باسەكەلەستىكتى قورعاۋ جانە دامىتۋ اگەنتتىگى (بقدا) ءتوراعاسىنىڭ ورىنباسارى بولات سامبەتوۆ مەملەكەتتىك ورگان وكىلدەرى ياندەكس.تاكسي قىزمەتىنىڭ ءار ساپاردان ۇستايتىن كوميسسيا مولشەرىن وزگەرتۋ بويىنشا كەلىسسوزدەر جۇرگىزىپ جاتقانىن مالىمدەدى، دەپ حابارلايدى Dalanews.kz.

قازاقستاننىڭ باسەكەلەستىك ماسەلەلەرى جونىندەگى زاڭناماسىنا تۇزەتۋلەردى تالقىلاۋ بارىسىندا ءماجىلىس دەپۋتاتى نۇرتاي سابيليانوۆ ياندەكس.تاكسي-گە قاتىستى قانداي شارالار قابىلداناتىنىن سۇرادى.

سامبەتوۆ بۇعان دەيىن اگەنتتىك كومپانيانىڭ الگوريتمدىك باعا بەلگىلەۋ ءاۋديتىن اياقتاپ، ونىڭ ناتيجەلەرىن زەرتتەۋگە كىرىسكەنىن ەسكە سالدى.

“وسى ناتيجەلەرگە سۇيەنە وتىرىپ، ناقتى شارالار قابىلداۋدى جوسپارلاپ وتىرمىز. ماجىلىستە سوڭعى رەت بولعانىمىزدا، شەكتى باعا ەنگىزۋ مۇمكىندىگى دە تالقىلانعان. قازىرگى ۋاقىتتا ياندەكس ءار ساپاردان شامامەن 16% كوميسسيا ۇستايدى، وعان قوسا 4% تاكسوپاركتەرگە تيەسىلى. بۇل استانا مەن الماتىدا شامامەن 16%. باسقا قالالاردا، ارينە، تومەندەۋ. ءبىز الەمدىك تاجىريبەنى زەرتتەپ جاتىرمىز – ءار ەلدە ءارتۇرلى، كەيبىرىندە 30%-عا دەيىن جەتەدى. ال وزبەكستاندا، مىسالى، تومەن. ءقازىر وسى ماسەلەنى كوتەرىپ وتىرمىز. ياندەكس وكىلدەرىنە: “وزبەكستاندا 13% ۇستايسىزدار، ال قازاقستاندا نەگە 16%؟” دەگەن سۇراق قويدىق. بۇل سۇراقتار بويىنشا كەلىسسوزدەر جۇرگىزىپ جاتىرمىز”، – دەدى بقدا ءتوراعاسىنىڭ ورىنباسارى.

دەپۋتات سابيليانوۆ بقدا-دان ياندەكس.تاكسي-گە قاتىستى ۇسىنىستار دايىنداپ، ولاردى پارلامەنتتىڭ جۇمىس توبىنا ەنگىزۋدى تالاپ ەتتى.