كرەمل جاقتاعى كۇشتەر قازاق پەن قىرعىز ۇلتىن ارازداستىرۋدى جاڭا دەڭگەيگە كوتەرمەك، - دەپ حابارلايدى Dalanews.kz DALA INSIDE-قا سىلتەپ.
كوشپەندىلەر ويىنىندا ورىن العان «كوكپار داۋىنان» كەيىن سولتۇستىك كورشىمىزدىڭ ساياسي تەحنولوگتارى بولاشاق تۇران تۇركى وداعىن بولدىرماۋدىڭ ءبىر قۇرالى رەتىندە قازاق پەن قىرعىز اراسىنداعى ماڭگى داۋ تۋدىراتىن تاقىرىپتاردى تاڭداپ، ولاردى ۇزدىكسىز قاۋزاپ وتىرۋ ماقساتىندا بوتوفەرمالار مەن اففيرلەنگەن اقپارات قۇرالدارىن پايدالانۋدى دۇرىس دەپ تاپتى.
«كوكپار، كوك بورۋۋ، قازاق پەن قىرعىز بىزدىكى دەپ تالاساتىن ۇلتتىق تاعامدار جانە كەنەسارى. الەۋمەتتىك جەلىدە بىردەن جۇزدەگەن كوممەنتارييلەر تۋدىراتىن وسى داۋلى تاقىرىپتار فەيسبۋك توپتار مەن ينستاگرام پابليكتەردە، تيك-توك پەن اقپارات قۇرالدارىنا اراگىدىك شىعىپ وتىرماق»، - دەيدى DALA INSIDE دەرەككوزى.
رەسەي تۇران يدەياسىنا تۇپكىلىكتى قارسى. سەبەبى، ءوزىنىڭ ىقپالىندا وتىرعان ورتالىق ازيا مەملەكەتتەرى انكارانىڭ گەوساياسي كەڭىستىگىنە اۋىسىپ كەتەدى دەگەن قورقىنىشى باسىم. ودان بولەك، ءوزىنىڭ قۇرامىنداعى تاتارستان مەن باشقۇرتستان سىندى تۇركى مەملەكەتتەرى تۇرانعا قاراپ بوي تۇزەي باستاسا، فەدەراسيانىڭ ىدىراپ كەتۋ ءقاۋپى بار.
وسى اپتادا الماتى مارافونداعى قىرعىز سپورتشىسى اينۋسكا قاليل قىزىنىڭ ديسكۆاليفيكاسيا الىپ، جۇلدەدەن قاعىلعاندىعى تۋرالى تاقىرىپ جان-جاقتى قاۋزالاتىن بولادى. «قىرعىز اتلەتى ەرەجە بۇزدى» دەگەن نارازىلىق بەلارۋس دەلەگاسياسىنىڭ تاراپىنان كەلسە دە، ونى قازاق تورەشىلەرى ادەيى جاسادى دەگەن مەسسەدج «اكيپرەسس»، «كاكتۋس مەديا» سىندى رەسۋرستاردا كەڭىنەن جاريالانباق. ال روسسوترۋدنيچەستۆومەن جۇمىس ىستەيتىن قازاقستاندىق ءورىستىلدى بلوگەرلەر كەرىسىنشە «قايتا-قايتا جىلاي بەرەدى» دەپ قىرعىز ۇلتىنا ءتىل تيگىزە باستاۋى ءتيىس. وسىلايشا قازاق پەن قىرعىز اراسىندا الدىمەن الەۋمەتتىك جەلىلەردە قوعامدىق شيەلەنىستى ۋشىقتىرىپ، ارتىنان ونى ديپلوماتيالىق سالقىندىق دەڭگەيىنە دەيىن كوتەرۋ كوزدەلگەن.
سونىمەن قاتار، شتابى پەتەربوردا ورنالاسقان ساياسي تەحنولوگتارعا قازاق پەن وزبەك اراسىندا وسىنداي ءبىر داۋ تۋدىرىپ كورۋ مۇمكىندىگىن قاراستىرۋ ۇسىنىلدى. بوكس، باسقا دا تاقىرىپتار پوتەنسيالى زەرتتەلۋدە. باستى ماقسات - تۇران يدەياسىن پاۋزاعا قويىپ، تۇركى ەلدەرى ۇجىمىنداعى قىزىپ كەلە جاتقان جۇمىستىڭ بەرەكەسىن كەتىرۋ. سەبەبى، لاتىن تىلىندەگى ورتاق تۇركى الىپپەسىنىڭ رەسمي قابىلدانۋى، جانە باسقا دا جوبالاردىڭ بەلسەندى ءجۇرۋى كرەملدىڭ مازاسىن قاشىرىپ وتىر.
رەسەي تۇران وداعىن ىدىراتا الا ما؟ ەگەر تۇركى حالىقتارىنىڭ ىشكى بىرلىگى مىقتى بولسا ول جوسپارى ىسكە اسپايتىنى انىق. ءبىراق پەتەربورداعى تەحنولوگتار ءتۇبى ءبىر ۇلتتاردى بىر-بىرىنە قارسى قويۋعا تاپتىرمايتىن جالعان پوپۋليزم مەن پسيەۆدوۇلتشىلدىقتى پايدالانۋدى مەڭگەرىپ الدى. ونىمەن ءبىراز باستامانىڭ اياعىن شالىپ وتىرۋعا بولادى.
