جاقىندا جوعارعى اۋديتورلىق پالاتا 2024 جىلعى مەملەكەتتٸك بيۋدجەتتٸڭ ورىندالۋى تۋرالى بايانداما جاساپ, ونداعى جٷيەلٸك پروبلەمالاردى سىن ساداعىنا العان بولاتىن. بٸراق ونداعى پروبلەمالاردىڭ بارلىعى جوعارعى اۋديتورلىق پالاتانىڭ قازٸرگٸ باسشىسى, 2022-2024 جىلدارى ٷكٸمەتتٸ باسقارىپ, پرەمەر-مينيستر بولعان ەليحان سمايىلوۆتىڭ تٸكەلەي مۇرىندىق بولۋىمەن تۋىنداعان. سوندىقتان اۋديتورلار ٶزدەرٸنٸڭ بٸرٸنشٸ باسشىسىن سىناپ جاتىر دەپ ەسەپتەۋگە بولادى. ال ول ەسەپكە پالاتا تٶراعاسى رەتٸندە ەليحان سمايىلوۆ قول قويادى.
«بۇل ساياسي سادومازوحيزم بە, ەلدە ٶزٸنٸڭ ٷكٸمەت باسقارعان ۋاقىتتاعى قاتەلٸكتەرٸن مويىنداۋ ما, ول جاعىن ەركٸم ٶزٸ شەشە جاتار. بٸراق دەل وسى ەليحان اسحانۇلىنىڭ پرەمەرلٸگٸ تۇسىندا ۇلتتىق كومپانييالار اكتسيياسىن ساتىپ الۋ سىندى ۇلتتىق قوردان رەسپۋبليكالىق بيۋدجەتكە ترانسفەرتتەن تىس اقشا تارتۋدىڭ كٷدٸكتٸ سحەمالارى ويلاپ تابىلىپ, قولدانىلعان بولاتىن. قازاقستان وسىنىڭ زاردابىن ەلٸ ۇزاق جىلدار بويى تارتاتىن بولادى. سوزىلمالى دەفيتسيت, بيۋدجەتتٸڭ باسقا دا جٷيەلٸك پروبلەمالارىنا ەكس پرەمەرلەر اسقار مامين مەن ەليحان سمايىلوۆ تٸكەلەي جاۋاپتى. ولار پاندەمييا كەزٸندە پايدا بولعان وراسان مەملەكەتتٸك قارجى شىعىنىن ارى قاراي دۇرىس باسقارا المادى», - دەيدٸ DALA INSIDE دەرەككٶزٸ.
ەليحان سمايىلوۆ 2022 جىلى «قاڭتار وقيعاسى» اياقتالا سالسىمەن, سول قاڭتاردا ٷكٸمەت باسشىسى بولىپ تاعايىندالدى. ول قىزمەتٸنەن اسحانۇلى 2024 جىلدىڭ باسىندا, ياعني اقپان ايىندا كەتتٸ. 2024 جىلعى بيۋدجەت پارامەترلەرٸن سمايىلوۆتىڭ كابينەتٸ تولىقتاي ٶزدەرٸ بەكٸتكەن.
«سمايىلوۆتىڭ ٷكٸمەتٸ 2023 جىلى بيزنەستەن قوسىمشا قۇن سالىعى رەتٸندە 600 ميلليارد تەڭگە قايتارۋى تيٸس ەدٸ. ونى ٸستەمەدٸ. ارتىنان جىرتىقتى جاماۋ ٷشٸن ولار قارىز الدى. سول كەزدە 2023 جىلعى بيۋدجەتتٸڭ «تەسٸگٸ» 1 تريلليون تەڭگەدەن اسىپ كەتتٸ. ال 2023 جىلدىڭ ناۋرىز ايىندا مينيسترلەر كابينەتٸ ترانسفەرتتٸ 800 ميلليارد تەڭگەگە تاعى دا ارتتىرىپ, دەفيتسيتتٸ 2 تريلليون تەڭگەدەن اسىرىپ جٸبەردٸ», - دەيدٸ دەرەككٶز.
2024 جىلى ٷكٸمەت باسىنا كەلگەن ولجاس بەكتەنوۆ بەرٸبٸر تەز ارادا ەشتەڭە ٶزگەرتە المايتىن ەدٸ. سوندىقتان 2024 جىلعى بيۋدجەتتٸڭ ورىندالۋى, ونىڭ كارتيناسى ەليحان سمايىلوۆ سىزىپ كەتكەن بولجامدى كارتينامەن جٷردٸ. جەنە الدىن-الا بەكٸتٸلگەن بۇل ەسەپ مٷلدە جارامسىز بولىپ شىقتى. سول سەبەپتٸ بيىل ولجاس بەكتەنوۆ كابينەتٸ قاتاڭ سالىق رەفورماسىن جاساپ, بيۋدجەت كٸرٸستەرٸ مەن شىعىستارىن تولىق باقىلاۋعا الۋعا شەشٸم قابىلداعان.
ولجاس بەكتەنوۆتىڭ بيۋدجەت پەن مەملەكەتتٸك قارجى بويىنشا جۇمىسىن 2025 جىلعى قورىتىندىدان كەيٸن باعالاۋ كەرەك. ال سالىق رەفورماسىنىڭ العاشقى نەتيجەلەرٸن بٸز 2026 جىلدىڭ اياعىندا كٶرە باستايمىز. سول كەزدە جوعارعى اۋديتورلىق پالاتاعا ٶزٸنٸڭ بارلىق تالانتىن كٶرسەتۋگە جول اشىلادى.
ال پالاتانىڭ قازٸرگٸ «بەس ەشكٸنٸ جەپ قويىپ ىسقىرۋى» استاناداعى بٸراز ادامنىڭ كٷلكٸسٸن كەلتٸرٸپ, بٸرشاما وتىرىستاردا ساياسي اندەكدوتقا اينالىپ كەتتٸ. بۇل ۇيىم پالاتا ستاتۋسىنا ەلٸ تارتپايتىن سيياقتى. سوندىقتان ەسەپ كوميتەتٸ دەگەن ەسكٸ اتىن قايتارىپ بەرە سالعان دۇرىس.
