جىل سايىن ەلىمىزدە «وتباسى بانك» اق باعدارلامالارى ارقىلى قۇتتى قونىسىنا قول جەتكىزگەن قازاقستاندىقتار قاتارى ارتىپ كەلەدى. تاياۋدا ولاردىڭ ساپىنا ماڭعىستاۋ وبلىسىنىڭ ءبىر توپ ازاماتى دا قوسىلدى. بۇل ءوڭىردىڭ جۇرتشىلىعى بانك ۇسىنعان باعدارلامالار ارقىلى پاتەر كىلتتەرىن قولعا الدى.
سونداي باقىتقا بولەنگەن جانداردىڭ ءبىرى - تاڭسۇلۋ اباتايەۆا. ول سەگىز جىل بويى باستاۋىش سىنىپ وقۋشىلارىن ءبىلىم نارىمەن سۋسىنداتىپ جۇرگەن ارداقتى ۇستاز، كوپبالالى انا.
«جولداسىم جەكە مەنشىك كومپانيادا ءورت ءسوندىرۋ تەحنيكاسىنىڭ جۇرگىزۋشىسى بولىپ جۇمىس ىستەيدى. اتا-ەنەمەن تۇرىپ، ءۇش ۇل مەن ءبىر قىزدى تاربيەلەپ وتىرمىز. بالالارىمىزدىڭ بولاشاعى ءۇشىن پاتەر الۋدى ويلاستىرىپ، وسىدان ەكى جىل بۇرىن «وتباسى بانكىندە» شوت اشقان ەدىك. ءوتكەن جىلدىڭ سوڭىندا «ماڭعىستاۋ جاستارى» باعدارلاماسى تۋرالى ءبىلىپ، قۇجاتتار تاپسىردىم. ءساتى ءتۇسىپ، ءوتىنىشىم ماقۇلداندى. ءسويتىپ، ەكى بولمەلى پاتەر يەسى اتاندىق.
باعدارلامانىڭ باسىم تۇسى - باستاپقى جارنانىڭ نەبارى 10% بولۋى. بۇل - جاستار ءۇشىن كوپ كومەك. جىلدىق پايىزدىق مولشەرلەمە دە تومەن. ەكى بولمەلى پاتەر ءۇشىن اي سايىن 105 مىڭ تەڭگە تولەيمىز. سالىستىرار بولساق، جاڭاوزەندە ءۇيدى جالعا الۋدىڭ اقىسى - كەمىندە 160 مىڭ تەڭگە. دەمەك، باعدارلاماعا قاتىسۋشىلار ءۇشىن ۇتىمدى تۇسى كوپ»،-دەيدى جاس ۇستاز.
جاستارعا ارنالعان جوبانى جۇزەگە اسىرۋ ءۇشىن جەرگىلىكتى اكىمدىك 500 ملن تەڭگە ءبولدى. «وتباسى بانك» اق دا وسىنداي كولەمدەگى قارجى قاراستىردى. سول ارقىلى جاستار اقتاۋ قالاسىنان ءۇي الۋ ءۇشىن 15 ملن تەڭگە، جاڭاوزەندە باسپانالى بولۋ ماقساتىندا 10 ملن تەڭگەگە دەيىن نەسيە رەسىمدەي الادى. جىلدىق پايىزدىق مولشەرلەمە 6% (جتسم 6،2% دان 6،6% دەيىن)،باستاپقى جارنا بار-جوعى 10% بولادى.
«وتباسى بانكپەن» بىرلەسىپ جاستار ءۇشىن قولعا الىنعان باعدارلاما استانا، الماتى قالالارى مەن الماتى، قاراعاندى، قوستاناي، جامبىل، اباي، ۇلىتاۋ، پاۆلودار وبلىستارىن دا قامتيدى. بۇل رەتتە 18 بەن 35 جاس ارالىعىنداعى 1 ميلليوننان استام قازاقستاندىق تۇرعىن ءۇي الۋ ءۇشىن جيناق شوتىن اشقانىن اتاپ ءوتۋ كەرەك. سول ارقىلى ۇستاز، دارىگەر، مادەنيەت پەن سپورت قىزمەتكەرلەرى، جوو وقىتۋشىلارى مەن عىلىمي قىزمەتكەرلەر، الەۋمەتتىك سالا، ازاماتتىق قورعانىس، اۋىل شارۋاشىلىعىندا قىزمەت ەتەتىن جاستار ءتيىمدى جولمەن قالاعان ءۇيىن الا الادى.
ال جۇمىسشى ماماندىق وكىلدەرى ءۇشىن «ناۋرىز جۇمىسكەر» باعدارلاماسى قولايلى. ول ەنەرگەتيكا، ءوندىرىس، قۇرىلىس، كولىك سىندى سالالاردا ەڭبەك ەتىپ جۇرگەن جاندارعا باعىتتالعان. جۇمىسشى ماماندىقتار جىلى اياسىندا ىسكە قوسىلعان باعدارلاما ارقىلى ەكى مىڭعا جۋىق قىزمەتكەر قونىس تويىن تويلاپ ۇلگەردى.
