وسكەمەن قالاسىندا «شقو مەملەكەتتىك-جەكەشەلىك ارىپتەستىك وڭىرلىك ورتالىعى» اق-نىڭ بۇرىنعى باسشىسى باتىربايەۆ جانە باسقا دا تۇلعالارعا قاتىستى بيۋدجەت قاراجاتىن جىمقىرۋ، كاسىپكەرلىك قىزمەتكە زاڭسىز قاتىسۋ جانە قىلمىستىق جولمەن الىنعان كىرىستەردى زاڭداستىرۋ فاكتىلەرى بويىنشا ايىپتاۋ ۇكىمى شىعارىلدى، دەپ حابارلايدى Dalanews.kz.
2019 جىلى وسكەمەن جانە سەمەي قالالارىنداعى كوشە جارىعى جۇيەلەرىن جاڭعىرتۋدى كوزدەيتىن جوبا ىسكە قوسىلعان. جوبا اياسىندا ەلەكتر ەنەرگياسىن ەداۋىر ۇنەمدەۋ جانە جارىق ساپاسىن ارتتىرۋ ماقساتىندا ەسكى جارىقتاندىرۋ قۇرالدارىن ەنەرگيا ۇنەمدەيتىن جارىقديودتى شامدارعا اۋىستىرۋ جوسپارلانعان.
الايدا جوبا اياسىندا كۇدىكتىلەر جابدىقتار مەن جۇمىستاردىڭ قۇنىن نەگىزسىز ءوسىرىپ، جالپى سوماسى 320 ملن تەڭگە زالال كەلتىرىلگەن.
سونىمەن قاتار قىلمىستىق جولمەن الىنعان كىرىستەردى زاڭداستىرۋ ماقساتىندا اتالعان اكسيونەرلىك قوعامنىڭ بۇرىنعى باسشىسى سەنىمدى تۇلعانىڭ اتىنا ج ش س تىركەپ، ونى جالعان شارتتار ارقىلى قاراجاتتى قولما-قول اقشاعا اينالدىرۋ ءۇشىن قوسالقى مەردىگەر ۇيىم رەتىندە پايدالانعان.
سوت ۇكىمىمەن د.ب. باتىربايەۆ، يۋ.گ. حاليتوۆ جانە ن.ت. پاپىشيەۆقا 7 جىلعا باس بوستاندىعىنان ايىرۋ جازاسى تاعايىندالىپ، ازاماتتىق تالاپ قاناعاتتاندىرىلدى.
سونداي-اق قىلمىستىق جولمەن الىنعان قاراجاتقا ساتىپ الىنعان مۇلىك، تۇرعىن ءۇيى بار جەر ۋچاسكەسى مەن اۆتوكوتەرگىش تاركىلەندى.
ۇكىم زاڭدى كۇشىنە ەندى.
