قاراعاندى وبلىسىندا "جاستار تازا قازاقستان ءۇشىن!" ەكولوگيالىق اكسياسى باستالدى. شاراعا ءبىرىنشى بولىپ تەمىرتاۋ ەكوبەلسەندىلەرى قاتىستى.
100-دەن استام ەرىكتى، "جاسىل ەل" ەڭبەك جاساعىنىڭ جاۋىنگەرلەرى، كۆن كوماندالارىنىڭ قاتىسۋشىلارى، سپورتشىلار، سونداي-اق قحا جاستار قاناتىنىڭ وكىلدەرى "مەتاللۋرگ" قالالىق ستاديونىنىڭ اۋماعىن تازالادى. ولار باسقالارعا ۇلگى بولا وتىرىپ، ەكولوگيا ماسەلەلەرىنە نازار اۋدارىپ، تەمىرتاۋداعى قورشاعان ورتانىڭ جاي-كۇيىن جاقسارتۋدى كوزدەپ وتىر.
– ءبىزدىڭ باستى مىندەتىمىز – جاستاردى ەكولوگيالىق باستامالارعا تارتۋ جانە اۋقىمدى اكسيانى بەلسەندى قولداۋ. ستاديوندا كۇن سايىن جاتتىعۋلار، كوماندالىق ويىندار وتەدى. Street Workout-ويىن الاڭى كەشكە سپورتتىڭ كوپتەگەن جانكۇيەرلەرىن جينايدى. بۇگىن ءبىز سپورتشىلار ءدال وسى جەردى تازالاۋدى تاڭداعانىمىز دا بەكەر ەمەس. تۇرعىنداردى تازالىقتى قاداعالاپ، سپورتپەن شۇعىلدانۋعا شاقىرامىز، – دەيدى "تاۋ" سپورت كلۋبىنىڭ ەركىن كۇرەس بويىنشا جاتتىقتىرۋشى-وقىتۋشىسى ماكسيم سامسوۆ.
اكسياعا قاتىسۋشىلار سانيتارلىق تازارتۋ اۋماعىن كەڭەيتەمىز دەپ ۋادە بەردى.
– ءبىزدىڭ جاستار قوزعالىسى ءارقاشان ەكو باستامالارعا قاتىسادى. ءبىز جاستاردىڭ تازالىق پەن قورشاعان ورتانى قورعاۋعا دەگەن ۇمتىلىسى قالاي قالىپتاساتىنىن كورەمىز. ءارى قاراي، ءبىز بۇل يگى ءىستى جالعاستىرامىز! تۇرعىنداردى بىزگە قوسىلۋعا شاقىرامىز، – دەيدى تەمىرتاۋ قالاسىنىڭ جاستار رەسۋرستىق ورتالىعى ديرەكتورىنىڭ مىندەتىن اتقارۋشى رۋسلان قوجەكەنوۆ.
"جاستار تازا قازاقستان ءۇشىن!" – ءساۋىر ايىنىڭ باسىندا مەملەكەت باسشىسىنىڭ باستاماسىمەن ىسكە قوسىلعان "تازا قازاقستان" رەسپۋبليكالىق ەكولوگيالىق اكسياسىنىڭ جالعاسى. تەمىرتاۋ بويىنشا "تازا قازاقستان" اكسياسىنا 20 مىڭ تۇرعىن، 300 ۇجىم قاتىسىپ، ساياباقتار مەن گۇلزارلار تازالانىپ، 15 مىڭ توننا قتق شىعارىلدى. سونداي-اق، 5 مىڭنان استام ءتۇرلى اعاش ەگىلدى، تاريحي جانە مادەنيەت ەسكەرتكىشتەرىنىڭ اۋماقتارى جينالدى.
