كاسپيي قۇبىر كونسورسيۋمى (كقك) رەسەي مەن ۋكراينانىڭ قورعالاتىن نىساندارىنىڭ تىزىمىنە ەندى، – دەپ حابارلايدى Dalanews.kz.
كەلىسىم تۋرالى نە بەلگىلى؟
كرەمل سايتى 25 ناۋرىزدا رەسەي مەن ۋكراينا شابۋىل جاساماۋعا كەلىسكەن ەنەرگەتيكالىق نىسانداردىڭ ءتىزىمىن جاريالادى. قۇجاتتا ناقتى نىساندار كورسەتىلمەگەنىمەن، بەس ساناتتاعى ينفراقۇرىلىم قورعالاتىنى انىقتالدى.
وسىلايشا ەكى ەل مىنا نىساندارعا سوققى جاساماۋعا ۋاعدالاستى:
-
مۇناي وڭدەۋ زاۋىتتارى؛
-
مۇناي جانە گاز قۇبىرلارى، قويمالار، مۇناي ايداۋ ستانسيالارى؛
-
ەلەكتر ەنەرگياسىن ءوندىرۋ جانە تاراتۋ جۇيەلەرى (ەلەكتر ستانسيالارى، جەلىلەر، ترانسفورماتورلار، تاراتۋ ورتالىقتارى)؛
-
اتوم ەلەكتر ستانسيالارى؛
-
سۋ ەلەكتر ستانسيالارىنىڭ دامبالارى.
2025 جىلعى 18 ناۋرىزدا كۇشىنە ەنگەن بۇل ۋاقىتشا موراتوريي 30 كۇنگە سوزىلادى. قاجەت بولعان جاعدايدا مەرزىمى ۇزارتىلۋى مۇمكىن. ەگەر تاراپتاردىڭ ءبىرى شارتتاردى بۇزسا، ەكىنشىسى ءوز مىندەتتەمەلەرىنەن بوساتىلادى.
كقك تۋرالى نە بەلگىلى؟
جىل باسىنان بەرى كقك جۇيەسىنە كىرەتىن بىرنەشە نىسان شابۋىلعا ۇشىرادى.
كاسپيي قۇبىر جەلىسى كونسورسيۋمىنداعى ۇلەستىڭ 24%-ىن رەسەي باقىلاپ وتىر. قازاقستاننىڭ اتىنان «قازمۇنايگاز» 19% اكسياعا يە. سونداي-اق، كونسورسيۋم قۇرامىندا امەريكالىق Chevron Caspian Pipeline Consortium Company (15%) جانە Mobil Caspian Pipeline Company (7،5%) بار.
بۇدان بولەك، رەسەيلىك «لۋكويل» 12،5%، Rosneft-Shell Caspian Ventures Limited (رەسەي مەن ۇلىبريتانيا) 7،5% اكسياعا يە.
