پرەزيدەنت قاسىم-جومارت توقايەۆ پۋتين مەن نازاربايەۆتىڭ كەزدەسۋى تۋرالى نە ويلايتىنىن ايتتى، - دەپ حابارلايدى Dalanews.kz.
– جاقىندا تۇڭعىش پرەزيدەنتتىڭ ماسكەۋگە بارىپ، ۆلاديمير پۋتينمەن كەزدەسۋىن جۇرتشىلىق سان-ساققا جۇگىرتتى. بيلىكتەن كەتكەننەن كەيىن بەس جىلدان سوڭ بۇلاي جۇزدەسۋدىڭ اقىلعا سىيمايتىنى ايتىلدى. قازاقستاندا الداعى ۋاقىتتا پرەزيدەنت سايلاۋى وتەدى-مىس دەگەن بولجامدار دا پايدا بولدى. مۇنداي كەزدەسۋ كىمگە جانە نە ءۇشىن قاجەت، بۇعان كىم باستاماشى بولدى؟ ءسىزدىڭ پىكىرىڭىزدى بىلسەك.
– نۇرسۇلتان نازاربايەۆ پەن ۆلاديمير ءپۋتيننىڭ جەلتوقسانداعى كەزدەسۋى وتكەن جىلداعى ەكىنشى جۇزدەسۋى عوي دەيمىن. كۇز باسىنداعى ءبىرىنشى كەزدەسۋ تۋرالى بۇقارالىق اقپارات قۇرالدارىندا ايتىلعان جوق. ولار بايىرعى دوستار ءارى ارىپتەستەر رەتىندە جۇزدەسەتىن بولسا كەرەك، ورتاق اڭگىمەلەرى دە بار شىعار. مۇنداي كەزدەسۋلەر ادەتتە نۇرسۇلتان ءابىش ۇلىنىڭ باستاماسىمەن وتەدى. ول ءۇشىن مۇنىڭ ماڭىزى زور. بۇرىنعى قازاق كسر مينيسترلەر كەڭەسىنىڭ ءتوراعاسى، پارتيا باسشىسى جانە ەگەمەن قازاقستاننىڭ پرەزيدەنتى رەتىندە نۇرسۇلتان ءابىش ۇلىنىڭ كرەملمەن تىعىز مورالدىق جانە ساياسي بايلانىسى بارىن ەستەن شىعارماعان ءجون. ونىڭ تالاي ۋاقىتى ماسكەۋدە ءوتتى، سان مارتە ءىسساپارعا باردى، سەزد جانە پلەنۋم وتىرىستارىنا قاتىستى، جۇمىس بابىمەن جانە رەسمي ساپارلارمەن دە بولدى.
ايتا كەتەيىك، 14 جەلتوقساندا رەسەي پرەزيدەنتى ۆلاديمير پۋتين ءوزىنىڭ نوۆو-وگاروۆو رەزيدەنسياسىندا قازاقستاننىڭ ەكس-پرەزيدەنتى نۇرسۇلتان نازاربايەۆتى قابىلدادى. الايدا كەزدەسۋ تۋرالى ەشقانداي تولىق اقپارات جوق.
ەرمۇرات ءباپيدىڭ پىكىرىنشە، بۇل كەزدەسۋدىڭ ساياسي استارى بار.
"مەن ول جەردە بولعان جوقپىن. ءبىراق مەنىڭشە، ول (نازاربايەۆ - رەد.) قانداي دا ءبىر كەپىلدىككە مۇقتاج بولدى. نازاربايەۆ وتستاۆكاعا كەتەر الدىندا ءبىرىنشى كەزەكتە رەسەي پرەزيدەنتىمەن كەڭەسكەن دەپ ويلايمىن. ول كەپىلدىك الدى، ونسىز مۇنداي شەشىم قابىلداماس ەدى. ال ءقازىر، مۇمكىن سول كەپىلدىكتى "جاڭارتۋ" ءۇشىن باردى. ول ءالى دە قوعامدا ءوز ماڭىزدىلىعىن جوعالتپادىم دەپ ويلايدى"، - دەدى دەپۋتات ءماجىلىس كۋلۋارىندا.
كەيبىر ساياساتتانۋشىلار پۋتين بۇل كەزدەسۋ ارقىلى قاسىم-جومارت توقايەۆقا قانداي دا ءبىر بەلگى بەرىپ، ەسكەرتۋ جاساۋدا دەپ سانايدى. ەرمۇرات باپي بۇل نۇسقانى قيسىندى دەپ ەسەپتەيدى.
"سىزدەر بايقادىڭىزدار ما، تاۋەلسىزدىك كۇنىمەن تمد ەلدەرىنىڭ كوبى، كوپتەگەن شەت ەلدەر قۇتتىقتادى. اقوردا سايتىنا كىرىڭىزدەر، ءپۋتيننىڭ قۇتتىقتاۋى جوق. بۇل نەنى بىلدىرەدى؟ مىسالى، مەن قاتتى الاڭدايمىن. ول ءبىزدىڭ تاۋەلسىزدىگىمىزدى مويىنداعىسى كەلمەي مە؟ وتكەن اپتادا عانا رەسەي قاۋىپسىزدىك كەڭەسى ءتوراعاسىنىڭ ورىنباسارى مەدۆەديەۆ تاعى قانداي دا ءبىر ەلدەردى وداققا قوسۋ مۇمكىندىگى تۋرالى ايتقان بولاتىن. وسى تۇرعىدا ول بەلگى بەرگەندەي. ال ءبىر اپتادان كەيىن قازاقستان ءۇشىن ۇلى كۇن - تاۋەلسىزدىك كۇنى ءوتتى، ءبىراق پۋتيننەن قۇتتىقتاۋ جوق. مۇنداي جاعدايلاردان ءارتۇرلى قورىتىندى شىعارۋعا بولادى"، - دەپ بولجايدى ول.
سونىمەن قاتار، ەرمۇرات باپي بۇل كەزدەسۋ ەكىنشى قاڭتاردىڭ بەلگىسى بولۋى مۇمكىن دەگەن پىكىرمەن كەلىسپەيدى.
