ورىنبور زاۋىتىنداعى اپاتقا بايلانىستى قازاقستان گازسىز قالمايدى. بۇل تۋرالى قازاقستاننىڭ ەنەرگەتيكا مينيسترلىگى مالىمدەدى، دەپ حابارلايدى Dalanews.kz.
"گازپرومنىڭ" مالىمەتى بويىنشا 19 قازاندا ورىنبور گاز وڭدەۋ زاۋىتىندا ۇشقىشسىز اۋە اپپاراتىنىڭ شابۋىلى سالدارىنان اپات جاعدايى تۋىنداپ، زاۋىت قاراشىعاناق كەن ورنىنان شيكى گاز قابىلداۋدى ۋاقىتشا توقتاتقان.
"زاۋىتتىڭ زاقىمدانۋ سيپاتى مەن جۇمىسىن قالپىنا كەلتىرۋ مەرزىمدەرى بويىنشا اقپارات رەسەيلىك تاراپتان ءالى بەرىلگەن جوق. قازاقستان گازسىز قالمايدى. گاز ىشكى تۇتىنۋشىلارعا قالىپتى رەجيمدە، ەشقانداي شەكتەۋسىز جەتكىزىلىپ جاتىر"، - دەپ جازىلعان حابارلامادا.
مينيسترلىك مالىمەتىنە سۇيەنسەك، قاراشىعاناق شيكىزاتىن وڭدەۋ جانە مۇناي وندىرۋگە ىقتيمال اسەرى كەن پايدالانۋشىلارىمەن بىرلەسىپ قارالىپ جاتىر.
"شىعىندار مەن الداعى شارالار تۋرالى قوسىمشا حابارلانادى. ەنەرگەتيكا مينيسترلىگى جاعدايدى باقىلاۋدا ۇستاپ، رەسەيلىك تاراپ جانە كەن ورنى وپەراتورلارىمەن تۇراقتى بايلانىستا"، - دەپ جازىلعان حابارلامادا.
