بۇۇ باس حاتشىسى پان گي مۋن باس اسسامبلەيادا سويلەگەن سوزىندە كوپتەگەن ساياسي جەتەكشىلەر ءوز ازاماتتارىنىڭ مۇددەسىن اياققا "تاپتاپ" جاتقانىنا توقتالدى. باس حاتشىنىڭ بايانداماسى بۇۇ سايتىندا جاريالاندى.
"ءبىز كوپتەگەن ەلدەردىڭ باسشىلارىنىڭ بيلىكتى ساقتاپ قالۋ ءۇشىن كونستيتۋسيانى وزگەرتىپ، سايلاۋ ناتيجەلەرىن بۇرمالاپ، باسقا دا شەكتەن تىس ارەكەتتەرگە بارعانىنىڭ كۋاسى بولدىق، - دەدى باس حاتشى. ولار مەملەكەتتى باسقارۋ قىزمەتىنىڭ جەكە باسىنىڭ مەنشىگى ەمەس، ازاماتتاردىڭ سەنىمى ەكەنىن ءتۇسىنۋى كەرەك. سىزدەر ءوز حالقىڭىزعا قىزمەت ەتۋلەرىڭىز كەرەك. دەموكراتيانى شايقاۋدى، ەلدىڭ تابيعي بايلىعىن توناۋدى، قارسىلاستارىڭدى ازاپتاپ تۇرمەگە جابۋدى دوعارىڭدار".
پان گي مۋن ديپلوماتيالىق ەتيكەتتى ىسىرىپ قويىپ، بۇگىنگى كۇننىڭ وزەكتى ماسەلەلەرىن شەشە الماي وتىرعان مەملەكەتتەردى قاتاڭ سىنعا الدى. ول الەم ەلدەرىنىڭ جەتەكشىلەرى ءوز ازاماتتارى الدىندا جاۋاپ بەرەتىندىگىن، ال حالىقارالىق قاۋىمداستىق باسقا دا ماسەلەلەردى شەشۋگە پارمەنى جەتەتىنىن اتاپ ءوتتى.
بۇۇ باس حاتشىسى قىزمەتىن اۋىر مۇڭمەن تاستاپ بارا جاتقانىن مالىمدەدى.
"حالىق پەن بيلىكتىڭ اراسى الشاقتادى. ەكسترەميستەر حالىقتى ءبولىپ قاراۋعا ماجبۇرلەپ وتىر. جەر ءبىزدىڭ ارەكەتىمىزگە تەڭىز داۋىلدارىمەن، اپتاپ ىستىقپەن، اياۋسىز قۇيىندارمەن جاۋاپ بەرەدى"، - دەپ مالىمدەدى بۇۇ باس حاتشىسى.
