قازاقستاندا جاساندى ينتەللەكت تەحنولوگيالارىن مەكتەپ تاجىريبەسىنە ەنگىزۋدىڭ ادىستەمەلىك نەگىزدەرى بەكىتىلدى. ءتيىستى تالاپتار مەن شەكتەۋلەر ى.التىنسارين اتىنداعى ۇلتتىق ءبىلىم اكادەمياسى ازىرلەگەن قۇجاتتا ناقتىلاندى، دەپ حابارلايدى Dalanews.kz.
ادىستەمەنى ازىرلەۋدەگى باستى ۇستانىم - جاساندى ينتەللەكت ءمۇعالىمدى الماستىرمايدى دەگەن قاعيدا. جاساندى ينتەللەكت تەك ساباق دايىنداۋعا، ماتەريالدى بەيىمدەۋگە، تالداۋ جاساۋعا كومەكتەسەتىن قۇرال رەتىندە قاراستىرىلادى. وقۋشىنى باعالاۋ، وقۋ مازمۇنىن تاڭداۋ جانە سوڭعى شەشىم قابىلداۋ قۇقىعى تولىقتاي ءمۇعالىمنىڭ قۇزىرىندا قالادى. ءبىلىم ناتيجەلەرىن تولىق اۆتوماتتاندىرۋعا جول بەرىلمەيدى. سوندىقتان جاساندى ينتەللەكت دايىنداعان كەز كەلگەن ماتەريال ءمۇعالىمنىڭ تەكسەرىسىنەن وتۋگە ءتيىس.
قۇجات سيفرلىق قاۋىپسىزدىككە ەرەكشە ءمان بەرەدى. ونىڭ ىشىندە وقۋشىلاردىڭ جەكە دەرەگىن بوگدە سەرۆيستەرگە ەنگىزۋگە بولمايدى، ساباقتا قولدانىلاتىن پلاتفورمالار زاڭنامالىق تالاپقا ساي بولۋى كەرەك. سونىمەن قاتار، اكادەميالىق ادالدىقتى ساقتاۋعا ەرەكشە ءمان بەرىلەدى. وقۋشىلار جي ارقىلى دايىندالعان جۇمىستارىن ءوز ەڭبەگى رەتىندە ۇسىنا المايدى، مۇعالىمدەر قاجەت بولعان جاعدايدا تاپسىرمانى قايتا بەرە الادى.
ادىستەمەلىك ۇسىنىمدا پەداگوگتارعا Canva، ChatGPT، Gemini Storybook، Notebook LM، Reading Coach، Google Lens جانە وزگە دە سەرۆيستەردى ساباقتا قولدانۋدىڭ دايىن الگوريتمدەرى مەن سەنارييلەرى بەرىلگەن. بۇل ءمۇعالىمنىڭ اكىمشىلىك جۇكتەمەسىن ازايتىپ، وقۋ ماتەريالدارىن وقۋشىنىڭ جەكە ەرەكشەلىكتەرىنە بەيىمدەۋگە مۇمكىندىك بەرەدى.
ادىستەمەلىك ۇسىنىم ى.التىنسارين اتىنداعى ۇلتتىق ءبىلىم اكادەمياسىنىڭ رەسمي سايتىندا قولجەتىمدى. ونى پەداگوگتار، ادىسكەرلەر، ءبىلىم بەرۋ ۇيىمدارىنىڭ باسشىلارى، وقۋشىلار پايدالانا الادى. بۇل قادام مەكتەپتەردىڭ سيفرلىق ترانسفورماسياسىن جۇيەلى تۇردە قولداۋعا باعىتتالعان.
