پاۆلودار وبلىسىنىڭ تۇرعىنى مەملەكەتتٸك تۇرعىن ٷي قورىنان باسپانا الۋ قۇقىعىن سوت ارقىلى قالپىنا كەلتٸردٸ. ەندٸ ونىڭ كەزەگٸ بالالار ٷيٸنە ورنالاستىرىلعان 2008 جىلدان باستاپ ەسەپتەلەدٸ. بۇل تۋرالى جوعارعى سوت مەلٸمدەدٸ, دەپ حابارلايدى dalanews.kz.
ٸس ماتەريالدارىنا سەيكەس, اتا-اناسىنىڭ قامقورلىعىنسىز قالعان ب. ەسٸمدٸ ازاماتشا 2008 جىلى بالالار ٷيٸنە قابىلدانعان. الايدا جاۋاپتى مەكەمەلەر ونى "جەتٸم بالالار جەنە اتا-اناسىنىڭ قامقورلىعىنسىز قالعان بالالار" ساناتى بويىنشا تۇرعىن ٷي كەزەگٸنە التى جىلدان كەيٸن, ياعني 2014 جىلى عانا قويعان.
2023 جىلى ۋەكٸلەتتٸ ورگان ونىڭ باسقا ەلدٸ مەكەنگە تۇراقتى تۇرۋعا كٶشكەنٸن نەگٸزگە الىپ, باسپانا كەزەگٸنەن شىعارعان. سوتقا دەيٸنگٸ شاعىمنان كەيٸن ەيەلدٸڭ كەزەگٸ قالپىنا كەلتٸرٸلگەنٸمەن, ەسەپكە قويۋ مەرزٸمٸ 2014 جىلدان باستاپ بەلگٸلەنگەن.
بۇل شەشٸممەن كەلٸسپەگەن تۇرعىن سوتقا جٷگٸنٸپ, كەزەگٸن بالالار ٷيٸنە قابىلدانعان 2008 جىلدان باستاپ ەسەپتەۋدٸ تالاپ ەتتٸ.
سوت تالاپكەردٸڭ تۇرعىن ٷي كەزەگٸنە ۋاقىتىندا قويىلماۋىنا ٶزٸ كٸنەلٸ ەمەس ەكەنٸن انىقتادى. ٶيتكەنٸ سول كەزدە ول كەمەلەتكە تولماعان جەنە باسپانا الۋ قۇقىعىن ٶز بەتٸنشە قورعاي الماعان. ال ونى تەربيەلەگەن بالالار ٷيٸ كەيٸن تاراتىلعان. ۋەكٸلەتتٸ ورگان دا قىزدىڭ پاتروناتتىق تەربيەدە بولعانىن راستايتىن دەلەل ۇسىنا الماعان.
سوت مەملەكەتتٸك ورگانداردىڭ ەرەكەتسٸزدٸگٸ مەن جەكەلەگەن لاۋازىمدى تۇلعالاردىڭ زاڭسىز ەرەكەتتەرٸ سالدارىنان ازاماتشانىڭ تۇرعىن ٷي قۇقىعى بۇزىلدى دەگەن قورىتىندىعا كەلدٸ.
"تۇرعىن ٷي قاتىناستارى تۋرالى" زاڭعا سەيكەس, باسپاناعا مۇقتاج رەتٸندە ەسەپكە الىنعان جەتٸم جەنە اتا-اناسىنىڭ قامقورلىعىنسىز قالعان بالالار تۇرعىن ٷي العانعا دەيٸن كەزەكتەن شىعارىلماۋعا تيٸس.
وسىعان بايلانىستى سوت تۇرعىننىڭ مەملەكەتتٸك قوردان باسپانا الۋ كەزەگٸن 2008 جىلدان باستاپ قالپىنا كەلتٸردٸ. شەشٸم زاڭدى كٷشٸنە ەندٸ.
