بولاشاقتا ديپلوماتيا جانە سىرتقى ساياسات پەن ەكونوميكا سالاسىندا جۇمىس ىستەۋدى ارماندايتىن شىعىس قازاقستاننىڭ ستۋدەنتتەرى مەن مەكتەپ وقۋشىلارى اعىلشىن تىلىندەگى "بىرىككە ۇلتتار ۇيىمى مودەلى" ايماقارالىق بايقاۋىنا قاتىسىپ، وزدەرىنىڭ بىلىكتىلىكتەرىن سىنادى.



ەلباسى نۇرسۇلتان نازاربايەۆ ءوزىنىڭ قازاقستان حالقىنا ارناعان جولداۋىندا ادام كاپيتالىن دامىتۋ – ەلىمىزدى وركەندەتۋدىڭ بىردەن-بىر جولى ەكەنىن اتاپ وتكەن بولاتىن. وسى رەتتە جاستاردىڭ شەت ءتىلىن مەڭگەرىپ، ساياسي بىلىكتىلىك پەن مادەني اشىقتىققا ۇمتىلۋ ولاردىڭ ءبىلىمدى ازامات بولىپ قالىپتاسۋىنا كەڭىنەن جول اشا تۇسەتىنى بەلگىلى. وسى تۇرعىدان الىپ قاراعاندا جاستاردىڭ بىرنەشە ءتىل مەڭگەرۋگە ۇمتىلۋى بولاشاقتا ەلىمىزدىڭ باسەكەگە قابىلەتتىلىگىن ارتتىرا تۇسەتىنى ءسوزسىز.

وسى رەتتە شىعىس قازاقستان وبلىسىندا ۇيىمداستىرىلعان "بۇۇ مودەلى" ايماقتىق بايقاۋى جاستاردى كەلەشەكتە ۇلكەن ساياساتتا ەلىمىزدىڭ ابىروي-بەدەلىن اسقاقتاتۋعا قىزىعا ءتۇستى. بايقاۋ بارىسىندا ءاربىر جاس وزدەرىن جەكەلگەن ەلدىڭ وكىلى رەتىندە ءوز ەلىنىڭ مۇددەسىن قورعاپ، حالىقارالىق ماسەلەلەردى وڭ باعىتتا شەشۋگە بارىنشا تالپىندى.

باستان اياق اعىلشىن تىلىندە وتكەن بايقاۋدا شىعىسقازاقستاندىق جاستاردىڭ اعىلشىن ءتىلىن ءبىر كىسىدەي مەڭگەرگەنىنە كوزىمىز جەتە ءتۇستى.

بايقاۋ بارىسىنداعى پىكىرتالاستارعا اعىلشىن ءتىلىن جەتىك بىلەتىن وقىتۋشىلار ارالاسىپ، جاستارعا كۇردەلى سۇراقتار قويعاندا، ولار ءاربىر سۇراققا بايىپپەن جاۋاپ بەرىپ، وزدەرىن كانىگى ساياساتكەرلەردەي كورسەتتى ايتا كەتۋىمىز كەرەك. ءوز كەزەگىندە جاستاردىڭ تالىمگەرلەرى:

– بىزدەر بۇل بايقاۋدى العاش رەت ۇيىمداستىرىپ وتىرمىز. ناتيجەسى جامان ەمەس. شاراعا الەۋمەتتىك بەلسەندى جاستاردىڭ ءبارى قاتىسۋعا ىقىلاس تانىتتى. مەنىڭشە، بايقاۋ جاستاردىڭ ويلاۋ قابىلەتىن دامىتىپ، كەلىسسوز جۇرگىزۋدە مول تاجىريبە جيناۋىنا مۇمكىندىك تۋعىزدى دەپ ەسەپتەيمىن. سوندىقتان مۇنداي بايقاۋلاردى ءجيى ۇيىمداستىرىپ تۇرۋ كەرەك، – دەدى كاسۋ  پرەزيدەنتى گالينا كونوپيانوۆا.

شارانىڭ سوڭىندا بايقاۋعا قاتىسىپ، بەلسەندىلىك تانىتقان جاستاردىڭ بارىنە سەرتيفيكات تاپسىرىلدى. ال ۇزدىك دەلەگاتتار باعالى سىيلىقتارعا يە بولدى.

https://dalanews.kz/35047