پاۆلودار وبلىسىنىڭ پروكۋراتۋراسى وڭىردەگى سپورت نىساندارىنا جۇرگىزىلگەن تەكسەرىس بارىسىندا ءبىرقاتار ورەسكەل زاڭبۇزۋشىلىقتى انىقتادى. بۇل تۋرالى وبلىستىق قاداعالاۋ ورگانىنىڭ باسپا ءسوز قىزمەتى مالىمدەدى، دەپ حابارلايدى Dalanews.kz.
پروكۋراتۋرا ستاديوندار، باسسەيندەر، سپورت مەكتەپتەرى، مۇز ايدىندارى مەن فۋتبول مانەجدەرىن قامتىعان كەشەندى تەكسەرۋ جۇرگىزگەن. ناتيجەسىندە كەيبىر سپورت نىساندارىنىڭ زاڭسىز تۇردە جەكەمەنشىككە بەرىلىپ، كوممەرسيالىق ماقساتتا پايدالانىلعانى جانە جالداۋ اقىسىنىڭ تولەنبەگەنى بەلگىلى بولدى. ماسەلەن، پاۆلودار قالاسىندا ءبىر حوككەي كورتى ءۇش جىل بويى تەگىن قولدانىلعان، ال كوممۋنالدىق شىعىندار بيۋدجەت قاراجاتى ەسەبىنەن وتەلگەن.
سونىمەن قاتار سپورت مەكتەپتەرىنىڭ قىزمەتىندە قارجى جىمقىرۋ جانە جالعان تولەمدەر فاكتىلەرى انىقتالىپ، كەلتىرىلگەن شىعىن كولەمى 10 ملن تەڭگەنى قۇراعان.
اتاپ ايتقاندا، اۋدانداردىڭ بىرىندە بۋحگالتەر ءۇش جىل ىشىندە ءوز شوتىنا زاڭسىز تۇردە شامامەن 6 ملن تەڭگە اۋدارعان. اتالعان دەرەك بويىنشا ق ر قىلمىستىق كودەكسىنىڭ 189-بابى 3-بولىگى ("سەنىپ تاپسىرىلعان بوتەن مۇلىكتى يەمدەنۋ نەمەسە ىسىراپ ەتۋ") بويىنشا قىلمىستىق ءىس سوتتا قارالىپ جاتىر.
قاداعالاۋ ورگانى سپورت ۇيىمدارىندا جالعان ديپلومى بار جاتتىقتىرۋشىلاردىڭ، سونداي-اق حالىق دەنساۋلىعى مەن قوعامدىق مورالعا قارسى قىلمىستارى ءۇشىن بۇرىن سوتتالعان قىزمەتكەرلەردىڭ جۇمىس ىستەگەنىن دە انىقتاعان.
بۇدان بولەك، سپورتشىلاردى ورنالاستىرۋعا قاتىستى جالعان كەلىسىمشارتتار جاسالىپ، ءىس جۇزىندە جوق قوناقۇيلەر كورسەتىلگەن. سونىڭ سالدارىنان 2،8 ملن تەڭگە كولەمىندە ماتەريالدىق شىعىن كەلگەن.
تەكسەرۋ ناتيجەلەرى سپورت نىساندارىنىڭ باسىم بولىگىنىڭ توزىعى جەتكەنىن كورسەتتى: تريبۋنالار قيراعان، شاتىرلاردان سۋ اعادى، مۇمكىندىگى شەكتەۋلى جاندارعا قاجەتتى جاعدايلار جاسالماعان، سانيتارلىق جانە ءورت قاۋىپسىزدىگى تالاپتارى ساقتالمايدى.
پروكۋراتۋرا بارلىق انىقتالعان زاڭبۇزۋشىلىقتار بويىنشا ولاردى جويۋ جانە كىنالى تۇلعالاردى جاۋاپكەرشىلىككە تارتۋ ماقساتىندا قاداعالاۋ اكتىلەرىن ەنگىزگەنىن مالىمدەدى.
