پرەزيدەنت پارلامەنتتىك رەفورما جونىندەگى جۇمىس توبىنىڭ ءبىرىنشى وتىرىسىندا ءسوز سويلەدى، دەپ حابارلايدى Dalanews.kz.
"بۇگىن ءبىز پارلامەنتتىك رەفورما بويىنشا جۇمىس توبىنىڭ العاشقى وتىرىسىنا جينالدىق. وزدەرىڭىز بىلەسىزدەر، وتكەن اپتادا ارنايى جۇمىس توبىن قۇرۋ تۋرالى وكىمگە قول قويدىم. پارلامەنتتىك رەفورما – ەلىمىزدىڭ الدىندا تۇرعان اسا ماڭىزدى، جاۋاپتى جۇمىس. جولداۋىمدا بۇل ماسەلە ازاماتتىق سەكتوردا، ساراپشىلار ورتاسىندا، سونداي-اق قازىرگى پارلامەنتتە جان-جاقتى تالقىلانۋى قاجەت دەپ ناقتى ايتتىم. بۇگىن، مىنە، ءبىرىنشى وتىرىسىمىزدا پارلامەنتتىڭ، پرەزيدەنت اكىمشىلىگىنىڭ، ۇكىمەتتىڭ جانە ساياسي پارتيالاردىڭ وكىلدەرى، زاڭگەرلەر، عالىمدار، قوعام قايراتكەرلەرى بار. ءبارى دە ەلگە تانىمال ازاماتتار، ءتۇرلى سالانىڭ ماماندارى.
تاعى دا قايتالاپ ايتقىم كەلەدى: پارلامەنتتىك رەفورما – ەلىمىزدىڭ، حالقىمىزدىڭ تاعدىرىنا تىكەلەي قاتىسى بار ماسەلە. جۇمىس توبىنىڭ ءار مۇشەسى وسى تاريحي مىندەتتى دۇرىس ءتۇسىنىپ، بەلسەندى جۇمىس ىستەيدى دەپ سەنەمىن"، - دەدى توقايەۆ.
سونىمەن قاتار، مەملەكەت باسشىسىنىڭ پىكىرىنشە، پارلامەنتتى رەفورمالاۋ سەناتتى تاراتۋ دەگەن ءسوز ەمەس.
"سونداي-اق، تاعى ءبىر ماڭىزدى ماسەلەگە نازار اۋدارعىم كەلەدى: پارلامەنتتى رەفورمالاۋ سەناتتى تاراتۋ دەگەن ءسوز ەمەس. مۇنداي قاتە پىكىرگە جول بەرۋگە بولمايدى. ءبىزدىڭ الدىمىزدا تۇرعان ماقسات ايقىن. ءبىز وكىلدى بيلىك تارماعىن تۇبەگەيلى جاڭعىرتۋىمىز كەرەك. وسىلايشا، ازاماتتارىمىزدىڭ مۇددەلەرى مەن تىلەك-نيەتىن بىلدىرەتىن زاڭ شىعارۋشى ورگان مۇلدە جاڭا سيپاتقا يە بولادى"، - دەدى پرەزيدەنت.
