پەتروپاۆل زاۋىتى سۋ تاسقىنى جاعدايىن تاۋلىك بويى باقىلاۋ ءۇشىن تجد-نى ءوز وندىرىسىندەگى دروندارمەن قامتاماسىز ەتتى.
پرەمەر-مينيستردىڭ ءبىرىنشى ورىنباسارى رومان سكليار جەدەل شتابتىڭ جۇمىسىن تەكسەردى.
جەرگىلىكتى كاسىپورىن «پەتروپاۆل اۋىر ماشينا جاساۋ زاۋىتى» اق شتابتى سۋ تاسقىنى ءقاۋپى جوعارى ايماقتاردى بارلاۋ ءۇشىن تەپلوۆيزورى بار دروندارمەن جانە ۇشقىشسىز ۇشۋ اپپاراتىمەن قامتاماسىز ەتتى.
رومان سكليار تەحنولوگيالىق مۇمكىندىكتەردى پايدالانىپ، تاسقىن ءقاۋپى بار ايماقتاعى سۋدىڭ تولىپ كەتۋ دەڭگەيىن ناقتى ۋاقىت رەجيمىندە باقىلاۋعا كىرىسۋدى تاپسىردى.
اتقارىلىپ جاتقان جۇمىستاردىڭ ەسەبىن تىڭداعان پرەمەر-مينيستردىڭ ءبىرىنشى ورىنباسارى اۋماقتى سۋرەتكە ءتۇسىرۋ جانە دەرەكتەردى ىشكى راديوبايلانىسى بار كارتاعا 2D فورماتىندا لەزدە جىبەرۋ ءۇشىن بارلاۋ دروندارىن بەلسەندى پايدالانۋ قاجەتتىگىن اتاپ ءوتتى.
«تاسقىن سۋ قالاعا جەتتى، سوندىقتان ءبىز كەزەكشىلىكتى تۇراقتى تۇردە قامتاماسىز ەتۋىمىز كەرەك. بارلىق ءموبيلدى توپتار تولىعىمەن دايىن تۇرۋى قاجەت. جەرگىلىكتى جەردە جۇمىس ىستەيتىن توپتار جاعدايدى دەرەۋ حابارلاۋى ءتيىس. سۋ تاسقىنى ءقاۋپىنىڭ قانشالىقتى ماڭىزدى ەكەنىن تۇسىنە المايتىن ازاماتتار بولسا، ەۆاكۋاسيا جۇرگىزىلگەن بارلىق ەلدى مەكەندەردى قايتا تەكسەرۋدى تاپسىرامىن. بارلىق ادامداردىڭ ءقاۋىپسىز ايماقتا بولۋىن قاداعالاۋ كەرەك»، — دەپ تاپسىردى رومان سكليار.
پرەمەر-مينيستردىڭ ءبىرىنشى ورىنباسارى توتەنشە جاعدايدىڭ الدىن الۋ ءۇشىن بارلىق ءموبيلدى توپتار، ارنايى تەحنيكالار، قوسىمشا جۇك تيەگىشتەر، ينەرتتى ماتەريالدار تاسقىن ءقاۋپىن جويۋعا دايىن بولۋى كەرەكتىگىن باسا ايتتى.
