ساپار بارىسىندا قانات بوزىمبايەۆ وتەگەن باتىر اۋىلىنداعى سەرۆيستىك اكىمدىك عيماراتىنىڭ حالىققا قىزمەت كورسەتۋ مۇمكىندىكتەرىمەن تانىستى. قوسوزەن اۋىلىندا بيىلعى وقۋ جىلىندا قولدانىسقا بەرىلگەن №50 ورتا مەكتەپتى دە ارالاپ كوردى. مۇندا جالپى سانى 630 بالا وقيدى، سونىڭ 300-دەيى اۋىل ماڭىنداعى 12 ساياجايدان كەلىپ ءبىلىم الادى. مەكتەپتە بالالارعا ساپالى ءبىلىم بەرۋگە بارلىق جاعداي جاسالعان.
سول سياقتى قانات الدابەرگەن ۇلى تولىق ىسكە قوسىلعاندا 84،8 ملرد. تەڭگە ينۆەستيسيا تارتىلىپ، 1 مىڭ تۇراقتى جۇمىس ورنىن اشاتىن «سوكول» سپورتتىق تەحنيكالىق كەشەنىندە دە بولدى.
وتەگەن باتىر اۋىلىنداعى اللەياعا اتباسىن تىرەپ، مۇندا ەلدى مەكەندى اباتتاندىرۋ جوسپارىمەن تانىستى. اۋدان اكىمى باعدات قاراسايەۆ تۇرعىن ۇيلەردىڭ اۋلالارى مەن بالالار ويىن الاڭدارىن اباتتاندىرۋدىڭ ەسكيزدىك جوبالارى، كوپ قاباتتى ۇيلەردىڭ قاسبەتتەرى مەن شاتىرلارىن جوندەۋ جۇمىستارى جايلى ايتىپ بەردى. ياعني وسى اللەيانىڭ بويىنداعى ۇيلەردىڭ قاسبەتتەرى ءبىر ساۋلەتتىك كەلبەتكە كەلتىرىلەدى. سول سياقتى كوپ پاتەرلى ءۇش ءۇي مەن 100 كوتتەدجدىڭ، اۋداندىق مادەنيەت ءۇيى مەن سپورت كەشەنىنىڭ جوبالارى تانىستىرىلدى.
اۋدان اكىمى ىلە وڭىرىندەگى ساياجايلاردىڭ ينفراقۇرىلىمدىق ماسەلەلەرىن شەشۋدىڭ جوسپار-جوبالارىنا جەكە توقتالدى. ونىڭ ايتۋىنشا، بيىلعى جىلى 234 ملن. تەڭگەگە 18 ساياجاي بىرلەستىگىنە اپاراتىن 6،9 كم جول جاسالعان. «جومارت» جانە «چەرەمۋشكي» ساياجايلارىنا اۋىز سۋ جانە ەلەكترمەن قامتۋ جۇيەلەرىن كۇردەلى جوندەۋدىڭ جوبالىق-سمەتالىق قۇجاتتارى دايىندالۋدا.
بۇل ماسەلەگە وبلىس اكىمى قانات بوزىمبايەۆ اۋدان اكتيۆىمەن كەزدەسۋىندە ەرەكشە ءمان بەرىپ، جيىن بارىسىندا كەلەلى پروبلەمالاردى تالقىلادى. جانە ەڭ باستى مىندەت – پرەزيدەنتتىڭ حالىققا جولداۋىنان تۋىندايتىن مىندەتتەر مەن مەملەكەتتىك باعدارلامالاردى ناتيجەلى ورىنداۋ ەكەنىن اتاپ ءوتتى.
