پەتروپاۆلدا ورنالاسقان ءبىر سۋپەرماركەتتە تاۋار باعالارىنىڭ رۋبلمەن كورسەتىلۋى جەرگىلىكتى تۇرعىندار اراسىندا نارازىلىق تۋدىردى. بۇل جاعداي بويىنشا قالا تۇرعىنى تۇتىنۋشىلاردىڭ قۇقىقتارىن قورعاۋ جانە ساۋدا سالاسىن رەتتەۋ دەپارتامەنتىنە شاعىم تۇسىرگەن، دەپ حابارلايدى Dalanews.kz
Stan.kz باسىلىمىنىڭ مالىمەتىنشە،دۇكەن سورەلەرىندەگى ءبىرقاتار ءونىمنىڭ قۇنى ۇلتتىق ۆاليۋتا – تەڭگەمەن ەمەس، رەسەي رۋبلمەن جازىلعان. دەپارتامەنت ماماندارى شاعىم بويىنشا جوسپاردان تىس تەكسەرىس جۇرگىزىپ، فاكتىنى راستادى.
تەكسەرۋ ناتيجەسىندە سۋپەرماركەت يەسىنە اكىمشىلىك ايىپپۇل سالىنىپ، زاڭبۇزۋشىلىقتى جويۋ تۋرالى رەسمي نۇسقاما بەرىلدى. ۆەدومستۆو وكىلدەرى مۇنداي ارەكەت تۇتىنۋشىلاردى شاتاستىرىپ قانا قويماي، ولاردىڭ قۇقىقتارىن بۇزاتىنىن اتاپ ءوتتى. باعا بەلگىلەۋ تالاپتارىنىڭ ساقتالماۋى ەسەپ ايىرىسۋ كەزىندە تۇسىنبەۋشىلىككە اكەلۋى مۇمكىن.
ايتا كەتەيىك، بۇعان دەيىن دە ەلدىڭ شىعىسىندا بالالار دۇكەنىنە رۋبلمەن باعا قويعانى ءۇشىن ايىپپۇل سالىنعان ەدى.
