Endi olar zań aldynda laiyqty jazasyn alatyn boldy. Bul jaǵdai úi ishinen úi tigýge umtylǵan ózge kollaboranttarǵa sabaq bolary sózsiz.
Esterińizde bolar, álgi kollaboranttar 19 naýryzda Petropavldaǵy kolledjderdiń birinde jiyn ótkizip, aldyn ala jazyp, daiyndap alǵan «Soltústik Qazaqstan oblysy Petropavl qalasy eńbekkerleriniń halyqtyq keńesiniń» deklaratsiiasyn jariialap, aidy aspannan shyǵarǵan bolatyn.
Memlekettigimizdi mansuqtaityn álgi «qujatta» Qazaqstan Respýblikasynyń qurylýyna kúmánmen qarap, tipti ony alaiaqtyq árket dep baǵalaitynyn bilgende talaidyń talaǵy tars aiyrylǵan edi.
Osydan keiin bir kebisti, bir kebiske tyqqan separatistermen quqyq qorǵaý organdary shyndap ainalysa bastady.
Bizge jetken málimet boiynsha qońyrsytyp áńgime aityp, táýelsizdigimizdi mansuqtaǵandardyń sany tórteý. Tipti, kollaboranttyń bireýi úiinde zańsyz qarý saqtaǵany da áshkere boldy. Demek, olar qandaida bir iske tas-túiin bekingeni anyq.
Kollaboranttar kolledjde tóbe kórsetip, ashyq maidanǵa shyqqannan keiin olar quqyq qorǵaý organdarynyń nazaryna ilikkeni belgili.
Bul isti tergep-tekserý barysynda separatisterdiń bir kúnde paida bolyp, áigili «úndeýlerin» bir sátte jasamaǵany málim boldy. Arnamyzǵa jetken málimet boiynsha, olar 2021 jyldyń kúzinen bastap, ózderiniń separatisttik áreketterin belsendi júrgize bastaǵan.
Aitalyq, Viacheslav Zýderman esimdi kollaboranttyń nusqaýymen «Narodnyi Dozor. Petropavlovsk», «Narodnyi Sovet. SKO, Petropavlovsk», «Narodnyi Sovet. Petropavlovsk, SKO» degen Telegram arnalar qurylyp, oǵan ózge belsendiler Elena Boldyreva, Madina Kaparova, Olga Berejnovalar qatysyp, elimizdiń táýelsizdigin joiýǵa baǵyttaǵan, Konstitýttsiiamyzǵa qarsy aqparattardy ashyq jariialai bastaǵan.
Al separatisttik árekettiń kýlminatsiiasy biyl 23 naýryzda oryn aldy. Olar ózderiniń "deklaratsiiasynyń" hattamasy men videojazbasyn Instagram paraqshasyna jariialaǵan bolatyn. Endi kollaboranttardyń sol áreketi ózderiniń basyna taiaq bolyp tidi.
Olar bul áreketteri úshin jazasyz qalamyz dep oilasa kerek. Biraq Jańa Qazaqstan separatisttik áreketke jol bergen 4 kollaborantty laiyqty jazaǵa tartty.
Búgin Petropavl qalalyq soty separatisttik áreketke uiytqy bolǵan Viacheslav Zýderman 9 jylǵa, qalǵan úsheýin 7 jylǵa bas bostandyǵynan aiyrý týrasynda sheshim shyǵardy. Endigi jerde Reseige qarap ulityndar Qazaqstannyń tutastyǵyna qatysty áńgime aitqanda abailap sóileitin bolady.
