ءالى كۇنگە ەشبىر جۇمىس بەرۋشى تاراپ قىزمەتكەرلەرىنەن قازاق ەلىنىڭ مەملەكەت ءتىلى – قازاق ءتىلىن ءبىلۋدى تالاپ ەتپەيدى. مەملەكەتتىك ءتىل بىلمەي-اق مەملەكەتتىك قىزمەتكەر بولا الاتىن ەلدە، قازاق ءتىلىن بىلمەسە دە ءوز جۇمىسىن دوڭگەلەك اينالدىرا الاتىنىنا سەنەتىندەي. ءبىراق سولار، قازاق ءتىلىن بىلمەيتىن قىزمەتكەرىنىڭ وزىنە تيەسىلى جۇمىستى تولىق اتقارمايتىنىن بىلە مە ەكەن؟

ۋنيۆەرسيتەتتە قازاق ءتىلىن بىلمەيتىن مۇعالىمدەر وزدەرى جاساۋعا ءتيىستى قازاق تىلىندەگى قاعازداردى قازاق ءتىلدى مۇعالىمدەرگە جاساپ بەرۋىن ءوتىنىپ جۇرەتىنىن كوزىمىز كۇندە كورىپ ءجۇر. ءتىپتى كەيبىر ءورىستىلدى ۇستازدار ورىسشا جازىلعان وقۋلىقتارىن ءوزىنىڭ ستۋدەنتتەرىنە اۋدارتىپ جاتادى. ودان قانداي ساپالى وقۋلىق شىعادى. تاپسىرمانى، مىندەتتى ورىنداۋدىڭ مۇنداي سوراقى ءتۇرى تەك ءبىزدىڭ ەلدە عانا بار شىعار... ال جەكە كاسىپ ورىندارىندا شە؟

كەشە تەلەفون ءنومىرىمدى قايتا قالپىنا كەلتىرۋ ءۇشىن Activ ورتالىعىنا بارعانمىن. تالونداعى ءنومىرىم ارقىلى شاقىرعان تەرەزەگە بارىپ، نە جۇمىسپەن كەلگەنىمدى قازاق تىلىندە ايتا باستاپ ەدىم، مەنەدجەر "ورىس تىلىندە ايتۋىڭىزعا بولا ما؟" دەپ سۇرادى. مەن جوق دەپ جاۋاپ بەرىپ ەدىم، كۇتە تۇرىڭىز دەپ جۇگىرىپ كەتتى. ءبىر ۋاقىتتا كەلىپ مەنى باسقا تەرەزەدەگى قازاق جىگىتكە ەرتىپ باردى. قازاق جىگىت مەنىڭ جۇمىسىمدى جاساپ جاتقاندا، ول جىگىت قابىلداۋعا ءتيىستى ادام كەلىپ ماعان رەنجىدى. مىنە، قازاق ءتىلىن بىلمەيتىن قىزمەتكەر مەنىڭ ۋاقىتىمدى زايا ەتتى وسىلاي. ءوز جۇمىسىن وزگە ارىپتەسىنە جاساتتى. تاعى ءبىر تۇتىنۋشىسىن كۇتتىرىپ قويدى. دەمەك، قازاق ءتىلىن بىلمەيتىن قىزمەتكەر كاسىپ ورىننىڭ ءوزى ىستەمەگەن جۇمىسىنا ەڭبەكاقى الادى، سونىمەن بىرگە جۇمىس ونىمدىلىگىنە كەرى اسەرىن تيگىزەدى. ەندەشە، كەز كەلگەن كاسىپ يەسى ءوز جۇمىس ونىمدىلىگىن ارتتىرام دەسە، قىزمەتكەرىنەن قازاق ءتىلىن ءبىلۋدى تالاپ ەتۋى كەرەك. ويتكەنى، ەلىمىزدە قازاق تىلىنە سۇرانىس كۇن ساناپ ارتۋدا. قانداي دا ءبىر جۇمىستا قازاق تىلىندە قىزمەت كورسەتۋدى تالاپ ەتەتىن ازاماتتاردىڭ سانى كوبەيمەسە، ازايمايدى. وسىنى ءاربىر جۇمىس بەرۋشى تاراپ جاقسى تۇسىنەتىن كەزى كەلدى.

جەكە مەنشىك كاسىپ ورىندارعا، ارينە، تابىس كەرەك. ءوز تابىسى ءۇشىن قىزمەتكەرىنەن مەمەكەتتىك ءتىلدى تالاپ ەتەر كۇنى الىس ەمەس. ولارعا ارتىق شىعىن ەشقاشان كەرەك ەمەس. جوعارىدا مۇعالىمدەر تۋرالى ايتتىم. مۇعالىمدەردەن رەكتور، پرورەكتورلار تالاپ ەتە الا ما؟ ارينە، جوق. ويتكەنى ولاردىڭ وزدەرىنىڭ قازاق ءتىلىن بىلەتىنى شامالى. ولاردان مەملەكەت مەملەكەتتىك ءتىلدى ءبىلۋدى تالاپ ەتىپ جاتپاعان سوڭ، ولار دا ءوز قىزمەتكەرلەرىنەن تالاپ ەتپەيدى. پرورەكتور، رەكتورلار مەملەكەتتىڭ قىزمەتكەرى. ال قازاق ءتىلىن بىلمەيتىن قىزمەتكەر جوعارىداعىداي ءوز مىندەتىن تولىق اتقارمايدى دەگەن ءسوز. مەملەكەت وزىنە تولىق قاندى جۇمىس جاسامايتىن قىزمەتكەرىنە ارتىق جالاقى بەرمەۋ ءۇشىن، ءوز قىزمەتكەرلەرىنەن مەملەكەتتىك ءتىلدى ءبىلۋىن تالاپ ەتۋى كەرەك. جەكە كاسىپ ورىندار سياقتى، مەملەكەت تە ءوز جۇمىس ونىمدىلىگىن ارتتىرۋدى ويلايتىن كەزى كەلدى.

تۇردىبەك قۇرمەتحان