ەكس-سەناتور، بۇرىنعى باس پروكۋرور قايرات قوجامجاروۆتىڭ جاقىن ادامى تالعات تاتۋبايەۆ ۇستالعانى تۋرالى اقپارات جاريالاندى، دەپ حابارلايدى Dalanews.kz Elmedia-عا سىلتەپ.
اقپارات كوزىنە سەنسەك، 49 جاستاعى تالعات تاتۋبايەۆ بەيسەنبى كۇنى ۇستالىپ، الماتى قالاسىنا جەتكىزىلگەن. ول ۇزاق جىل بويى قازاقستاننىڭ ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىندە (قارجى پوليسياسى) قىزمەت اتقارعان. اسىرەسە، قوجامجاروۆتىڭ تۇسىندا ونىڭ مانسابى ورلەپ، جەمقورلىقپەن كۇرەس اگەنتتىگىندە دەپارتامەنت باسشىسى بولعان. كەيىن پرەزيدەنت اكىمشىلىگىندە قۇقىق قورعاۋ جۇيەسى ءبولىمىنىڭ مەڭگەرۋشىسى ورىنباسارى قىزمەتىن اتقارىپ، 2016-2019 جىلدارى ۇلتتىق بيۋرو باسشىسى لاۋازىمىن يەلەنگەن.
قوجامجاروۆ باس پروكۋرور بولىپ تۇرعان تۇستا تاتۋبايەۆ باس پروكۋراتۋرانىڭ قىلمىستىق قۋدالاۋ قىزمەتىنىڭ باسشىسى بولىپ قىزمەت اتقارعان. كەيىن ادىلەت ءمينيسترىنىڭ كەڭەسشىسى قىزمەتىن 2022 جىلدىڭ ناۋرىزىنا دەيىن جالعاستىرعان.
Elmedia باسىلىمىنىڭ دەرەككوزىنە سۇيەنسەك، تالعات تاتۋبايەۆقا "بتا بانك" قىزمەتكەرلەرىنە قاتىستى ازاپتاۋ تاسىلدەرىن قولداندى دەگەن اۋىر ايىپ تاعىلىپ وتىر. بۇل دەرەك بۇرىننان بەرى قۇقىق قورعاۋشىلار مەن ادۆوكاتتار تاراپىنان كوتەرىلىپ كەلە جاتقان، بانك اكتيۆتەرى ءۇشىن بولعان قاقتىعىس كەزەڭىندەگى ءىرى ءىستىڭ جالعاسى بولۋى مۇمكىن. تاتۋبايەۆ وسى ءىس اياسىندا ازاپتاۋ ارەكەتتەرىن ۇيىمداستىرۋشى نەمەسە قاتىسۋشى رەتىندە تەرگەلىپ جاتقانى ايتىلعان.
بۇل ءىس باس پروكۋراتۋرا جانىنان قۇرىلعان ارنايى ۆەدومستۆوارالىق تەرگەۋ توبىنىڭ باقىلاۋىندا. سونداي-اق، دەرەككوزدىڭ حابارلاۋىنشا، پروكۋراتۋرا مەن قۇقىق قورعاۋ ورگاندارىندا قىزمەت اتقاراتىن قوجامجاروۆتىڭ باسقا دا جاقىن سەرىكتەرى تاتۋبايەۆتى قاماۋدان بوساتىپ الۋعا ارەكەتتەنىپ جاتقان كورىنەدى.
ازىرگە باس پروكۋراتۋرا بۇل ىسكە قاتىستى رەسمي تۇسىنىكتەمە بەرگەن جوق. ۆەدومستۆو اقپاراتتى راستاعان دا، جوققا شىعارعان دا جوق.
