– ءتارتىپ پەن جاۋاپكەرشىلىككە نەگىزدەلگەن ءارى بۇرىن قالىپتاسقان حالىقارالىق جۇيەنىڭ ورنىن حاوس پەن بولجاۋعا كەلمەيتىن جاعداي باسىپ جاتىر. جاھاندىق تەجەۋ مەن تەپە-تەڭدىك جۇيەسى بەيبىتشىلىك پەن تۇراقتىلىقتى ساقتاي المادى. قاۋىپسىزدىك ارحيتەكتۋراسى جويىلا باستادى. الەمدىك دەرجاۆالار اراسىنداعى ءوزارا سەنىمسىزدىك جىلدام ارتىپ كەلەدى. الەم اسكەري قاقتىعىستاردىڭ جاڭا تولقىنىنىڭ قۇربانىنا اينالدى. ءبىز ءبىرىنشى رەت ەكى بۋىننان كەيىن يادرولىق قارۋدى قولدانۋ قاۋپىمەن بەتپە-بەت كەلدىك، – دەدى پرەزيدەنت.
سونىمەن قاتار قاسىم-جومارت توقايەۆ جاساندى كەدەرگىلەرمەن جانە ەكونوميكالىق وقشاۋلانۋمەن بايلانىستى پروبلەمالاردى اتاپ ءوتتى. ونىڭ ايتۋىنشا، ەكونوميكالىق جانە ساياسي سانكسيالار ازىق-تۇلىك قاۋىپسىزدىگىن قامتاماسىز ەتۋ تىزبەگىن جويىپ، ميلليونداعان ادامدارعا، اسىرەسە قوعامنىڭ وسال توپتارىنا ءقاۋىپ توندىرەتىن «جاڭا نورماعا» اينالدى.
قازاقستان پرەزيدەنتى ءوز سوزىندە 77 جىل بۇرىن بۇۇ-نىڭ نەگىزىن قالاۋشى مەملەكەتتەر ۇيىمنىڭ جارعىسىندا وسى ۋاقىتقا دەيىن ءبىزدىڭ قىزمەتىمىزدى ءساتتى رەتتەپ كەلگەنىن حالىقارالىق قۇقىقتىڭ قاعيداتتارى مەن نورمالارىن جازىپ، بەكىتكەنىن ەسكە سالدى.
قاسىم-جومارت توقايەۆ بۇۇ نەگىزىندە جاتقان ىرگەلى پوستۋلاتتاردى ساقتاۋدىڭ ماڭىزدىلىعىنا نازار اۋداردى. اتاپ ايتقاندا، ول مەملەكەتتەر ەگەمەندىگىنىڭ تەڭدىگى، تەرريتوريالىق تۇتاستىقتى قۇرمەتتەۋ جانە مەملەكەتتەردىڭ قاتار بەيبىت ءومىر ءسۇرۋى سياقتى ءۇش نەگىزگى قاعيداتتىڭ ءوزارا بايلانىسىن قايتا قاراستىرۋ قاجەتتىگىنە توقتالدى
– بۇل ءۇش قاعيدات ءوزارا بىر-بىرىنە تاۋەلدى. وسى قاعيداتتاردىڭ ءبىرىن ساقتاۋ قالعان ەكەۋىن ۇستانۋدى بىلدىرەدى. ال ولاردىڭ ءبىرىن بۇزۋ، باسقا ەكەۋىن بۇزعان بولىپ سانالادى. ءداستۇرلى جانە يادرولىق قارۋسىزدانۋدىڭ جاھاندىق جۇيەسى السىرەگەن كەزدە اتالعان ءۇش قاعيداتقا ءقاۋىپ تونەدى. كەرىسىنشە، ءۇش قاعيداتتىڭ تۇگەل ساقتالۋى ولاردىڭ كۇشەيۋىنە ىقپال ەتەدى. بۇل قاعيداتتار بىرگە كەڭەيتىلگەن مەملەكەتارالىق ىنتىماقتاستىقتىڭ كەلەسى ءۇش دەڭگەيىنە نەگىز بولادى: سۋبوڭىرلىك، وڭىرلىك جانە جاھاندىق. بۇل ادامزات ءۇشىن پايدالى. بۇۇ اياسىندا بەكىتىلگەن قۇندىلىقتار جۇيەسى الەمنىڭ تۇكپىر-تۇكپىرىندەگى ميلليونداعان ادامعا ءۇمىت ساۋلەسى بولىپ قالا بەرەدى، – دەپ سەنىم ءبىلدىردى پرەزيدەنت.
قاسىم-جومارت توقايەۆ ىنتىماقتاستىق رۋحىنا نەگىزدەلگەن بۇۇ-نى باسشىلىققا الىپ، اتالعان قۇندىلىقتاردى باتىل قورعاۋعا شاقىردى.
