بۇگىن تۇركىستان وبلىسى تولەبي اۋدانىنداعى «تاۋ سامالى» دەمالىس ايماعىندا «AMANAT» پارتياسىنىڭ جىل سايىنعى رەسپۋبليكالىق جاستار ساياسي لاگەرى ءوز جۇمىسىن باستادى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
پارتيا جانىنداعى «جاستار رۋحى» جاستار قاناتىنىڭ ۇيىمداستىرۋىمەن ءوتىپ جاتقان اۋقىمدى شاراعا رەسپۋبليكالىق مارتەبەسى بار 3 قالا مەن 17 وڭىردەن 300-دەن استام دەلەگاتتار قوسىلدى. دەلەگاتتار 4 كۇنگە سوزىلاتىن شارادا «Bir Tolqynda» ديالوگ الاڭىنىڭ، تاقىرىپتىق پانەلدىك سەسسيالار مەن وقىتۋ سەمينارلارىنىڭ جۇمىسىنا قاتىسادى.
جاستارعا ارنالعان ساياسي لاگەردىڭ جۇمىسىنا «جاستار رۋحى» جاستار قاناتىنىڭ مۇشەلەرى، دەپۋتاتتار، جاستاردى قولداۋ جونىندەگى رەسپۋبليكالىق جانە وڭىرلىك كەڭەستەردىڭ مۇشەلەرى، جاستار ساناتىنداعى قوعامدىق پىكىر كوشباسشىلارى، جاستار ۇيىمدارىنىڭ كوشباسشىلارى مەن وكىلدەرى، ەرىكتىلەر، ەكو-بەلسەندىلەر، جاس كاسىپكەرلەر، عالىمدار، سپورتشىلار، شىعارماشىلىق جاستار قاتىسىپ جاتىر.
شارانىڭ ماقساتى - بەلسەندى قازاقستاندىق جاستاردى پارتيالىق جوبالار مەن باستامالاردى ىسكە اسىرۋعا جۇمىلدىرۋ، ولاردىڭ زاماناۋي داعدىلاردى يگەرۋگە قابىلەتىن ارتتىرۋ ماقساتىندا ءوتىپ جاتىر. سونداي-اق بۇل شارا جاس بەلسەندىلەر اراسىنان جاڭا تولقىنداعى ساياسي كوشباسشىلاردى دايارلاۋعا مۇمكىندىكتەردى كەڭەيتۋگە قىزمەت ەتەدى.
اشىلۋ سالتاناتىندا جاستار ءۇشىن جەكە جانە كاسىبي قاسيەتتەرىن دامىتۋعا ارنالعان ءتۇرلى باعىتتاعى ترەنينگتەر، تيمبيلدينگتەر جانە «Bir tolqynda» ديالوگ الاڭى وتكىزىلىپ، جاستاردى تولعاندىراتىن ءتۇرلى تاقىرىپتار شەڭبەرىندە پىكىر الماسۋلار وتەدى دەپ جوسپارلانۋدا.
جۇمىسىن بۇگىن رەسمي تۇردە باستاعان رەسپۋبليكالىق ساياسي لاگەر 24 تامىزعا دەيىن جالعاسادى.
اشىلۋ راسىمىندە «AMANAT» پارتياسىنىڭ «جاستار رۋحى» جاستار قاناتىنىڭ ءتوراعاسى، اقەركە يسكاندەروۆا، ءسوز سويلەپ، پارتيانىڭ جاس بەلسەندىلەرىن تۇركىستان وبلىسىندا كورگەنىنە قۋانىشتى ەكەنىن جەتكىزدى.
«ورتامىزدى تولتىرىپ جاتقاندارىڭىزعا العىسىمىزدى ءبىلدىرىپ، قوش كەلدىڭىزدەر دەگىم كەلەدى. لاگەردىڭ جۇمىسىن رەسمي تۇردە اشىق دەپ جاريالايمىز»،- دەدى ول.
لاگەردىڭ ءبىرىنشى كۇنىندەگى باعدارلامادا قاتىسۋشىلار ساياسي لاگەردىڭ اشىلۋ سالتاناتىنا قاتىسىپ، تيمبيلدينگتە جاستار توپتارعا ءبولىنىپ، دەمالىس ايماعىنىڭ جۇمىسىمەن تانىستى. QUIZ ويىندارى ويناتىلىپ، ءار وڭىردەن كەلىپ، باس قوسقان جاستاردىڭ ساۋىق كەشى ايماقتاردىڭ كونسەرتتىك باعدارلاماسىمەن جالعاستى.
