قازاقستان بيلىگىنە پارلامەنتتىك رەسپۋبليكا بولۋىنا، دەموكراتيالىق باعىتقا بۇرىلىپ، ليبەراليزاسيا جۇرگىزۋگە رەسەيدىڭ وكتەم ساياساتى قولبايلاۋ بولىپ وتىر؟ وسى ساۋالدى Ulysmedia.kz جىلدى قورىتىندىلاعان ساياساتكەر، قازاقستاننىڭ بۇرىنعى پرەمەر-مينيسترى اكەجان قاجىگەلدينگە قويىپ كوردى، دەپ جازادى Dalanews.kz.
"ءبىز دە قىزمەتتە بولدىق قوي ءبىر كەزدە. ماعان چەرنومىردين (رەسەي مينيسترلەر كەڭەسىنىڭ ءتوراعاسى بولعان) بولسىن نەمەسە ەلسين (رەسەي پرەزيدەنتى بولعان) بولسىن، تەلەفوندى جۇلىپ الىپ، نۇسقاۋ بەرە المايتىن. ماسەلە پۋتيندە عانا ەمەس، ماسەلە بىزدە. نامىسىڭ بولسا، جۇرەگىڭ بولسا، مىنەزىڭ بولسا، قاي جەرى اكەتىپ بارا جاتىر انالاردىڭ؟ مەن ولاردىڭ اراسىندا بىرگە ءوستىم، مەكتەپتە وقىدىم، اسكەردە بولدىم، ينستيتۋتتا وقىدىم، جاتاقحانادا جاتتىم. مىنەزىڭدى كورسەتسەڭ، سىيلايدى. سىيلاۋدان باسقا ەشتەڭە كەرەگى جوق. ولار ءبىزدى جالعاندا جاقسى كورمەيتىن دە شىعار، كەرەگى دە جوق بىزگە"، - دەيدى ول.
ساياساتكەردىڭ ايتۋىنشا، سوندىقتان "ويباي موسكۆا، ويباي پۋتين" دەگەن ارگۋمەنتتى سىلتاۋ دەپ ەسەپتەيدى.
"وزىمىزدەن ءبارى. ءدال ءقازىر وزگەرىسكە بۇرىلاتىن جاعداي بولىپ جاتىر. مىنا سيريادا جاعداي نەدەن بولدى؟ سيرياداعى جاعداي، ولاردىڭ ارتىندا تۇرعان ەكى ۇلكەن مەملەكەتتىڭ قۋاتىن جوعالتىپ بارا جاتقان سەبەبىنەن بولعان نارسە. يران مەن رەسەي! مەملەكەتتىڭ كەلەشەگىن ساقتاۋ تۇرعىسىندا ماسەلەنى تالقىلايتىن بولساق، وندا قاسىم-جومارت كەمەل ۇلى توقايەۆتىڭ جاساپ جاتقان ارەكەتتەرى وتە دۇرىس. ەكىنشىدەن، پايدالى. ۇشىنشىدەن، كورىنبەسە دە، ساياسي جەتىستىكتەر بار"، - دەيدى ول.
سونداي-اق اتالعان باسىلىمعا بەرگەن سۇقباتىندا قاجىگەلدين نازاربايەۆپەن بولعان اراداعا اڭگىمەسىنە دە توقتالادى.
– 2024 جىلى نازاربايەۆ اۋلەتى جايىندا از ايتىلعان جوق. سامات ءابىش تە، قايرات ساتىبالدى دا بوستاندىققا شىقتى. جاقىندا پۋتينمەن كەزدەستى. قالاي ويلايسىز، نازاربايەۆ ماسەلەسى نەگە ءالى ءبىرجاقتى بولماي تۇر؟ نەگە ءالى شۋلاتىپ جاتىر؟
– مەن سىرتتاي سوتتالعانمىن، نۇرەكەڭ ەكەۋمىز ەۋروپادا كەزدەستىك. سوندا تالاي اڭگىمەلەردى تالقىلادىق. مەن: "نۇرەكە، ومىر-كەزەك دەگەن بار. بەتىن اۋلاق قىلسىن، ءبىراق ۋاقىتىندا كەتپەيتىن بولساڭىز، كۇيەۋ بالاڭىزدى توقتاتپاساڭىز، ونى شەتەلگە ءبىر قىزمەتكە جىبەرمەسەڭىز، جاعداي وزگەرىپ كەتۋى مۇمكىن. سول كەزدە ماڭايىڭىزدا كىم قالاتىنىن كورەمىز" دەدىم.
