وسكەمەن قالاسىنا جاڭا اكىم تاعايىندالدى. بۇعان دەيىن بۇل قىزمەتتى جاقسىلىق ومار اتقارعان، دەپ حابارلايدى Dalanews.kz.
ق ر پرەزيدەنتىنىڭ اكىمشىلىگىمەن جانە قالالىق ءماسليحات دەپۋتاتتارىمەن كەلىسە وتىرىپ، شىعىس قازاقستان وبلىسى اكىمىنىڭ وكىمىمەن اقىشوۆ المات تالعات ۇلى وسكەمەن قالاسى اكىمىنىڭ لاۋازىمىنا تاعايىندالدى.
ول - شىعىس قازاقستاننىڭ تۋماسى. وسكەمەندە ءوسىپ، ەڭبەك جولىن دا وسىندا باستاعان. ءار جىلدارى تۋريزم، دەنە شىنىقتىرۋ جانە سپورت باسقارماسىندا، اۋىل شارۋاشىلىعى مينيسترلىگىندە قىزمەت اتقاردى. ۇلان اۋدانى اپپاراتىنىڭ باسشىسى، اياگوز اۋدانى اكىمىنىڭ ورىنباسارى، شقو ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىسى بولدى. سوڭعى ەكى جىلدا كۇرشىم اۋدانىنىڭ اكىمى لاۋازىمىندا جۇمىس ىستەدى. ەڭبەك ءوتىلى 14 جىلدى قۇرايدى، ونىڭ 12 جىلى مەملەكەتتىك قىزمەتتە ءوتتى. سونداي-اق المات تالعات ۇلى پرەزيدەنتتىك جاستار كادرلىق رەزەرۆىنىڭ مۇشەسى، ونىڭ وڭىرلەردى دامىتۋ سالاسى بويىنشا ماگيسترلىك دارەجەسى دە بار.
شىعىس قازاقستان وبلىسىنىڭ اكىمى ەرمەك كوشەربايەۆ المات اقىشوۆتىڭ ەكونوميكا، ەنەرگەتيكا جانە تۇرعىن ۇي-كوممۋنالدىق شارۋاشىلىق سالاسىنداعى مول تاجىريبەسىن ەسكەرىپ، وعان وبلىس ورتالىعىنىڭ الەۋمەتتىك-ەكونوميكالىق كورسەتكىشتەرىن دامىتۋدى قامتاماسىز ەتۋدە زور جاۋاپكەرشىلىك ارتىلاتىنىن اتاپ ءوتتى.
ايماق باسشىسى جاڭا تاعايىندالعان اكىمگە ەكولوگيا مەن كوشەلەردى جارىقتاندىرۋ ماسەلەلەرىن نازارعا الا وتىرىپ، قالانى ودان ءارى دامىتۋ بويىنشا ۇسىنىستار ازىرلەۋدى تاپسىردى. سونىمەن قاتار ەكونوميكا، قۇرىلىس، اباتتاندىرۋ جانە الەۋمەتتىك سالاداعى ماڭىزدى جوبالاردى اياقتاۋدى جۇكتەدى.
تۋريستىك الەۋەتتى ارتتىرىپ، وبلىس ورتالىعىنىڭ كەلبەتىن جاقسارتۋ ءۇشىن بيزنەس نىسانداردىڭ ءبىرىڭعاي ديزاين-كودىن ەنگىزۋ تۋرالى ۇسىنىستار دايىنداۋ تاپسىرىلدى.
سونداي-اق وبلىس اكىمى قالانىڭ ماڭىزدى ءارى سەرپىندى جوبالارىن جۇزەگە اسىرۋ ءۇشىن ينۆەستورلاردى تارتىپ، وسى جانە باسقا دا تاپسىرمالار جونىندە ءتيىستى جول كارتاسىن دايىنداپ، تەز ارادا بەكىتۋگە ۇسىنۋدى جۇكتەدى.
- قالا تۇرعىندارى ءوز اۋىزبىرشىلىگىن كورسەتىپ، وسكەمەننىڭ وزەكتى ماسەلەلەرىن شەشۋگە بەلسەنە اتسالىسادى دەپ ويلايمىن، - دەدى ەرمەك كوشەربايەۆ.
