بۇگىنگى تاڭدا الاتاۋدا تۋريزم، لوگيستيكا، ونەركاسىپ، ءبىلىم بەرۋ جانە بيزنەس سالالارىندا 11 جوبا ازىرلەنۋدە. قالا اۋماعىندا ءىرى ينۆەستيسيالىق جوبالار جوسپارلانعان جانە ولاردى ورنالاستىرۋ بويىنشا الدىن الا كەلىسىمدەر ينجەنەرلىك قۇرىلىستار مەن قورعانىس ايماقتارىن ەسكەرە وتىرىپ جاسالعان. سانيتارلىق ايماقتارعا، وندىرىستىك الاڭداردى ءتيىمدى پايدالانۋعا جانە قورشاعان ورتاعا اسەر ەتۋىنە بايلانىستى قالانىڭ اۋماعىن جوسپارلاۋدا تۇزەتۋلەر ەنگىزۋ قاراستىرىلعان.

وسىعان بايلانىستى، ۆيسە-پرەمەر بيزنەس وكىلدەرىمەن، جوبالاۋ ينستيتۋتتارىمەن كەزدەسىپ، قالانىڭ باس جوسپارىنا وزگەرىستەر ەنگىزۋ جونىندەگى ۇسىنىستاردى تىڭدادى.

- جاڭا الاتاۋ قالاسىن سالۋ ىڭعايلى، ءقاۋىپسىز، تەحنولوگيالىق تۇرعىدا دامىعان جانە ەكولوگيالىق تازا بولۋى كەرەك. الاتاۋ زاماناۋي ۋربانيستىك ورتالىقتىڭ ۇلگىسى بولا الادى. قالا قۇرىلىسىنىڭ حالىقارالىق ستاندارتتارعا نەگىزدەلگەن زاماناۋي بولۋىن قامتاماسىز ەتۋ قاجەت.

ءبىر اي ىشىندە ينۆەستورلارمەن جاسالعان كەلىسىمدەرگە سايكەس قالا اۋماعىندا ينۆەستيسيالىق جوبالاردى ورنالاستىرۋ ماسەلەلەرىن قايتا قاراۋدى تاپسىردىم. بارلىق ءپروفيلدى مينيسترلىكتەر پروسەستى جەدەلدەتىپ، مامىر ايىنا دەيىن باس جوسپارعا وزگەرىستەر ەنگىزسىن، - دەدى قانات بوزىمبايەۆ.

ودان كەيىن الاتاۋدا جوبا كەڭسەسىنىڭ وتىرىسى ءوتتى، وعان ۇلتتىق ەكونوميكا، ادىلەت، اۋىل شارۋاشىلىعى، كولىك، قۇرىلىس جانە ينفراقۇرىلىم، ەڭبەك جانە حالىقتى الەۋمەتتىك قورعاۋ ۆيسە-مينيسترلەرى قاتىستى.

قاتىسۋشىلار EPC شارتتارى مەن قۇرىلىستى سالۋعا كەتەتىن قارجىلاندىرۋ قۇرالدارىن قولدانۋ مەحانيزمدەرىن ەنگىزۋ جۇمىستارى تۋرالى ەسەپ بەردى. اۋىل شارۋاشىلىعى ماقساتىنداعى جەرلەر، سونداي-اق اۋە تاكسيى ءۇشىن ەكسپەريمەنتتىك ورتا مەن الاڭدى بەلگىلەۋ ماسەلەلەرى قاراستىرىلدى.

قالانى تارتىمدى ەتىپ جاساۋ جانە كادرلىق الەۋەتتى نىعايتۋ ماقساتىندا الاتاۋ قالاسى ماماندارى ءۇشىن يپوتەكالىق كرەديت بەرۋ ءليميتىن ۇلعايتۋ ۇسىنىلدى.

ەسكە سالا كەتەيىك، 2024 جىلدان باستاپ الماتى وبلىسىنىڭ اكىمدىگى مەن «وتباسى بانك» اق بىرلەسىپ 35 جاسقا دەيىنگى جاستار ءۇشىن «الماتى جاستارى» جەڭىلدەتىلگەن يپوتەكالىق كرەديت بەرۋ باعدارلاماسىن ىسكە قوستى. بۇل باعدارلاماعا وتكەن جىلى جەرگىلىكتى بيۋدجەتتەن 500 ملن تەڭگە ءبولىنىپ، تاعى 500 ملن تەڭگە بانك تاراپىنان قارجىلاندىرىلدى.

بۇل 55 وتباسىنىڭ تۇرعىن ۇيمەن قامتاماسىز ەتىلۋىنە مۇمكىندىك بەردى. قازىرگى ۋاقىتتا 38 ۇمىتكەر ءوز پاتەرلەرىنىڭ كىلتتەرىن الدى.

وتكەن جوبالاۋ كەڭسەسىنىڭ قورىتىندىسى بويىنشا قانات بوزىمبايەۆ مەملەكەتتىك ورگاندارعا اتقارىلاتىن جۇمىستىڭ كولەمى تۋرالى ەسكەرتىپ، مينيسترلىكتەر مەن اكىمدىكتەردىڭ لاۋازىمدى تۇلعالارىنىڭ تاپسىرمالاردى ۋاقىتىندا ورىنداماۋىنا جەكە جاۋاپكەرشىلىك جۇكتەيتىنىن ەسكە سالدى.