جىل سايىن 1 قازان – حالىقارالىق قارتتار كۇنى، بۇل كۇن – ءومىردىڭ ءمان-ماعىناسى مەن تاعىلىمىن، دانا قارتتارىمىزدىڭ اسىل مۇراسىن، جۇرەكتىڭ جىلۋىن سەزىنەتىن ەرەكشە مەرەكە. اتا-اجەلەرىمىزدىڭ التىن تاجىريبەسىن، ومىرلىك ساباقتارىن بويىمىزعا ءسىڭىرىپ، ولاردىڭ جارقىن بەينەسىنە تاعزىم ەتۋ – ءبىز ءۇشىن ۇلكەن قۇرمەت.

وسى ورايدا، «ءبىرتۇتاس تاربيە» باعدارلاماسى اياسىندا، م.ۆ.لومونوسوۆ اتىنداعى № 38 قازاقستان-رەسەي گيمنازياسىندا ارنايى ءىس-شارالار جوسپارى ازىرلەندى. بۇل جوسپار اياسىندا وقۋشىلارعا ادامگەرشىلىك قۇندىلىقتاردى بويلارىنا دارىتىپ، اعا بۋىن وكىلدەرىنە دەگەن ءىلتيپاتتى، جاناشىر كوزقاراس قالىپتاستىرۋ ماقساتىندا ءبىرقاتار ءىس-شارالار وتكىزىلدى.

قۇرمەت پەن قامقورلىقتان تۇراتىن شارالارعا توقتالساق، ايلىق اياسىندا گيمنازياىزدىڭ ديرەكتورى گۇلجان دوسايەۆنانىڭ باستاماسىمەن جانە سىنىپ جەتەكشىلەرى «جاقسىلىق جاساۋدان جالىقپا» اتتى سىنىپ ساعاتتارىن وتكىزدى. ساباقتاردا مۇعالىمدەر بالالارعا قارتتاردىڭ ومىرلىك تاجىريبەسى، شەكسىز مەيىرىمدەرى مەن دانالىقتارى جايلى سىر شەرتتى. قوعامعا دەگەن ماحابباتپەن، ادال ەڭبەگىمەن ۇلگى بولعان قارتتارىمىزعا كومەك قولىن سوزۋدىڭ، مەيىرىمدىلىك تانىتۋدىڭ ماڭىزىن ءتۇسىندىردى. وقۋشىلار بۇل كۇنى جاقىندارىنا جىلى سوزدەر ايتۋدى، جان دۇنيەلەرىنە نۇر سەبۋدى ۇيرەندى.

التىن ۇرپاققا تاعزىم – ارداقتى پارىزدى ەسكەرە وتىرا، وتباسىلىق قۇندىلىقتاردى دارىپتەۋ ماقساتىندا، باستاۋىش سىنىپ ءمۇعالىمى سادەنوۆا بوتاگوز زاتەن قىزىنىڭ ۇيىمداستىرۋىمەن «التىن جاسقا تاعزىم» اتتى اسەرلى سىنىپتان تىس ءىس-شارا ءوتتى. ءىس-شاراعا مەكتەپ وقۋشىلارىنىڭ اجەلەرى مەن اتالارى شاقىرىلىپ، مەرەكەلىك باعدارلاما شەڭبەرىندە اندەر ايتىلىپ، بيلەر بيلەندى، ولەڭدەر وقىلىپ، اسەرلى كورىنىستەر قويىلدى. بۇل ساتتەردە اتا-اجەلەرىمىزدىڭ جۇرەكتەرىنە قۋانىش ۇيالاعانىن سەزىنىپ، ولاردىڭ جۇزدەرىنەن جىلۋ مەن مەيىرىمنىڭ بەينەسىن كورگەندەي بولدىق.                            

ونەگەلى ءومىردىڭ جارقىن بەينەلەرىنە توقتالساق، گيمنازيامىزدىڭ 7 «ز»، 5 «د»، 9 «ج» سىنىپ وقۋشىلارى مەن اتا-انالارى ەڭبەگى سىڭگەن پەداگوگيكالىق ارداگەرلەردى قۇتتىقتاپ، ولارعا شىنايى العىستارىن ءبىلدىردى. كەزدەسۋدە ارداگەر ۇستازدار وزدەرىنىڭ ءومىر جولى، قوعامعا سىڭىرگەن ەڭبەگى مەن مەكتەپ قابىرعاسىندا وتكىزگەن جىلدارى تۋرالى اڭگىمەلەپ، وقۋشىلارعا ماڭىزدى اقىل-كەڭەس بەردى. ولاردىڭ ءار ءسوزى – ومىردەن الىنعان ساباق، ۇرپاقتار ساباقتاستىعىنىڭ جارقىن مىسالى.  

الماتى قالاسى بوستاندىق اۋدانى ارداگەرلەر كەڭەسىمەن بىرلەسە وتىرىپ، اسىق اتۋ ۇلتتىق ويىنىنان اۋداندىق سپورتتىق ءىس-شارا ۇيىمداستىرىلدى. «اسىق اتۋ» – بۇل تەك ويىن عانا ەمەس، ۇلتتىق قۇندىلىقتارىمىزدى دارىپتەۋدىڭ، ۇلكەنگە قۇرمەت كورسەتۋدىڭ، بىرلىك پەن دوستىقتى نىعايتۋدىڭ كورىنىسى بولدى.    

رۋحاني مەرەكەنىڭ مەرەيلى ساتتەرى از ەمەس. قارتتار ۇيىنە بارىپ، مەرەكەلىك كونسەرت قويۋ – ءبىزدىڭ وقۋشىلار ءۇشىن ەرەكشە اسەر قالدىردى. اسەم ءان مەن ءبيدىڭ، ماعىنالى سوزدەردىڭ، اجەلەرىمىز بەن اتالارىمىزعا ارنالعان جۇرەكجاردى تىلەكتەردىڭ ءوزى ولار ءۇشىن دەمەۋ بولىپ، ولاردىڭ جانىن جادىراتتى.

سونداي-اق، باستاۋىش سىنىپ وقۋشىلارىنىڭ قولىنان شىققان «كۇز سىيلارى» اتتى بۇيىمدار كورمەسى جاسالىپ، قارتتارعا ارنالعان ازىق-تۇلىك سەبەتتەرى دايىندالدى. بۇل قاراپايىم سىيلىقتاردان وقۋشىلاردىڭ جۇرەك جىلۋى، اتا-اجەلەرىنە دەگەن سىي-قۇرمەتى بايقالىپ تۇردى.

مەكتەبىمىزدىڭ ۇيىمداستىرعان قارتتارعا ارنالعان ايلىعى – بۇل اعا ۇرپاققا دەگەن العىسىمىز بەن رۋحاني قارىم-قاتىناستى نىعايتۋعا ارنالعان سالتاناتتى مەرەكە. ءار ءىس-شارا، ءار ءسوز – مەيىرىم مەن شىنايى قۇرمەتتىڭ كورىنىسى. وسىداي ماڭىزدى ءىس-شارالار گيمنازيامىزدا جىل بويىنا ۇزدىكسىز وتكىزىلىپ وتىرادى. سەبەبى، مۇنداي ءىس-شارالاردىڭ وسكەلەن ۇرپاققا بەرەر ءتالىمى مول. 

قارتتارىمىزدىڭ ءومىر جولى – ءبىزدىڭ بولاشاققا بەرىك ىرگەتاسىمىز، جارقىن ۇلگى، ال ولاردىڭ دانالىعى – ماڭگىلىك مۇرا بولىپ قالا بەرمەك.