“توقايەۆ جاڭا ءمينيستردى ءماجىلىستىڭ كەلىسىمىمەن عانا تاعايىنداي الادى. دەپۋتاتتار جازعى دەمالىستا ءجۇر. قاراشوكەيەۆتى ءاۋىلميننىڭ مىندەتىن اتقارۋشى (م.ا.) قىلىپ قويدى”، – دەيدى ول.
ساراپشى جاڭا ءمينيستردىڭ قىزمەتىن اتقاراتىن قاراشوكەەيەۆتىڭ كاسىبي بىلىكتىلىگىنە كۇمانمەن قارايدى.
“ول بۇعان دەيىن “قازاگرو-نى” باسقاردى، ۆيسە-مينيستر بولدى. شىنى كەرەك، حولدينگ ۇكىمەت كۇتكەن ۇدەدەن شىعا الماي وتىر، توقايەۆ كومپانيانىڭ جۇمىسىندا كوپتەگەن كەمشىلىكتەردى كوزگە شۇقىپ كورسەتكەن ەدى. “قازاگرو” سىننان ساباق العانعا ۇقسامايدى.
قاراشوكەيەۆ؟ ول اۋىل ومىرىنەن مۇلدە حابارسىز، اۋىل تىرشىلىگىنەن ماقۇرىم مامان. كەڭسەنىڭ ادامى”، – دەيدى اشىمبايەۆ.
ساراپشى وماروۆتى قاراشوكەيەۆكە اۋىستىرعان توقايەۆتىڭ شەشىم قابىلداردا نەگە سۇيەنگەنىن تۇسىنبەيتىنىن ايتادى. ەكس-مينيستردىڭ ورنىنا اۋىل شارۋاشىلىعىن بۇگە-شىگەسىنە دەيىن بىلەتىن، وسى سالادا ازدى-كوپتى تاجىريبەسى ماماندى تاعايىنداسا ءبىر ءجون. اينالىپ كەلگەندە، الگى تاعايىنداۋدان تۇك وزگەرمەيدى.
ءسوي دەگەن اشىمبايەۆ ءاۋىلميننىڭ قىزمەتىن ناقتى كىم اتقاراتىنى كۇزگە دەيىن بەلگىسىز كۇيدە قالادى دەپ بولجايدى.
“شىلدە مەن تامىزدى اۋىل شارۋاشىلىعىنا جاۋاپ بەرەتىن ءمينيسترسىز ءارى-سارى كۇيدە وتكەرەمىز. بيىلعى قۋاڭشىلىق پەن قىمباتشىلىقتى ەسكەرەر بولساق، ءبۇتىن ءبىر سالانىڭ باسشىسىز وتىرۋى جاعدايدى ۋشىقتىرا تۇسپەسە، جاقسارتپايدى.
بىلايشا ايتقاندا، ەگەر الداعى ۋاقىتتا اۋىل شارۋاشىلىعى سالاسىندا الدەبىر اپات بولسا، بۇعان ەشكىم جاۋاپ بەرمەيدى، ەشكىم مۇنى موينىمەن كوتەرمەيدى. وماروۆپەن قوش ايتىستىق، ونىڭ ورنىنا كەلگەن قاراشوكەيەۆ ءمينيستردىڭ "مىندەتتى اتقارۋشى" عانا.
وماروۆتى وتستاۆكاعا كەتىردىك ەكەن، ەندەشە ونىڭ ورنىنا قاۋىرت جۇمىس ىستەيتىن، جۇرتپەن جۇزدەسىپ، تىلدەسە الاتىن ادامدى وتىرعىزۋ قاجەت ەدى. بەلسەندى دەپۋتاتتار مەن ەلگەزەك اكىمدەردىڭ ءبىرىن تاعايىنداۋ قاجەت ەدى. جالپى بۇل مينيسترلىككە ەلگە تانىمال، ساياسي ساحنادا سالماعى بار تۇلعانى وتىرعىزۋ قاجەت. بيلىكتىڭ تاڭداۋى قاراشوكەيەۆكە ءتۇستى. مۇنداي تيپتەگى مامانداردىڭ ادەتتى تۇك تىندىرماسىنا كوزىمىز جەتكەن. تاجىريبەسى از ماماندى اۋىل شارۋاشىلىعىنا ماڭايلاتپاۋ قاجەت”، – دەيدى ول.
