ۇلتتىق ەكونوميكا مينيسترلىگى مەن سالالىق مەملەكەتتىك ورگاندار كوممۋنالدىق قىزمەتتەر تاريفتەرى مەن باعالارىنىڭ نەگىزسىز ءوسۋىن باقىلاۋى ءتيىس. بۇل تۋرالى پرەمەر-مينيستر ولجاس بەكتەنوۆ ۇكىمەت وتىرىسى بارىسىندا ايتتى، دەپ حابارلايدى Dalanews.kz.
كابمين مۇشەلەرى الدىندا سويلەگەن بەكتەنوۆ قاراشا ايىندا جىلدىق ينفلياسيا 8،4 پايىزعا دەيىن باياۋلاعانىن ەسكە سالدى. پرەمەر-مينيستر ينفلياسيا دەڭگەيىن باقىلاۋ جانە تومەندەتۋ بويىنشا شارالار جوسپارىن ورىنداۋ ءۇشىن قاجەتتى بارلىق جۇمىستى اتقارۋدى تاپسىردى.
«باعالار ماسەلەسىنىڭ الەۋمەتتىك ماڭىزدىلىعىن ەسكەرە وتىرىپ، ونى قاتاڭ باقىلاۋدا ۇستاۋدى سۇرايمىن. ەگەر وڭىرلەر ءتيىستى شارالاردى قابىلداماسا، سەرىك ماكاش ۇلى جۇمانعارينگە (پرەمەر-مينيستردىڭ ورىنباسارى – رەد.) ماعان جەدەل تۇردە بايانداپ وتىرۋدى تاپسىرامىن. بۇل جۇمىستا بار مەحانيزمدەردى بەلسەندى پايدالانۋ قاجەت: تۇراقتاندىرۋ قورلارى، فورۆاردتىق كەلىسىمشارتتار، سۋبسيديالاۋ. بۇدان بولەك، يمپورتقا تاۋەلدى ءونىم ءوندىرىسىن كەڭەيتۋ كەرەك. ينفلياسيا دەڭگەيىن باقىلاۋ جانە تومەندەتۋ شارالارى جوسپارىن ورىنداۋ ءۇشىن بارلىق قاجەتتى شارالاردى قابىلداعان ءجون. ءبىز ەكونوميكا ءوسىمىنىڭ وڭ ديناميكاسىن ساقتاپ قالۋىمىز قاجەت. مينيسترلەر مەن اكىمدەرگە بولىنگەن قاراجاتتىڭ تولىق ءارى ۋاقتىلى يگەرىلۋىن ەرەكشە باقىلاۋعا الۋدى تاپسىرامىن»، – دەدى بەكتەنوۆ.
سونىمەن قاتار، پرەمەر-مينيستر سالالىق مينيسترلىكتەر مەن وڭىرلەرگە «ينۆەستيسياعا ايىرباس تاريف» باعدارلاماسىن ءتيىستى دەڭگەيدە ىسكە اسىرۋدى قامتاماسىز ەتۋدى تاپسىردى.
«تاريفتىك ساياساتتى تەڭگەرىمدى تۇردە جالعاستىرۋ دا ماڭىزدى، سەبەبى ول تۇتىنۋشىلىق نارىقتارداعى باعالاردىڭ وسۋىنە اسەر ەتەدى. ۇلتتىق ەكونوميكا مينيسترلىگى مەن سالالىق مەملەكەتتىك ورگاندار ەكونوميكالىق جانە الەۋمەتتىك قۇرامداس اراسىنداعى تەپە-تەڭدىكتى ساقتاي وتىرىپ، كوممۋنالدىق قىزمەتتەر تاريفتەرى مەن باعالارىنىڭ نەگىزسىز ءوسۋىن باقىلاۋى ءتيىس. ەكونوميكالىق ساياسات جونىندەگى كەڭەس بەلگىلەگەن تاريفتەر مەن رەتتەلەتىن قىزمەتتەر باعالارىنىڭ ينفلياسياعا مينيمالدى اسەر ەتۋىن قامتاماسىز ەتۋدى تاپسىرامىن»، – دەپ قورىتىندىلادى ولجاس بەكتەنوۆ.
