وسكەمەن قالاسىنىڭ ماڭايىندا ورنالاسقان ساياجاي اۋماعىنىڭ تۇرعىندارى وسىمەن بىرنەشە جىل قاتارىنان نە جارىقسىز، نە سۋسىز كۇن كورىپ كەلەدى. اكىمدىكتىڭ تابالدىرىعىن توزدىرۋدان شارشاعان قالا تۇرعىندارىنىڭ شاعىمىن قالا باسشىلىعى دا ەسكەرمەي كەلەدى.

وبلىستىق قوعامدىق كەڭەس جانىنداعى ساياجاي اۋماعى بىرلەستىكتەرى ماسەلەسى جونىندەگى جۇمىس توبىنىڭ كەزەكتى وتىرىسى بارىسىندا اتالعان ماسەلە باستى نازارعا الىندى. قۇزىرلى ورگاندارعا شاعىمدانۋدان شارشاعان ساياجاي تۇرعىندارى دا وتىرىسقا قاتىسىپ، ىشكى جانايقايىمەن ءبولىستى.

– ءبىز وسىمەن جەتىنشى جىل قاتارىنان سۋسىز، جارىقسىز كۇن كورىپ كەلەمىز. ەلدەر سۋدى فلياگامەن تاسيدى. ال جولىمىزدى جول ەپ اتاۋدىڭ ءوزى مۇمكىن ەمەس. سەبەبى كوكتەم، كۇز مەزگىلدەرىندە ەزىلگەن بالشىقتان ءجۇرۋ مۇمكىن ەمەس، – دەپ «زۆەزدنىي» ساياجاي اۋماعىنىڭ تۇرعىنى نارازىلىعىن ءبىلدىردى.

ءبىر قىزىعى وتىرىسقا وسكەمەن قالاسى اكىمىنىڭ ورىنباسارى ەرجان قوڭىربايەۆ، قالا اكىمىنىڭ كەڭەسشىسى مۇرات ورازالين، تۇكش، جولاۋشىلار كولىگى جانە اۆتوموبيل جولدارى ءبولىمى باسشىسىنىڭ ورىنباسارى اسەت كۋرىمبايەۆ، قالا اكىمى اپپاراتىنىڭ باس مامانى فارحات جىلىبايەۆ، ساياجاي اۋماعى بىرلەستىگىنىڭ ءتورايىمى ليديا زۋيەۆا قاتىسۋى كەرەك بولعان. الايدا جوعارىدا اتالعان اتقامىنەرلەردىڭ ەشقايسىسى قاراسىن كورسەتپەدى.

– بىرىنشىدەن بارلىق ساياجاي اۋماقتارى بويىنشا ساراپتاما جۇرگىزىپ، تىركەلگەن تۇرعىنداردىڭ ەسەبىن جۇرگىزىپ، بوس جاتقان اۋماقتاردى انىقتاۋ قاجەت. بۇل ورايدا «نۇر وتان» پارتياسى وسكەمەن قالاسى فيليالى ءتوراعاسىنىڭ ءبىرىنشى ورىنباسارى مايراش ەكىباسوۆانىڭ ۇسىنىسىمەن ۇلكەن جۇمىس توبى قۇرىلىپ، ول توپقا بارلىق مەملەكەتتىك ورگاندار مەن ءماسليحات دەپۋتاتتارى كىرگەننەن كەيىن عانا، ساياجاي اۋماقتارىن سۋ جانە جارىقپەن قامتاماسىز ەتۋ بويىنشا شەشىم قابىلداۋعا بولادى، – دەدى وبلىستىق ءماسليحات دەپۋتاتى ولەگ چەرنىشوۆ.

وتىرىس شەشىمى بويىنشا قوعامدىق كەڭەس بەلسەندىلەرى ق ر كونستيتۋسياسىنا ساي ساياجاي تۇرعىندارىنىڭ قۇقىعىن قورعاۋ ماقساتىندا ساياجاي اۋماعىنا ءتيىستى زاڭ قابىلداۋ ءۇشىن پارلامەنتكە ۇسىنىس جولداماق.