وتىرار اۋدانىندا 2024 جىلدىڭ 10 ايىندا جالپى وڭىرلىك ءونىم كولەمى 66،4 ملرد تەڭگەنى قۇراپ، وتكەن جىلدىڭ ءتيىستى كەزەڭىمەن سالىستىرعاندا 300 ملن تەڭگەگە ارتىق ورىندالعان. ونىڭ ىشىندە، اۋىل شارۋاشىلىعى – 33،3 ملرد تەڭگە، تارتىلعان ينۆەستيسيا – 23،6 ملرد تەڭگە، ساۋدا – 2،8 ملرد تەڭگە، ونەركاسىپ – 22 ملرد تەڭگە، قۇرىلىس كولەمى - 8،2 ملرد تەڭگەنى قۇراعان. بۇل جايىندا وتىرار اۋدانىنىڭ اكىمى قايرات جولدىباي ب ا ق وكىلدەرىمەن وتكەن بريفينگتە مالىمدەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– بيىل وتىرار اۋدانىندا 35 000 گەكتارعا ەگىن ەگىلىپ، ەگىستىك القابىنان 395 993 توننا ءونىم جينالدى. ودان بولەك، اۋداندا 2024 جىلدىڭ ءىى توقسانىندا بىرنەشە ينۆەستيسيالىق جوبا ىسكە اسىرىلدى. ماسەلەن، «بارجوۋ حينكاي ترەيد گوۋ» لتد كومپانياسىمەن بىرلەسىپ 500 گەكتار القاپقا تامشىلاتىپ سۋارۋ ادىسىمەن ماقتا داقىلىن ەگۋ جۇمىستارى جۇرگىزىلىپ، 1 200 توننا ماقتا ءونىمى الىندى. سونىمەن قاتار، اۋداندا جىل سوڭىنا دەيىن 800 ملن تەڭگەگە ساۋدا سالاسى بويىنشا ەكى شاعىن ينۆەستيسيالىق جوبانى ىسكە قوسۋ جوسپارلانىپ وتىر.
بۇدان بولەك، 2025 جىلى قۇنى 360 ملن تەڭگەنى قۇرايتىن تۇيە ءسۇتىن وڭدەپ، ۇنتاق شىعاراتىن كاسىپورىن قۇرۋ كوزدەلگەن. بۇگىندە جۇڭگو مەملەكەتىمەن كەلىسسوزدەر جۇرگىزىلۋدە. سونداي-اق، 2025-2030 جىلدارى قۇنى 145 ملرد 625 ملن تەڭگەنى قۇرايتىن 157 ءىرى جانە شاعىن ينۆەستيسيالىق جوبالار جۇزەگە اسىپ، 1 790 ادام جۇمىسپەن قامتىلماق. سونداي-اق، كەلەسى جىلى اۋداندا «Nomad» جشس-ڭ دەمالىس ايماعى ىسكە قوسىلادى. ال، 2026 جىلى «جانۇيا» جشس-ڭ ەمدىك بالشىق پەن جىلى سۋمەن ەمدەۋ ورتالىعىن ىسكە قوسۋ كوزدەلگەن، – دەدى اۋدان باسشىسى.
بۇدان بولەك، اۋدانداعى ءشاۋىلدىر اۋىلىندا «جايلى مەكتەپ» ۇلتتىق پيلوتتىق جوباسى اياسىندا 600 ورىندىق مەكتەپ قۇرىلىسى جۇرگىزىلۋدە. نىسان 2024 جىلدىڭ 15 جەلتوقسانىنا دەيىن پايدالانۋعا بەرىلمەك. سونداي-اق، «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا اققۇم اۋىلىنان دارىگەرلىك امبۋلاتوريا قۇرىلىسى مەن شىتتى اۋىلىنان فەلدشەرلىك-اكۋشەرلىك نىساننىڭ قۇرىلىسى جۇرگىزىلۋدە. عيماراتتار 2024 جىلدىڭ 1 جەلتوقسانىنا دەيىن ەل يگىلىگىنە بەرىلەدى.
ينفراقۇرىلىممەن قامتۋ بويىنشا اۋدانداعى 37 ەلدى مەكەننىڭ 35ء-ى ورتالىقتاندىرىلعان اۋىز سۋ جۇيەسىمەن قامتىلعان. قالعان ەكى ەلدى مەكەندى اۋىز سۋمەن قامتۋ جۇمىستارى جۇرگىزىلۋدە. 2018-2023 جىلدار ارالىعىندا 21 ەلدى مەكەن تابيعي گاز جۇيەسىنە قوسىلىپ، جالپى اۋدان حالقىنىڭ گازبەن قامتىلۋ دەڭگەيى 71،4 %-عا جەتكەن. 2024 جىلى «اۋىل – ەل بەسىگى» باعدارلاماسى اياسىندا 13،7 شاقىرىمدىق 7 ىشكى كوشەگە، جەرگىلىكتى بيۋدجەت قارجىسى ەسەبىنەن 34،8 شاقىرىمدىق 29 كوشەگە ورتا جانە اعىمداعى جوندەۋ جۇمىستارى ءجۇرىپ، قاناعاتتانارلىق دارەجەدەگى جولدار ۇلەسى 80،1%-دى قۇراپ وتىر.
