"قازارناۋلىەكسپورت" رمك باس ديرەكتورىنىڭ مىندەتىن اتقارۋشى ارشات اياعانوۆ ۇستالدى، - دەپ حابارلايدى Dalanews.kz.
قارجىلىق مونيتورينگ اگەنتتىگى 23 اقپاندا بروندالعان اسكەري تەحنيكانى جەتكىزۋ بويىنشا مەملەكەتتىك قورعانىس تاپسىرىسىن ورىنداۋ كەزىندە قىزمەتتىك وكىلەتتىكتەرىن ءوز ماقساتىنا پايدالاندى دەگەن كۇدىك بويىنشا "قازارناۋلىەكسپورت" رمك باس ديرەكتورىنىڭ مىندەتىن اتقارۋشىنى ۇستادى. اگەنتتىك تەرگەۋ ماقساتىنا ساي وزگە اقپاراتتاردى جاريا ەتپەدى.
ارشات اياعانوۆ 1988 جىلى دۇنيەگە كەلگەن. ول بىلتىر عانا "قازارناۋلىەكسپورت" رمك باس ديرەكتورىنىڭ مىندەتىن اتقارۋشى قىزمەتىنە كەلگەن ەدى.
بىلتىر قاراشادا دا قارجىلىق مونيتورينگ اگەنتتىگى باس اسكەري پروكۋراتۋرانىڭ ۇيلەستىرۋىمەن "قازارناۋلىەكسپورت" رمك لاۋازىمدى تۇلعالارى مەن باقىلاۋىنداعى زاڭدى تۇلعالاردىڭ باسشىلارىن ۇستاعان ەدى.
"ولار مەملەكەتتىك قورعانىس تاپسىرىستارىن ورىنداۋ اياسىندا باعانى كوتەرۋ ارقىلى اسكەري جانە اسكەري-تەحنيكالىق ماقساتتاعى تاۋارلاردى (ونىمدەردى) ساتىپ الۋ كەزىندە 1 ملرد تەڭگەگە جۋىق بيۋدجەت قاراجاتىن ۇرلادى دەگەن كۇدىككە ىلىنگەن.
«قازارناۋلىەكسپورت» رمك قازاقستان رەسپۋبليكاسى قارۋلى كۇشتەرىنە، باسقا دا اسكەرلەر مەن اسكەري قۇرالىمدارعا، ارناۋلى مەملەكەتتىك، قۇقىق قورعاۋ ورگاندارىنا، مەملەكەتتىك ماتەريالدىق رەزەرۆتەرگە، جۇمىلدىرۋ، عارىش قىزمەتىنە ازاماتتاردىڭ قورعانىس قابىلەتىن جانە قۇقىقتىق ءتارتىپتى ساقتاۋدا كومەك كورسەتەدى.
