الماتىدا كوپشىلىككە “قازاقتىڭ روبين گۋدى” دەگەن اتپەن تانىلعان “ەلگە كومەك” قورىنىڭ باسشىسى ءىلياس سارييەۆكە قاتىستى سوت وتىرىسى وتۋدە. تەرگەۋ دەرەكتەرىنە سۇيەنسەك، ول قاجىلىق پەن ۋمرا ساپارىنا جينالعان اقشانى قۇمار ويىندارعا جۇمساعان، دەپ حابارلايدى Dalanews.kz Politico.kz-كە سىلتەمە جاساپ.
بارىسىندا MM Travel تۋريستىك كومپانياسىنىڭ باسشىسى اقتوتى دۇيسەيەۆا بۇرىن كوپشىلىككە بەيمالىم جايتتاردىڭ بەتىن اشتى. ونىڭ ايتۋىنشا، ءىلياس سارييەۆ بۇعان دەيىن "كومپانياعا قاتىسىم جوق، تەك جارناما جاسادىم" دەگەنىمەن، شىن مانىندە ولار 2023 جىلى سەرىكتەس رەتىندە بىرگە كومپانيا قۇرعان. قۇجات جۇزىندە كومپانيا دۇيسەيەۆا اتىنا تىركەلسە دە، بارلىق قارجى مەن كاسسا سارييەۆتىڭ باقىلاۋىندا بولعان.
“قاجىلىققا جينالعان اقشانى ءىلياس قولما-قول الىپ، ورنىنا قويمادى. سونىڭ سالدارىنان 20 ادام قاسيەتتى ساپارعا بارا الماي قالدى”، — دەدى دۇيسەيەۆا سوتتا.
ونىڭ سوزىنشە، سارييەۆ قاجىلاردىڭ اقشاسىن پايدالانعان سوڭ “ءبىر اپتادا قايتارامىن” دەپ ۋادە بەرگەن، ءبىراق ورىنداماعان. كەيىن ونىڭ تەلەفون قوسىمشاسىنان بۋكمەكەرلىك پلاتفورمالارعا ءىرى سومالار اۋدارعانى انىقتالعان.
“تەلەفونداعى بانك قوسىمشاسىندا بىرنەشە بۋكمەكەرگە جىبەرىلگەن اقشالار تۇردى. سول كەزدە كومپانيا داعدارىسقا ۇشىراپ، قاجىلىققا بارماق بولعاندار نارازىلىق تانىتىپ جاتقان. ءبىراق ءىلياس ءبارىن ءوزىم شەشەمىن دەپ سەندىردى”، — دەيدى ول.
تەرگەۋ دەرەكتەرى بويىنشا، سارييەۆ بۇعان دەيىن دە “ەلگە كومەك” قورى ارقىلى حالىقتان اۋرۋ ادامدار مەن باسپاناسىز جاندارعا كومەك بەرەمىن دەپ قارجى جيناعان. الايدا ۋادە ەتىلگەن كومەك كورسەتىلمەي، ادامدار قارجىسىنان دا، سەنىمىنەن دە ايىرىلعان. بۇل باعىتتا التى ادامنىڭ شاعىمى تىركەلىپ، ءىس ماتەريالدارىنا ەنگىزىلگەن.
سونداي-اق كۋاگەردىڭ ايتۋىنشا، ءىلياس سارييەۆ 2015 جىلدان بەرى قۇمار ويىنعا اۋەس بولىپ، كەيىن “بۇل ادەتتەن ارىلدىم” دەپ سەندىرگەن. ءبىراق سوڭعى وقيعالار ونىڭ ادەتتەن تولىق ارىلماعانىن كورسەتىپ وتىر.
MM Travel ءىسى بويىنشا 20 ادام زارداپ شەككەن. اقتوتى دۇيسەيەۆا ءوز كىناسىن ءىشىنارا مويىنداپ، جابىرلەنۋشىلەردىڭ شىعىنىن جارتى جىل ىشىندە وتەۋگە ۋادە بەردى.
ءقازىر ءىلياس سارييەۆ پەن اقتوتى دۇيسەيەۆاعا ق ر قىلمىستىق كودەكسىنىڭ 190-بابى (“الاياقتىق”) بويىنشا ايىپ تاعىلعان.
ءبىر كەزدەرى ەلگە قامقور، ءادىل ءارى مەيىرىمدى ازامات رەتىندە تانىلعان ءىلياس سارييەۆتىڭ بۇل قىلىعى قوعامدا ۇلكەن رەزونانس پەن اشۋ-ىزا تۋعىزدى. سوت پروسەسى جۇرت نازارىندا ءوتىپ جاتىر.
كەلەسى سوت وتىرىسى 16 قازانعا جوسپارلانعان.
