قازاقستاندا ونلاين-كازينو قىزمەتىنە تىيىم سالىنعان. الايدا كولەڭكەلى پلاتفورمالار بۇل تىيىمدى ەلەمەيدى – زاڭسىز بيزنەس وكىلدەرى زاڭ شەڭبەرىندە ارەكەت ەتۋگە داعدىلانباعان.

ولاردىڭ قىزمەتىن پايدالاناتىن ازاماتتار اۆتوماتتى تۇردە ەكى ەسە تاۋەكەلگە تاپ بولادى: بىرىنشىدەن، قارجىلىق شىعىنعا ۇشىراۋ، ەكىنشىدەن، ءبىر ساتتە جەكە دەرەكتەرىنەن ايىرىلىپ قالۋ ءقاۋپى بار.

سوعان قاراماستان، قازاقستاندىقتار كۇماندى سيفرلىق الاڭداردا ويناۋدى جالعاستىرۋدا. قارجىلىق مونيتورينگ اگەنتتىگىنىڭ مالىمەتىنشە، تەك «1WIN» رەسۋرسىندا مىڭداعان قازاقستاندىق ازاماتتار تىركەلگەن. بۇل ۇيىم قازاقستاندا عانا ەمەس، شەكارادان تىس جەردە دە زاڭسىز جۇمىس ىستەگەن، سونىمەن قاتار زاڭسىز بۋكمەكەرلىك قىزمەتتەر ۇسىنعان.

«1WIN» ۇيىمداستىرۋشىلارىنا تەك پايدا تابۋ عانا ماڭىزدى بولعاندىقتان، ولار ستاۆكالاردى ينتەرنەت-ەكۆايرينگ ارقىلى قابىلداپ، كامەلەت جاسىنا تولماعانداردى قۇمار ويىندارعا تارتقان. ناتيجەسىندە كولەڭكەلى اينالىم 3،8 ميلليارد تەڭگەگە جەتكەن.

«قازىرگى ۋاقىتتا «1WIN» بويىنشا تەرگەۋ جۇرگىزىلۋدە. ونلاين-كازينونىڭ ينتەرنەت-رەسۋرسى بۇعاتتالىپ، ونىڭ ءتورت قۇرىلتايشىسى – رف ازاماتى سەرگەي چەرنىح، ۋكراينا ازاماتشاسى مارينا يۋدينا جانە قازاقستان ازاماتتارى پاۆەل نەستەرەنكو مەن تۇرسىن مۋسالييەۆا حالىقارالىق ىزدەۋگە جاريالاندى»، – دەپ حابارلايدى قارجىلىق مونيتورينگ اگەنتتىگى.

سونىمەن قاتار، بۇل تۇلعالار زاڭسىز ويىن بيزنەسىن ۇيىمداستىرۋمەن قاتار، ادامداردى ەركىندىگىنەن ايىرۋ جانە ولارعا كۇش كورسەتۋ ارەكەتتەرىندە دە كۇدىككە ىلىنگەن.

ۆەدومستۆو سونىمەن بىرگە ولاردىڭ جالپى سوماسى 1،5 ميلليارد تەڭگە بولاتىن مۇلكى مەن اقشالاي قاراجاتىنا تىيىم سالىنعانىن مالىمدەدى. بۇعان قوسا، «Mercedes-Maybach S500» جانە «Lamborghini Huracan» اۆتوكولىكتەرى تاركىلەنگەن.

دەگەنمەن، زاڭسىز ارەكەتتەر توقتاتىلعانىنا قاراماستان، «1WIN» كليەنتتەرىنىڭ الدىندا جاڭا پروبلەمالار تۋىندادى. ونلاين-كازينو سايتى بۇزىلىپ، exploit.in فورۋمىندا ونىڭ كەلۋشىلەرىنىڭ مالىمەتتەرى – اتى-جوندەرى، تەلەفون نومىرلەرى، جەكە تەلەگرام-كانالدارى مەن قۇپياسوزدەرى، سونداي-اق ازىرلەۋشىلەردىڭ جەكە دەرەكتەرى مەن كازينو جۇمىسىنىڭ الگوريتمدەرى پايدا بولدى.

سوندىقتان بۇگىندە تەلەفون مەن ينتەرنەت الاياقتار تەلەفون ءنومىرىن، تۋعان كۇنىن جانە ەسىمىن بىلەتىنىنە تاڭعالۋدىڭ قاجەتى جوق. بۇل تۇستا دامىعان ەلدەردىڭ تاجىريبەسىنە سۇيەنىپ، كامەلەتكە تولماعاندار مەن نەسيە بويىنشا قارىزى بار ادامداردىڭ ويناۋىن شەكتەۋ جانە "جاۋاپتى ويىن" قاعيداتىن ەنگىزۋ ماڭىزدى.