دەنساۋلىق ساقتاۋ مينيسترلىگىنىڭ مالىمەتىنشە، «قازاق دەرماتولوگيا جانە ينفەكسيالىق اۋرۋلار عىلىمي ورتالىعى» رمك دەرەكتەرىنە سايكەس، 2025 جىلعى 31 جەلتوقسانداعى جاعداي بويىنشا قازاقستاندا ۆيچ-پەن ءومىر ءسۇرىپ جاتقان 37 038 ادام تىركەلگەن، دەپ حابارلايدى Dalanews.kz.

Baq.kz رەسمي ساۋالىنا جاۋاپ بەرگەن مينيسترلىك جالپى تىركەلگەن ناۋقاستاردىڭ ىشىندە 296-سى 15 جاسقا دەيىنگى بالالار ەكەنىن مالىمدەدى. ال قالعان 36 742 ادام – 15 جاستان اسقان تۇرعىندار.

گەندەرلىك قۇرىلىمدا ەر ادامدار باسىم. مالىمەتكە سايكەس، ۆيچ-پەن ءومىر ءسۇرىپ جاتقان 22 728 ەر ادام جانە 14 310 ايەل بار.

ايماقتار بويىنشا كورسەتكىشتەر ۆيچ-پەن ءومىر سۇرەتىن ادامداردىڭ باسىم بولىگى ءىرى يندۋستريالىق وڭىرلەر مەن مەگاپوليستەردە شوعىرلانعانىن كورسەتەدى.

تىركەلگەن جاعدايلار سانى بويىنشا الماتى قالاسى الدا – 5 786 ادام. ودان كەيىن قاراعاندى وبلىسى – 4 786، شىعىس قازاقستان وبلىسى – 3 497 جانە استانا قالاسى – 3 087.

سونداي-اق الماتى وبلىسىندا 2 997، قوستاناي وبلىسىندا 2 614 جانە پاۆلودار وبلىسىندا 2 606 جاعداي تىركەلگەن.

شىمكەنت قالاسىندا ۆيچ-پەن ءومىر ءسۇرىپ جاتقان 2 147 ادام بار.

ورتاشا كورسەتكىش تىركەلگەن وڭىرلەر قاتارىندا سولتۇستىك قازاقستان وبلىسى – 1 573 جاعداي، اقمولا وبلىسى – 1 244، جامبىل وبلىسى – 1 214 جانە تۇركىستان وبلىسى – 1 139.

جەتىسۋ جانە باتىس قازاقستان وبلىستارىندا 924 جاعدايدان تىركەلگەن. اقتوبە وبلىسىندا – 587، ماڭعىستاۋ وبلىسىندا – 558، اباي وبلىسىندا – 537، اتىراۋ وبلىسىندا – 506.

ەڭ تومەن كورسەتكىش قىزىلوردا وبلىسىندا – 310 جاعداي جانە ۇلىتاۋ وبلىسىندا – 157 جاعداي تىركەلگەن.