– ءسويتىپ اشىق ايتتىڭىز با؟
– اشىق ايتتىم. "مەن ولاردى نە ىستەۋىم كەرەك"، - دەدى ول كىسى. "مۇسايەۆ پەن ر.الييەۆتى ۇكىمەتتىك جۇمىستان بوساتىپ، سونىمەن قۇتىلىڭىز" دەدىم. ال ەڭ دۇرىس جول – راحاتتى اۋسترالياعا، جاڭا زەلانديا، چيلي نەمەسە ارگەنتيناعا ەلشى رەتىندە تاعايىنداپ جىبەرسەڭىز، سوندا عانا ءوزىڭىز دە، ەل دە تىنىش بولادى دەدىم. ارينە، ءتۇسىنىپ وتىرمىن عوي تۋىس ەكەنىن. سوندا ول كىسى كەلىسكەندەي بولدى دا، ءبىراق مەنىڭ اقىلىمدى التى جىلدان كەيىن قابىلدادى. مەن مۇنى نەگە ايتىپ وتىرمىن. ارينە، ول كىسى 30 جىلداي وتىردى عوي بيلىكتە. بۇگىنگى حالىقارالىق اقپاراتتى وقىساڭىز، پرەزيدەنت قاتارلى پرەزيدەنتتەر اراسىندا ول ەڭ باي ادام. ونىڭ بايلىعى ساۋد ارابيا كورولىنىڭ بايلىعىمەن شامالاس. سوندىقتان ونى ءبىز بولماساق تا، شەتەلدەگى ب ا ق اتاپ وتىرادى. ءبىراق ول كىسى ءدال وسىنداي كۇيگە ءتۇسىپ قالامىن دەپ ويلاماسا كەرەك. ماڭايىندا بولىپ جاتقان بار جاعداي ول كىسىنىڭ ءوز قولىندا. مىسالى، 2019 جىلى ءوزى تاعايىنداپ، بيلىكتى بەرگەن توقايەۆتى ءوزى تۇرتپەكتەپ، مازاسىن قاشىردى. نەگە 2022 جىلى قاڭتار وقيعاسىنا دەيىن جەتكىزدى؟ ال سامات پەن قايراتتى ماسكەۋ مەن مينسكىنىڭ قولداۋىمەن الىپ شىقتى تۇرمەدەن. ەكى باسشى سول كىسىنىڭ ءسوزىن سويلەپ، قاسىم-جومارتقا ايتا بەرىپ، قايراتتى اباقتىدان سولاي الىپ شىقتى. ارينە، ءوز قانى، تۋعانى عوي. تۋعان بالاسىنداي بولىپ كەتكەن قوس ءىنىسىن شىرىلداپ قورعاپ جۇرگەنى ءبىر جاعىنان جاراساتىن سياقتى. ءبىراق وسى جولعى بارعانىنىڭ ار جاعىندا نە تۇرعانىن كىم ءبىلسىن؟ انىق نارسە، ول جەردە قازاقستاننىڭ كەلەشەگى تۋرالى اڭگىمە بولعان جوق. مۇمكىن تاعى دا بىردەڭەنى سۇراعان شىعار. بۇل جاعدايدى رەسەي دە قولداندى. قايتا-قايتا زۆانداپ، قويماعان سوڭ قابىلدادى دەدى، بۇل – ءبىر. ەكىنشىدەن، بۇل – كرەملدىڭ استاناعا جىبەرگەن مەسسەندجى. ق.توقايەۆ دەنساۋلىعى جاقسى بولسا، قىزمەتتەن كەتپەيدى، بىزگە ول كىسىنىڭ قىزمەتتەن كەتكەنىنىڭ كەرەگى جوق. توقايەۆ نازاربايەۆ ەمەس. سوندىقتان 2029 جىلعا دەيىن پرەزيدەنت بولىپ وتىرعانىن قالاۋىمىز كەرەك. سىزدەر 2029 جىلعا دايىندالۋلارىڭىز كەرەك، - دەيدى قاجىگەلدين.
