رەسپۋبليكا كۇنىنە وراي بۇقتىرما سۋ قويماسىنداعى كوپىر سالتاناتتى تۇردە قولدانىسقا بەرىلدى. اشىلۋ راسىمىنە ايماق باسشىسى ەرمەك كوشەربايەۆ قاتىسىپ، ايتۋلى شاراعا جيىلعان جۇرتقا ىزگى تىلەگىن جەتكىزدى.
— ۇلتتىق مەرەكە رەسپۋبليكا كۇنىنە وراي تاريحي ءساتتىڭ كۋاگەرى بولىپ وتىرمىز. بۇل كوپىر پرەزيدەنتتىڭ ارنايى تاپسىرماسىمەن سالىندى. بۇگىن وبلىستاعى بىرنەشە اۋداندى بايلانىستىراتىن بۇقتىرما سۋ قويماسى ارقىلى وتەتىن ورتالىق ازياداعى ەڭ ۇزىن كوپىر اشىلدى. جاڭا كوپىر تۇرعىنداردىڭ جايلىلىعى مەن قاۋىپسىزدىگىن قامتاماسىز ەتىپ، ەلىمىزدەگى ونەركاسىپ، قۇرىلىس، كاسىپكەرلىك پەن تۋريستىك سالالاردىڭ دامۋىنا ەرەكشە سەرپىن بەرەدى دەپ سەنەمىن.
ايتا كەتەرلىك جايت، بۇل كوپىردى سالۋعا بىردە-بىر شەتەلدىك كومپانيا تارتىلعان جوق. كوپىردى «وبلشىعجول» ج ش س تۇرعىزدى. بەرەكەلى بىرلىك پەن ىنتىماقتىڭ، ءاربىر ازاماتتىڭ ەڭبەگىنىڭ ارقاسىندا ەلىمىز تابىستى دامۋدا، – دەدى ەرمەك كوشەربايەۆ.
سالتاناتتى شارا بارىسىندا وبلىس اكىمى ەرمەك بەدەلباي ۇلى كوپىردىڭ قۇرىلىسىنا ەلەۋلى ەڭبەك سىڭىرگەن جانە قولداۋ كورسەتكەن ازاماتتاردى ماراپاتتادى. اباي وبلىسى اكىمىنىڭ كەڭەسشىسى ازامات قاسىم، «كۇرشىم» پارومىنىڭ كاپيتانى التاي بەردىكپايەۆ، اعا كاپيتانى سەرىك نۇكەتايەۆ جانە باسقارۋشىسى قادىلبەك جارمۇحامبەتوۆ العىس حاتتارمەن ماراپاتتالدى.
