ەندى ولار زاڭ الدىندا لايىقتى جازاسىن الاتىن بولدى. بۇل جاعداي ءۇي ىشىنەن ءۇي تىگۋگە ۇمتىلعان وزگە كوللابورانتتارعا ساباق بولارى ءسوزسىز.
ەستەرىڭىزدە بولار، الگى كوللابورانتتار 19 ناۋرىزدا پەتروپاۆلداعى كوللەدجدەردىڭ بىرىندە جيىن وتكىزىپ، الدىن الا جازىپ، دايىنداپ العان «سولتۇستىك قازاقستان وبلىسى پەتروپاۆل قالاسى ەڭبەككەرلەرىنىڭ حالىقتىق كەڭەسىنىڭ» دەكلاراسياسىن جاريالاپ، ايدى اسپاننان شىعارعان بولاتىن.
مەملەكەتتىگىمىزدى مانسۇقتايتىن الگى «قۇجاتتا» قازاقستان رەسپۋبليكاسىنىڭ قۇرىلۋىنا كۇمانمەن قاراپ، ءتىپتى ونى الاياقتىق اركەت دەپ باعالايتىنىن بىلگەندە تالايدىڭ تالاعى تارس ايىرىلعان ەدى.
وسىدان كەيىن ءبىر كەبىستى، ءبىر كەبىسكە تىققان سەپاراتيستەرمەن قۇقىق قورعاۋ ورگاندارى شىنداپ اينالىسا باستادى.
بىزگە جەتكەن مالىمەت بويىنشا قوڭىرسىتىپ اڭگىمە ايتىپ، تاۋەلسىزدىگىمىزدى مانسۇقتاعانداردىڭ سانى تورتەۋ. ءتىپتى، كوللابورانتتىڭ بىرەۋى ۇيىندە زاڭسىز قارۋ ساقتاعانى دا اشكەرە بولدى. دەمەك، ولار قاندايدا ءبىر ىسكە ءتاس-تۇيىن بەكىنگەنى انىق.
كوللابورانتتار كوللەدجدە توبە كورسەتىپ، اشىق مايدانعا شىققاننان كەيىن ولار قۇقىق قورعاۋ ورگاندارىنىڭ نازارىنا ىلىككەنى بەلگىلى.
بۇل ءىستى تەرگەپ-تەكسەرۋ بارىسىندا سەپاراتيستەردىڭ ءبىر كۇندە پايدا بولىپ، ايگىلى «ۇندەۋلەرىن» ءبىر ساتتە جاساماعانى ءمالىم بولدى. ارنامىزعا جەتكەن مالىمەت بويىنشا، ولار 2021 جىلدىڭ كۇزىنەن باستاپ، وزدەرىنىڭ سەپاراتيستتىك ارەكەتتەرىن بەلسەندى جۇرگىزە باستاعان.
ايتالىق، ۆياچەسلاۆ زۋدەرمان ەسىمدى كوللابورانتتىڭ نۇسقاۋىمەن «نارودنىي دوزور. پەتروپاۆلوۆسك»، «نارودنىي سوۆەت. سكو، پەتروپاۆلوۆسك»، «نارودنىي سوۆەت. پەتروپاۆلوۆسك، سكو» دەگەن تەلەگرام ارنالار قۇرىلىپ، وعان وزگە بەلسەندىلەر ەلەنا بولدىريەۆا، مادينا كاپاروۆا، ولگا بەرەجنوۆالار قاتىسىپ، ەلىمىزدىڭ تاۋەلسىزدىگىن جويۋعا باعىتتاعان، كونستيتۋتسيامىزعا قارسى اقپاراتتاردى اشىق جاريالاي باستاعان.
ال سەپاراتيستتىك ارەكەتتىڭ كۋلميناسياسى بيىل 23 ناۋرىزدا ورىن الدى. ولار وزدەرىنىڭ "دەكلاراسياسىنىڭ" حاتتاماسى مەن ۆيدەوجازباسىن ينستاگرام پاراقشاسىنا جاريالاعان بولاتىن. ەندى كوللابورانتتاردىڭ سول ارەكەتى وزدەرىنىڭ باسىنا تاياق بولىپ ءتيدى.
ولار بۇل ارەكەتتەرى ءۇشىن جازاسىز قالامىز دەپ ويلاسا كەرەك. ءبىراق جاڭا قازاقستان سەپاراتيستتىك ارەكەتكە جول بەرگەن 4 كوللابورانتتى لايىقتى جازاعا تارتتى.
بۇگىن پەتروپاۆل قالالىق سوتى سەپاراتيستتىك ارەكەتكە ۇيىتقى بولعان ۆياچەسلاۆ زۋدەرمان 9 جىلعا، قالعان ۇشەۋىن 7 جىلعا باس بوستاندىعىنان ايىرۋ تۋراسىندا شەشىم شىعاردى. ەندىگى جەردە رەسەيگە قاراپ ۇليتىندار قازاقستاننىڭ تۇتاستىعىنا قاتىستى اڭگىمە ايتقاندا ابايلاپ سويلەيتىن بولادى.
