بۇگىن «اقتاۋ – تۇركى الەمىنىڭ 2025 جىلعى مادەني استاناسى» جىلىنىڭ اشىلۋ سالتاناتى ءوتتى. ايتۋلى ءىس-شاراعا وراي قازاقستان پرەزيدەنتى قاسىم-جومارت توقايەۆ ارنايى قۇتتىقتاۋ حاتىن جولدادى، – دەپ حابارلايدى Ertenmedia.kz.
مەملەكەت باسشىسىنىڭ قۇتتىقتاۋىن ق ر مادەنيەت جانە اقپارات ءمينيسترى ايدا بالايەۆا وقىپ بەردى.
پرەزيدەنت ءوزىنىڭ قۇتتىقتاۋ حاتىندا اقتاۋ قالاسىنىڭ تۇركى الەمىنىڭ مادەني استاناسى اتانۋىن ەلىمىز ءۇشىن عانا ەمەس، بارلىق باۋىرلاس تۇركى مەملەكەتتەرى ءۇشىن ماڭىزدى وقيعا رەتىندە اتاپ ءوتتى.
«شەجىرەلى ماڭعىستاۋ، قازىنالى ءۇستىرت ايماعى تۇتاس تۇركى وركەنيەتىنىڭ اجىراماس بولىگى سانالادى. كيەلى ولكەدە ۇلتىمىزدىڭ، جالپى تۇركى دۇنيەسىنىڭ سان عاسىرلىق رۋحاني مۇراسى ساقتالعان. تاريحى تامىرلاس، ءداستۇرى ساباقتاس حالىقتاردىڭ ىنتىماقتاستىعىن ودان ءارى نىعايتۋ – بارشامىزدىڭ ورتاق مىندەتىمىز. وسى اتاۋلى جىلدا باۋىرلاستىعىمىزدى بەكەمدەي تۇسەتىن باسقوسۋلار ۇيىمداستىرىلىپ، ماڭىزدى شەشىمدەر قابىلدانادى دەپ سەنەمىن. تۇركى مەملەكەتتەرىنىڭ ىقپالداستىعىن ارتتىرۋعا زور ۇلەس قوسىپ جۇرگەن تۇركسوي ۇيىمىنا جانە وسى ءىس-شارانى ۇيىمداستىرۋشىلارعا شىنايى ريزاشىلىعىمدى بىلدىرەمىن. ءتۇبى ءبىر تۇركى جۇرتىنىڭ بىرلىگى نىعايا بەرسىن!» – دەلىنگەن حاتتا.
ايتا كەتەيىك، سالتاناتتى جيىنعا ازەربايجان، قىرعىزستان، تۇركيا، وزبەكستان، تۇركىمەنستان، ۆەنگريا ەلدەرىنەن مارتەبەلى مەيماندار قاتىستى.
قارت كاسپيي جاعالاۋىندا وتكەن اۋقىمدى ءىس-شاراعا ايماق تۇرعىندارى مەن قازاقستاننىڭ وزگە وڭىرلەرىنەن،شەتەلدەن كەلگەن قوناقتاردى قوساالعاندا 30 مىڭداي كورەرمەن جينالدى.
سالتاناتتى شارانىڭ باستى نىساندارىنىڭ ءبىرى – «دارحان دالا» ەتنوقالاشىعى. بۇل – قازاقتىڭ ءداستۇرىن، كيەلى ماڭعىستاۋ مۇراسىن جانە تۇركىحالىقتارىنىڭ تاريحىن كەڭىنەن ناسيحاتتاۋعا ارنالعان بىرەگەي مادەني كەڭىستىك.
ەسكە سالا كەتەيىك، ازەربايجاندا وتكەن تۇركسوي-عا مۇشە مەملەكەتتەردىڭ 40-سەسسياسىندا اقتاۋ قالاسىنا تۇركى الەمىنىڭ 2025 جىلعى مادەني استاناسى مارتەبەسىن بەرۋ تۋرالى شەشىم قابىلدانعان بولاتىن. اتاۋلى جىل كولەمىندە تۇركى مادەنيەتىنىڭ رۋحىن تەرەڭ سەزىنۋگە مۇمكىندىك بەرەتىن ءتۇرلى فەستيۆالدەر، كونسەرتتەر، كورمەلەرمەن تەاتر قويىلىمدار جوسپارلانعان.
سونداي-اق، تۇركسوي اياسىنداعى اتاۋلى جىلدار شەڭبەرىندە 2025 جىل قازاقستاننىڭ حالىق ءارتىسى، ۇلى كومپوزيتور جانە ءديريجور نۇرعيسا تىلەندييەۆ جىلى دەپ جاريالاندى.
