وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ رەسەيلىك «كوسموس-نەفت-گاز» قارجىلىق-ونەركاسىپتىك كومپانياسىنىڭ پرەزيدەنتى يۆان لاچۋگينمەن جانە قازاقستاندىق «ساۋتس-ويل» كومپانياسىنىڭ پرەزيدەنتى سەرىكجان سەيىتجانوۆپەن كەزدەستى.

باسقوسۋدا ءوڭىر باسشىسى مارتەبەلى مەيماندارعا العىسىن ءبىلدىرىپ، ايماقتىڭ ونەركاسىپ پەن اۋىل شارۋاشىلىعى سالاسىنداعى جەتىستىكتەرىمەن تانىستىردى. سونىمەن قاتار، وبلىسىمىزدىڭ ينۆەستيسيالىق جانە تۋريستىك الەۋەتىن شەتەل نارىعىنا تانىستىرۋ باستى باسىمدىقتارىمىزدىڭ ءبىرى ەكەنىن ايتىپ، بىرلەسە جۇمىس ىستەۋگە شاقىردى.

– وڭتۇستىك قازاقستاندا شەتەلدىك ينۆەستورلار ءۇشىن بار جاعدايدى جاساۋعا اكىمدىك جاعى تولىقتاي ءازىر. بۇگىندە وبلىستا 11 يندۋستريالدى ايماقتا 151 ينۆەستيسيالىق جوبا جۇزەگە اسىرىلىپ جاتسا، «وڭتۇستىك» ارنايى ەكونوميكالىق ايماقتا 10 ءىرى كاسىپورىن جۇمىسىن جۇرگىزىپ جاتىر. مۇنان بولەك، ايماقتاعى سالالارعا قارجى سالعان ينۆەستورلار ءۇشىن سالىقتان بوساتۋ سىندى جەڭىلدىكتەر بار، –  دەدى اكىم.

ءوز كەزەگىندە، رەسەيلىك الپاۋىت كومپانيا وكىلى ي.لاچۋگين مەن قازاقستاندىق كاسىپكەر س.سەيىتجانوۆ ايماق باسشىسىنا بىرلەسكەن جوبا ازىرلەپ جاتقانىن جەتكىزىپ، ەۋرو-5 ستاندارتى بويىنشا مۇناي حيميا كومبيناتىن سالۋ جۇمىسىن قولعا الۋدى جوسپارلاپ وتىرعانىن ايتتى. جوسپار بويىنشا جاڭا زاۋىت جىلىنا 2 ملن. توننا شيكىزاتتى قايتا وڭدەۋگە قاۋقارلى. بۇگىنگى تاڭدا سەنىمدى سەرىكتەستەر ىزدەستىرىپ جۇرگەن بيزنەسمەندەر اكىمدىك تاراپىنان جاسالاتىن قولداۋلار ءۇشىن ايماق باسشىسىنا العىسىن ءبىلدىردى.

ايتا كەتۋ قاجەت، قازاقستان مەن رەسەي اراسىنداعى ساۋدا بايلانىسى 2016 جىلى 13583،5 ملن. اقش دوللارىن قۇراسا، ونىڭ 3509،2 ملن. اقش دوللارى ەكسپورت، 9129،8 ملن. اقش دوللارى يمپورت تاۋارلاردىڭ قۇنى الادى.

وقو اكىمىنىڭ باسپا ءسوز قىزمەتى