الدىمەن اۋدان اكىمى باعدات قاراسايەۆ ءوڭىردىڭ 10 ايداعى دامۋ كورسەتكىشتەرى مەن الداعى مىندەتتەر جايلى بايانداما جاسادى. بۇدان سوڭ وبلىس اكىمى قانات بوزىمبايەۆ ازىق-تۇلىك ءوندىرىسىنىڭ تومەندەۋىنە جول بەرمەۋ، مەديسينا ماماندارىنىڭ جەتىسپەۋشىلىگىن بولدىرماۋ ءۇشىن شارالار قابىلداۋ، مەملەكەتتىك باعدارلامالار شەڭبەرىندە تۇرعىن ۇيمەن قامتاماسىز ەتۋ ارقىلى ءۇي كەزەگىندەگىلەر سانىن ازايتۋ، ساياجايلارداعى الەۋمەتتىك ماسەلەلەردى شەشۋ سياقتى ءبىرقاتار پروبلەمالارعا قاتىستى اۋدان اكىمى ورىنباسارلارىنىڭ جاۋابىن تىڭدادى.
– ىلە اۋدانى – ىرگەلى اۋدان. مۇندا 310 مىڭعا جۋىق ادام تۇرادى. سونىڭ 60 مىڭنان استامى - ساياجاي تۇرعىندارى. ساياجايدا تۇراتىن ادامدارعا قولايلى ءومىر ءسۇرۋ جاعدايىن جاساۋىمىز كەرەك. ول ءۇشىن 3-4 جىلعا ارنالعان ستراتەگيالىق جوسپار بولۋى كەرەك. وندا ءاربىر ساياجاي ءماسسيۆىن گاز، سۋ، ەلەكتر جارىعى، جول سياقتى ينفراقۇرىلىممەن قامتۋ، الەۋمەتتىك نىساندار سالۋ – بارلىعى دا قامتىلۋى كەرەك. ساياجاي ماسسيۆتەرىندە تۇراتىن ازاماتتاردىڭ ماسەلەلەرىن شەشۋ جەرگىلىكتى اتقارۋشى ورگاننىڭ ماڭىزدى باسىمدىعى بولۋى ءتيىس، – دەدى قانات بوزىمبايەۆ.
سونىمەن قاتار اۋدانعا ينۆەستورلاردى كوپتەپ تارتۋ كەرەكتىگىن ەسكەرتتى. بۇل ورايدا بيزنەستىڭ الەۋمەتتىك جاۋاپكەرشىلىگى الدىڭعى ورىندا تۇرۋى ءتيىس.
جيىن بارىسىندا وبلىس باسشىسى قانات بوزىمبايەۆ اۋدان اكىمدىگىنىڭ الدىنا حالىقتىڭ ءال-اۋقاتىن ارتتىرۋ باعىتىنداعى باسقا دا ماڭىزدى مىندەتتەر قويدى.
ءۇش اۋىسىمدى مەكتەپتەردى جويۋ ءۇشىن ۇسىنىستار ەنگىزىلىپ، بۇل ىستە مەملەكەتتىك-جەكەمەنشىك ارىپتەستىك تەتىگىنىڭ مۇمكىندىكتەرىن كەڭىنەن پايدالانۋ قاجەت. جاڭا جۇمىس ورىندارىن قۇرۋدى شيراتۋ، قايتا وڭدەيتىن وندىرىستەر اشۋدى جانداندىرۋ، كوروناۆيرۋستىق ينفەكسيانىڭ تارالۋىنىڭ الدىن الۋ، الەۋمەتتىك ءمانى بار ازىق-تۇلىك باعاسىنىڭ كوتەرىلۋىنە جول بەرمەۋ، جاستار مەن بالالاردىڭ بوس ۋاقىتىن ءتيىمدى وتكىزۋگە جاعداي جاساۋ تاپسىرىلدى. سول سياقتى الماتى قالاسى مەن ىلە اۋدانى اراسىنداعى جولاۋشى كولىگى قاتىناسى جانە جولاقى تولەمىندەگى جەڭىلدىكتەر ماسەلەسىنە قاتىستى تۋىنداعان قيىندىقتاردى الداعى ۋاقىتتا قالا باسشىلىعىمەن كەزدەسىپ، تالقىلايتىنىن ايتتى.
