋرالى جاقسى بىلەدى. سەبەبى ول 90-شى جىلداردىڭ سوڭىندا USAID باعدارلاماسى اياسىندا ورتا ازيا وڭىرىندە جۇمىس ىستەگەن. 2006 جىلى ول دجوردجتاۋن ۋنيۆەرسيتەتىنە ءتۇسىپ، ورتالىق ازيانى زەرتتەيدى. ال ونىڭ العاشقى العان ءبىلىمى – ورىس ءتىلى جانە تاريح. قازىرگى كەزدە ول دجوردج ۆاشينگتون ۋنيۆەرسيتەتىنىڭ حالىقارالىق دامۋدى زەرتتەۋ كافەدراسىنىڭ دوسەنتى جانە ديرەكتورى بولىپ جۇمىس ىستەيدى. ونىڭ زەرتتەۋ جۇمىستارى كوبىنە ورتالىق ازياعا، اتاپ ايتقاندا قىتايداعى ۇيعىرلاردىڭ تاعدىرىنا نەگىزدەلگەن. ونىڭ جاقىندا عانا «ۇيعىرلارعا قارسى سوعىس: قىتايدىڭ مۇسىلمان ازشىلىعىنا قارسى ىشكى ناۋقانى» اتتى كىتابى شىقتى. كىتاپ شىققاننان كەيىن ول ءتىپتى «ازاتتىقتىڭ» جەرگىلىكتى رەداكسياسىنا سۇحبات بەردى.
