10 جەلتوقساندا ۇكىمەت وتىرىسىندا ونەركاسىپ جانە قۇرىلىس ءمينيسترى قانات شارلاپايەۆ قۇرىلىس سالاسىنا قاتىستى بايانداما جاسادى. بۇگىنگى تاڭدا ونىڭ ۇلەسى ەلىمىزدىڭ جالپى ءجىو-نىڭ 5،6%-ىن قۇرايدى. سالادا 670 مىڭنان استام ادام جۇمىس ىستەيدى، 53 مىڭعا جۋىق كاسىپورىن قىزمەت ەتەدى، ونىڭ 2 903ء-ى قۇرىلىس ماتەريالدارىن وندىرەدى، دەپ جازادى Dalanews.kz.
ءمينيستردىڭ ايتۋىنشا، بيىلعى 11 ايدا قۇرىلىس جۇمىستارىنىڭ كولەمى 6،9 ترلن تەڭگەگە جەتكىزىلدى، بۇل وتكەن جىلمەن سالىستىرعاندا 10،3%-عا ارتىق. 2024 جىلدىڭ سوڭىنا دەيىن رەكوردتىق 18 ملن شارشى مەتر تۇرعىن ءۇي پايدالانۋعا بەرىلەدى دەپ كۇتىلۋدە. قاراشا ايىنىڭ قورىتىندىسى بويىنشا 16،3 ملن شارشى مەتر تاپسىرىلدى، جىل سوڭىنا دەيىن تاعى 1،7 ملن شارشى مەتر پايدالانۋعا بەرۋ جۇرگىزىلۋدە.
"سالاعا قاراجاتتى ينۆەستيسيالاۋدىڭ جوعارى كورسەتكىشتەرىنە قول جەتكىزۋ ءۇشىن مينيسترلىك تۇرعىن ءۇي قۇرىلىسىن ىنتالاندىرۋ بويىنشا بۇرىن-سوڭدى بولماعان شارالار قابىلدادى. وسى جىلى بارلىق كوزدەر ەسەبىنەن اتالعان ماقساتتارعا شامامەن 965 ملرد تەڭگە جوسپارلانعان، بۇل 160 مىڭنان استام ازاماتتىڭ 41 مىڭ جاڭا پاتەرگە قونىستانۋىن قامتاماسىز ەتەدى. مۇقتاج ازاماتتارعا قولجەتىمدى قۇرالداردى ۇسىنۋعا ەرەكشە كوڭىل بولىنەدى"، — دەدى قانات شارلاپايەۆ.
بيىل مەملەكەتتىك قولداۋ ەسەبىنەن 22 مىڭنان استام جالعا بەرىلەتىن پاتەر ساتىپ الۋعا 330 ملرد تەڭگە قاراستىرىلىپ، اكىمدىكتەرگە 305 ملرد تەڭگە اۋدارىلدى. جىل سوڭىنا دەيىن مەملەكەتتىك باعالى قاعازدار شىعارۋ ەسەبىنەن 165 ملرد تەڭگە سوماسىندا 10 مىڭنان استام پاتەردى پايدالانۋعا بەرۋ جوسپارلانعان. 2% جانە 5% بويىنشا جەڭىلدەتىلگەن يپوتەكالىق قارىزدار ەسەبىنەن بۇگىنگى كۇنى 94،5 ملرد تەڭگە سوماسىنا 7 861 قارىز بەرىلدى. تۇرعىن ءۇي قۇرىلىسى اۋداندارىنا ينجەنەرلىك جەلىلەردى تارتۋعا 83 ملرد تەڭگە ءبولىندى.
وسى جىلدىڭ مامىر ايىنان باستاپ "ناۋرىز" جاڭا تۇرعىن ءۇي باعدارلاماسى ىسكە قوسىلدى. 2024 جىلعا 300 ملرد تەڭگە سوماسىنا 12 مىڭ قارىز بەرۋ جوسپارلانۋدا. بۇگىنگى تاڭدا 172 ملرد تەڭگەگە 6 مىڭنان اسا قارىز بەرىلدى.
سونداي-اق قانات شارلاپايەۆ ۇكىمەت وتىرىسىندا قازاقستاننىڭ تۇرعىن ءۇي ساياساتىن رەفورمالاۋعا جانە قۇرىلىس سالاسىن دامىتۋعا باعىتتالعان شارالارعا دا توقتالدى.
"ماسەلەن، تۇرعىن ءۇيدى ەسەپكە قويۋ جانە ءبولۋ جونىندەگى جەرگىلىكتى اتقارۋشى ورگانداردىڭ فۋنكسيالارىن ۇلتتىق دامۋ ينستيتۋتى بولىپ قايتا قۇرىلعان وتباسى بانكىنە بەرۋدى كوزدەيتىن زاڭ قابىلداندى. تۇرعىن ءۇيدى ءبولۋ ەسەپكە قويۋ كۇنى مەن ازاماتتاردىڭ تابىس دەڭگەيى نەگىزىندە جۇزەگە اسىرىلاتىن بولادى، بۇل ءبىرىنشى كەزەكتە ۇزاق ۋاقىت كەزەكتە تۇرعانداردى تۇرعىن ۇيمەن قامتاماسىز ەتۋگە مۇمكىندىك بەرەدى. ماڭىزدى جاڭالىقتاردىڭ ءبىرى – ساتىپ الۋ قۇقىعىنسىز جالعا بەرىلەتىن تۇرعىن ءۇيدى جەكەشەلەندىرۋ قۇقىعى، بۇل 50 مىڭنان استام ادامعا اسەر ەتەدى. تۇرعىن ءۇيدى جەكەشەلەندىرۋگە قاتىستى نورمالار 4 جەلتوقساننان باستاپ كۇشىنە ەندى، ال باسقا جاڭا ەنگىزىلىمدەر 2025 جىلدىڭ مامىرىنان باستاپ كۇشىنە ەنەدى"، - دەيدى ول.
مينيستر جىل باسىندا قالا قۇرىلىسى ساراپتاماسى ينستيتۋتىن ەنگىزۋگە دە نازار اۋداردى. بۇل مەحانيزم قالا قۇرىلىسىن جوسپارلاۋ ساتىسىندا ساۋلەت نورمالارىنان اۋىتقۋلاردىڭ الدىن الۋعا، جوبالاردى بەكىتۋ كەزىندە بۇزۋشىلىقتاردى بولدىرماۋعا مۇمكىندىك بەرەدى. ەندى ولاردىڭ بارلىعى «مەمساراپتاما» رمك-دا مىندەتتى ساراپتامالىق تەكسەرۋدەن وتەدى. مۇنداي شارالار سىبايلاس جەمقورلىق تاۋەكەلدەرىن ەداۋىر تومەندەتەدى جانە باستاپقى رۇقسات بەرۋ قۇجاتتاماسىن بەرۋ كەزىندە ادامي فاكتوردىڭ ىقپالىن بولدىرماۋعا كومەكتەسەدى.