باعدارلاما ماڭعىستاۋ وبلىسىندا دا ءساتتى ىسكە اسۋدا. ايتالىق، جاڭاوزەن قالاسىنداعى «وزەنينۆەست» كوممۋنالدىق مەكەمەسىندە 10 جىلدان بەرى سۋ رەسۋرستارىن باقىلاۋ جانە ەسەپتەۋ ءبولىمىنىڭ شيكيزات ينسپەكتورى قىزمەتىن اتقارىپ جۇرگەن اينۇر سەيىتجان قىزى اتالمىش باعدارلاما بويىنشا قالانىڭ قاق ورتاسىنان جاڭا ەكى بولمەلى پاتەر ساتىپ الدى.
«جولداسىم ەكەۋىمىز جەكە ءۇيىمىز بولعانىن قالاپ، 2021 جىلى «وتباسى بانكتە» شوت اشتىق.بيىل بانكتىڭ الەۋمەتتىك جەلىدەگى پاراقشاسىنان «ناۋرىز جۇمىسكەر» (7 % جتسم 7،1% دان 9،6% عا دەيىن. 9% جتسم 9.4% دان 13% عا دەيىن) باعدارلاماسى تۋرالى ءبىلىپ، ءتيىستى قۇجاتتاردى تاپسىردىم. بارلىق تالاپقا ساي كەلىپ، ارمانىمىز ورىندالدى. جاڭادان سالىنعان زاماناۋي ۇيدەن ەكى بولمەلى پاتەر بۇيىردى. اتاپ وتەر جايت، مەن تۇرعىن ءۇي كەزەگىندە تۇرعان بەس بالانىڭ اناسى بولعاندىقتان، نەسيە 7%-دىق مولشەرلەمەمەن عانا بەرىلدى. وعان قوسا، ماڭعىستاۋ وبلىسىنىڭ اكىمدىگى 1 ميلليون تەڭگەلىك تۇرعىن ءۇي سەرتيفيكاتىن تابىستادى. بۇل كوپبالالى وتباسىمىزعا زور قولداۋ بولدى»،- دەيدى اينۇر سەيىتجان قىزى.
جاڭاوزەندىك قاناعات سۇەسىنوۆ تە «ناۋرىز جۇمىسكەر» باعدارلاماسىنىڭ يگىلىگىن كوردى. وسىدان بىرنەشە جىل بۇرىن مۇناي سالاسىندا ەڭبەك جولىن باستاعان ول بىردەن بەس بولمەلى پاتەر يەسى اتاندى.
«ءار بالا اتا-اناسىنىڭ ءۇمىتىن اقتاپ، ولاردى قۋانتۋدى قالايدى دەپ ويلايمىن. مەن دە ارىپتەسىمنەن «ناۋرىز جۇمىسكەر» باعدارلاماسى تۋرالى ەستىگەن سوڭ ءۇي الۋدى ويلاستىردىم. شىنى كەرەك، جۇمىسقا تاياۋدا عانا ورنالاسقاندىقتان، قوماقتى سوما جينالعان شوتىم بولعان جوق. بۇل باعدارلامانىڭ باسىم تۇسى سول، تەز ارادا باسپانا الۋعا مۇمكىندىك بار. نەبارى ءۇش-تورت ايدىڭ ارالىعىندا اقشا جيناپ، «وتباسى بانكتەگى» شوتىمدى قاجەتتى سوماعا تولتىردىم. سول ارقىلى 20 ملن تەڭگەنىڭ پاتەرىن الۋ ءۇشىن 10 جىلعا يپوتەكالىق نەسيە الدىم. ونىڭ باسقا بانكتەرگە قاراعاندا پايىزى دا ايتارلىقتاي تومەن. نەبارى 9%-دىق مولشەرلەمەمەن (جتسم 9.4% دان 13% عا دەيىن) ەسەپتەلدى. بۇعان دەيىن اتا-اناممەن ەكى بولمەلى پاتەردە تۇرساق، ەندى بەس بولمەلى باسپاناعا جايعاستىق. اكەم مەن انامنىڭ قۋانىشىندا شەك جوق. ءبىزدى وسىنداي باقىتقا بولەگەن «وتباسى بانككە» ايتار العىسىم زور»،-دەپ تۇيىندەدى جاس مامان.
«وتباسى بانك» جاڭاوزەن قالاسىندا ءوز كليەنتتەرى ءۇشىن ۇيىمداستارعان كەڭ اۋقىمدى Open Air شاراسىندا ماقساتىنا جەتكەن ماڭعىستاۋلىقتاردى قۇتتىقتادى. ولاردىڭ قاتارىندا كەيىپكەرلەرىمىز دە بار. اشىق اسپان استىندا وتكەن ايتۋلى شاراعا 800-دەن استام ادام جينالدى. ولارعا بانك ءونىمدەرىنىڭ ءتۇرى-تۇرى تانىستىرىلىپ، تانىمال ەستارادا جۇلدىزدارى ءوز ونەرلەرىن پاش ەتتى.. الداعى ۋاقىتتا وسى شاراعا كۋا بولعان تۇرعىندار دا بانك باعدارلامالارىنىڭ قاتىسۋشىلارى قاتارىنا قوسىلىپ، قونىس تويىن تويلايدى دەگەن ۇمىتتەمىز.
