پاۆلودار وبلىسىنىڭ اكىمى اسايىن بايحانوۆ وڭىردەن كوشىپ جاتقان حالىققا قاتىستى ءوز پىكىرىن ءبىلدىردى، دەپ حابارلايدى Dalanews.kz Informburo.kz-كە سىلتەمە جاساپ.

اكىمگە بۇل ساۋالدى قويعان جۋرناليست بيىلعى جىلدىڭ العاشقى 10 ايىندا پاۆلودار وبلىسىنان 6 مىڭنان استام ادامنىڭ كەتكەنىن اتاپ ءوتتى. وسىعان جاۋاپ بەرگەن ءوڭىر باسشىسى ماسەلەنىڭ كۇردەلى ءارى جۇيەلى سيپاتقا يە ەكەنىن ايتتى.

"بۇل سۇراققا ءۇستىرت جاۋاپ بەرۋ مۇمكىن ەمەس. سەبەبى بۇل – ءبىز ءقازىر جۇمىس ىستەپ جاتقان نەگىزگى جۇيەلى پروبلەمالاردىڭ ءبىرى"، – دەدى اسايىن بايحانوۆ.

وبلىس اكىمىنىڭ ايتۋىنشا، حالىقتىڭ كوشىپ كەتۋىنىڭ باستى سەبەپتەرىنىڭ ءبىرى – ەكولوگيالىق احۋالدىڭ ناشارلىعى. پاۆلودار وبلىسى ەل بويىنشا زياندى شىعارىندىلار كولەمى جونىنەن ءبىرىنشى ورىندا تۇر.

"ەلىمىز بويىنشا جىل سايىن اتموسفەراعا 2،1 ميلليون توننا قاتتى بولشەك شىعارىلادى. سونىڭ 30 پايىزى نەمەسە شامامەن 700 مىڭ تونناسى پاۆلودار وبلىسىنىڭ ۇلەسىنە تيەسىلى"، – دەدى ول.

اسىرەسە، شىعارىندىلاردىڭ نەگىزگى بولىگى ەكىباستۇز قالاسىنا تيەسىلى. مۇندا ءىرى ەنەرگيا ءوندىرۋشى كاسىپورىنداردىڭ جۇمىسىنا بايلانىستى جىلىنا شامامەن 400 مىڭ توننا زياندى قالدىق اۋاعا تارايدى.

سونىمەن قاتار، اكىم كوشى-قون كورسەتكىشتەرىن تەك كەتۋشىلەر سانى ارقىلى عانا ەمەس، وڭىرگە كەلۋشىلەر سانىمەن بىرگە قاراستىرۋ قاجەت ەكەنىن ايتتى.

"32 مىڭ ادام وڭىردەن كوشىپ كەتكەن بولسا، 24،5 مىڭ ادام كەرىسىنشە وبلىسقا كەلگەن. ناتيجەسىندە تازا كوشى-قون ايىرماسى شامامەن 8 مىڭ ادامدى قۇرايدى"، - دەدى اساين بايحانوۆ.

ءوڭىر باسشىسى جاستاردىڭ رەسەيگە كەتۋىن دە حالىق سانىنىڭ ازايۋىنا اسەر ەتىپ وتىرعان فاكتورلاردىڭ ءبىرى رەتىندە اتادى. رەسەي فەدەراسياسىمەن شەكارالاس ورنالاسقان پاۆلودار وبلىسىنان مەكتەپ تۇلەكتەرى ءنوۆوسىبىر، ومبى، تومسك جانە كەمەروۆو قالالارىنا وقۋعا ءجيى كەتەدى.

"سولاردىڭ 50–60 پايىزى وقۋىن اياقتاعاننان كەيىن سول جاقتا قالىپ، ءومىرىن سول ەلدە جالعاستىرادى"، – دەدى اكىم.

اساين بايحانوۆ سونداي-اق ءوڭىردىڭ ەتنيكالىق قۇرامىنا دا توقتالىپ ءوتتى. ونىڭ ايتۋىنشا، قازىرگى تاڭدا پاۆلودار وبلىسى حالقىنىڭ 57 پايىزىن قازاقتار، ال 43 پايىزىن وزگە ۇلت وكىلدەرى قۇرايدى.

حالىق سانىنىڭ ازايۋىن وتەۋ ماقساتىندا ناقتى شارالار قابىلدانىپ جاتقانىن ايتقان اكىم وڭتۇستىك وڭىرلەردەن ەڭبەك كۇشى ارتىق ايماقتاردان قونىس اۋدارۋ باعدارلاماسىنا نازار اۋداردى.

"قازىرگى تاڭدا پاۆلودار وبلىسىنا 5 500 ادام قونىس اۋداردى. سونىمەن قاتار 1 500-گە جۋىق قانداس كوشىپ كەلدى. دەگەنمەن حالىق سانىنىڭ ازايۋى بار ەكەنىن مويىندايمىز جانە بۇل باعىتتا جۇيەلى جۇمىس جۇرگىزىپ جاتىرمىز"، – دەپ تۇيىندەدى ءوڭىر باسشىسى.