Pavlodar oblysynyń turǵyny memlekettik turǵyn úi qorynan baspana alý quqyǵyn sot arqyly qalpyna keltirdi. Endi onyń kezegi balalar úiine ornalastyrylǵan 2008 jyldan bastap esepteledi. Bul týraly Joǵarǵy sot málimdedi, dep habarlaidy dalanews.kz.
Is materialdaryna sáikes, ata-anasynyń qamqorlyǵynsyz qalǵan B. esimdi azamatsha 2008 jyly balalar úiine qabyldanǵan. Alaida jaýapty mekemeler ony "jetim balalar jáne ata-anasynyń qamqorlyǵynsyz qalǵan balalar" sanaty boiynsha turǵyn úi kezegine alty jyldan keiin, iaǵni 2014 jyly ǵana qoiǵan.
2023 jyly ýákiletti organ onyń basqa eldi mekenge turaqty turýǵa kóshkenin negizge alyp, baspana kezeginen shyǵarǵan. Sotqa deiingi shaǵymnan keiin áieldiń kezegi qalpyna keltirilgenimen, esepke qoiý merzimi 2014 jyldan bastap belgilengen.
Bul sheshimmen kelispegen turǵyn sotqa júginip, kezegin balalar úiine qabyldanǵan 2008 jyldan bastap esepteýdi talap etti.
Sot talapkerdiń turǵyn úi kezegine ýaqytynda qoiylmaýyna ózi kináli emes ekenin anyqtady. Óitkeni sol kezde ol kámeletke tolmaǵan jáne baspana alý quqyǵyn óz betinshe qorǵai almaǵan. Al ony tárbielegen balalar úii keiin taratylǵan. Ýákiletti organ da qyzdyń patronattyq tárbiede bolǵanyn rastaityn dálel usyna almaǵan.
Sot memlekettik organdardyń áreketsizdigi men jekelegen laýazymdy tulǵalardyń zańsyz áreketteri saldarynan azamatshanyń turǵyn úi quqyǵy buzyldy degen qorytyndyǵa keldi.
"Turǵyn úi qatynastary týraly" zańǵa sáikes, baspanaǵa muqtaj retinde esepke alynǵan jetim jáne ata-anasynyń qamqorlyǵynsyz qalǵan balalar turǵyn úi alǵanǵa deiin kezekten shyǵarylmaýǵa tiis.
Osyǵan bailanysty sot turǵynnyń memlekettik qordan baspana alý kezegin 2008 jyldan bastap qalpyna keltirdi. Sheshim zańdy kúshine endi.
