تۇركىستان وبلىسىنىڭ اكىمى پرەزيدەنتكە كوروناۆيرۋستىڭ تارالۋى بويىنشا ءوڭىردىڭ قازىرگى تاڭدا «جاسىل» ايماقتا ەكەنىن جانە 35 مىڭ تۇرعىننىڭ ۆاكسينا العانىن باياندادى.
قاسىم-جومارت توقايەۆقا جاڭا ساۋران اۋدانىن قۇرۋ جۇمىستارىنىڭ بارىسى تۋرالى مالىمەت بەرىلدى. ءومىرزاق شوكەيەۆتىڭ ايتۋىنشا، ءقازىر جاڭا اكىمدىكتىڭ باسقارۋ جۇيەسى مەن بيۋدجەتى بەكىتىلۋدە. جۋىق ارادا قۇقىق قورعاۋ ورگاندارى مەن مينيسترلىكتەردىڭ جەرگىلىكتى بولىمشەلەرى جۇمىس ىستەي باستايدى. جاڭادان قۇرىلىپ جاتقان اۋداننىڭ حالقى 100 مىڭنان اسادى، جالپى اۋماعى 650 مىڭ گەكتارعا جۋىق. اۋداننىڭ اكىمشىلىك ورتالىعى شورناق اۋىلى.
سونىمەن قاتار اڭگىمەلەسۋ بارىسىندا ەلەكتر قۋاتىنىڭ اپاتتىق جاعدايدا سونۋىنەن بولعان زارداپتاردى قالپىنا كەلتىرۋ، كوكتەمگى سۋ تاسقىنىنىڭ الدىن الۋ جانە ەگىس ناۋقانىنا سۋدىڭ جەتىسپەۋشىلىگى پروبلەماسىن شەشۋ ماسەلەلەرىنە باسا ءمان بەرىلدى.
مەملەكەت باسشىسى وبلىس اكىمىنە وڭىردەگى سانيتارلىق-ەپيدەميولوگيالىق احۋالدى تۇراقتاندىرۋعا جانە ازاماتتاردى ۆاكسينالاۋ جۇمىستارىن جانداندىرۋعا قاتىستى ءبىرقاتار ناقتى تاپسىرما بەردى.
