تاراز قالاسى قۇرىلىس ءبولىمىنىڭ باسشىسى 4 جىلعا سوتتالدى، دەپ حابارلايدى Dalanews.kz.
تاراز قالاسىنىڭ سوتى قالالىق قۇرىلىس ءبولىمىنىڭ باسشىسى ن. قالدىبايەۆتى، سونداي-اق مەردىگەرلىك ۇيىمدارىنىڭ وكىلى و. ەربولاتۇلىن سوتتادى.
ەربولات ۇلى حالىقتىڭ الەۋمەتتىك وسال توپتارى ءۇشىن كوپپاتەرلى تۇرعىن ۇيلەردىڭ قۇرىلىسىنا بولىنگەن بيۋدجەت قاراجاتىن جىمقىرعانى ءۇشىن كىنالى دەپ تانىلدى، ال قالدىبايەۆ مەردىگەرلەردىڭ مۇددەسى ءۇشىن ورىندالعان جۇمىستاردىڭ جالعان اكتىلەرىنە قول قويىپ، اقشا اۋدارعان.
ولاردىڭ قىلمىستىق قىزمەتىنىڭ ناتيجەسىندە مەملەكەتكە 519 ملن تەڭگەدەن استام شىعىن كەلتىرىلدى.
سوت ۇكىمىمەن قالدىبايەۆقا 4 جىل، ەربولاتۇلىنا 6 جىل باس بوستاندىعىنان ايىرۋ جازاسى تاعايىندالدى.
بۇدان باسقا، سوتتالعان قالدىبايەۆ مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە لاۋازىمداردى اتقارۋ قۇقىعىنان ءومىر بويى ايىرىلدى، ال ەربولاتۇلىنا مەملەكەتتىك، جەكە ۇيىمداردا جانە كۆازيمەملەكەتتىك سەكتور سۋبەكتىلەرىندە 10 جىل مەرزىمگە قارجى بولۋگە بايلانىستى لاۋازىمداردى اتقارۋعا تىيىم سالىندى.
سوت اكتىسى زاڭدى كۇشىنە ەنگەن جوق.
